Hơdôm thun hlâo anun, sang anŏ ơi BNướch Ngang, dŏ amăng plơi A Duông, tơring kual Prao, tơring glông kual čư̆ siăng Đông Giang, tơring čar Quảng Nam lĕ sang anŏ ƀun rin. Rĭm hrơi, ơi BNướch Ngang juăt nao pơ hmua pla hơbơi plum, čik, boh ñông…, tơlơi hơdip dŏ lu tơnap tap. Tơdơi anun, ơi BNướch Ngang hơmâo gơnong bruă ngă hmua tơring čar Quảng Nam hăng gong gai tơring glông Đông Giang djru brơi anah phun pla kiăng kơ pla ƀơi đang hmua-đang glai. Ră anai, ơi BNướch Ngang hơmâo 4 ektar phun akha kyâo ba kích jŭ mriah, 5 ektar phun keo hăng dổi, quế. Laih dong, ñu ăt rông wŏt bê, un …rĭm thun, kmlai pơhrui glăi mơng 150 klăk truh pơ 200 klăk prăk. Ơi BNướch Ngang lĕ mơnuih apăn bruă Ping gah lêng kơ ba jơlan hlâo amăng djop mơta bruă. Ñu ră anai lĕ Khua plơi A Duông, tơring kual Prao, tơring glông Đông Giang. Ñu pioh lu hrơi mông nao bưp, pơlăi nao rai hăng črâo ba neh met wa djuai ania Cơ Tu pơđĭ kyar bơwih ƀong huă. Hlơi thơ tơnap tap, ñu djru brơi anah phun pla, ơi BNướch Ngang lêng kơ abih pran jua.

“Kâo lĕ mơnuih apăn bruă Ping gah kiăng kơ ba gru brơi abih bang mơnuih amăng plơi pla. Hơbô̆ bruă bơwih ƀong mơng sang anŏ gơmơi ba glăi tŭ yua, yua anun hơmâo neh met wa ngă tui. Rĭm wŏt jơnum plơi kâo juăt črâo brơi neh met wa bruă pla hơdôm djuai phun pla hăng bơwih brơi phun pla, bruă rông hlô. Čang rơmang gong gai ƀon lan tŏ tui djru brơi hơdôm boh sang anŏ hơmâo hơmâo lŏn ngă đang hmua pla pơjing, djru brơi ƀing gơñu hơmâo bruă mă hăng prăk pơhrui hơđong”.

Ơi BNướch Ngang juăt pơtô pơblang, pơtrut pơsur neh met wa pơjing tơlơi hơdip pơplih phrâo, lui hĭ tơlơi phiăn ƀu klă hiam. Ơi A Lăng Minh, djuai ania Cơ Tu dŏ amăng tơring kual Prao bơră ruai glăi, hlâo adih, sang anŏ ñu lĕ sang anŏ ƀun rin, hơmâo ơi BNướch Ngang nao tơl sang črâo brơi bơwih ƀong huă, rông hlô hăng pla pơjing yua anun ră anai tơlơi hơdip jai hrơi pla ƀiă tơnap tap:

“Mơnuih apăn bruă Ping gah BNướch Ngang lĕ mơnuih ba jơlan hlâo amăng pơđĭ kyar bơwih ƀong huă amăng plơi pla. Laih dong ñu ăt črâo brơi neh met wa rông hlô kah hăng pla phun akha kyâo ba kích jŭ mriah yua anun tơlơi hơdip kơ neh met wa jai hơđong hăng hrưn đĭ pơklaih mơng ƀun rin”.

Lu mơnuih apăn bruă Ping gah dŏ hlăk ai ƀơi kual čư̆ siăng tơring glông Đông Giang, tơring čar Quảng Nam hơmâo pơdah pran jua ba jơlan hlâo, thâo pơmĭn, khin ngă, hrưn đĭ pơklaih mơng ƀun rin. Mơnuih apăn bruă Ping gah ATing Nấu dŏ amăng tơring kual Prao, tơring glông Đông Giang ăt lĕ mơnuih ba jơlan hlâo. Ră anai, ATing Nấu hơmâo man pơdong drông war rông un, mơnŭ biơ, klơi dơnao rông akan hăng pla lu phun kyâo boh troh hơmâo: sầu riêng, lòn bon..

Ơi Nguyễn Hữu Sanh, khua khul mơnuih ngă hmua tơring glông Đông Giang, tơring čar Quảng Nam brơi thâo: ƀing mơnuih apăn bruă Ping gah ƀơi anai lêng pran gơgrong ba jơlan hlâo amăng ngă đang hmua, pơđĭ kyar bơwih ƀong huă. Hơmâo laih lu mơnuih ba gru lơm bơwih ƀong rơgơi anun lĕ ơi BNướch Ngang, ATing Nấu…ƀing gơñu ngă lar hyu kơtang bruă pơđĭ kyar bơwih ƀong, pơhrŏ trun ƀun rin:

“Mơnuih apăn bruă Ping gah ba jơlan hlâo amăng pơđĭ kyar bơwih ƀong huă. Sit biă ñu lĕ ding kơna khul ngă hmua lêng kơ ba gru pok pơhai ngă tui hơdôm hơbô̆ bruă bơwih ƀong, sit biă ñu pơđĭ kyar ngă đang hmua, pla pơjing hơdôm blah đang hmua ba glăi pơhrui hơmâo hmăi djru brơi mơnuih ngă hmua hrưn đĭ ngă pơdrong asah hăng pơklaih mơng ƀun rin hơđong kjăp”.

Rĭm thun, Khul mơnuih ngă hmua tơring čar Quảng Nam gum hrŏm hăng hơdôm gơnong bruă, gong gai ƀon lan, djru brơi 1.500 čô mơnuih apăn bruă Ping gah lĕ ding kơna khul ngă hmua dưi čan prăk mă kmlai ƀiă, djru brơi anah phun pla, hlô rông, djru brơi ƀing apăn bruă Ping gah pơđĭ kyar bơwih ƀong huă. Ơi Hồ Quang Bửu, Kơ-iăng khua Jơnum min mơnuih ƀôn sang tơring čar Quảng Nam brơi thâo: Lu mơnuih apăn bruă Ping gah ƀu djơ̆ kơnong bơwih ƀong rơgơi đôč ôh mơ̆ ăt gir run djru brơi hơdôm sang anŏ tơnap tap thâo bơwih ƀong, hơmâo lu tui dong prăk pơhrui, hơđong tơlơi hơdip mơda, pơgôp man pơdong plơi pla phrâo:

“Ră anai, sa, dua čô mơnuih apăn bruă Ping gah ƀơi hơdôm boh tơring glông čư̆ siăng, ƀing gơñu bơwih ƀong rơgơi biă mă, ƀing gơñu mut hrŏm bơwih ƀong pơplih phrâo hăng jing hơbô̆ bruă bơwih ƀong črâo ba mơnuih ƀon sang. Sit biă ñu lĕ ƀing gơñu pla phun akha kyâo ba glăi prăk pơhrui lu. Tơdah ƀơi kual čư̆ siăng hơmâo lu mơnuih apăn bruă Ping gah ba gru tui anai, tơlơi hơdip kơ neh met wa amra pơplih tong ten”./.