VOV4.Jarai - Amăng rơwang hrơi tơjuh laih rơgao, amăng jơnum lok 3 (Khua pơ ala mơnuih ƀon sang dêh čar tal 15), hơmâo pơphun jơnum tơña hăng lăi glăi. Khua ding jum ngă hmua hăng pơđĭ kyar ƀon lan ơi Lê Minh Hoan lĕ mơnuih blung a lăi glăi tơlơi tơña ƀơi anăp Khua pơ ala mơnuih ƀon sang. Bruă “pơhrui hơmâo mơ̆ trun nua” lĕ tơlơi đing nao hloh mơng Khua pơ ala mơnuih ƀon sang. Amăng hơdôm hơdră Khua ding jum ơi Lê Minh Hoan lăi pơtong bruă pơphun bơwih ƀong ngă hmua, pơtrut pơsur neh met wa mut hrŏm hăng Anom bơwih ƀong hrŏm. Laih dong lăi pơtong pơplih tơlơi pơmĭn mơng ngă hmua tui hơđăp hơdai nao ngă hmua ba glăi rơnoh yôm.

Pok blung mông tơña, Khua pơ ala mơnuih ƀon sang hơmâo lu tơlơi rơña kơ bruă “pơhrui hơmâo mơ̆ trun nua” hăng hơdôm bruă djru sĭ mơdrô gơnam đang hmua ăt dŏ ƀuh na nao mơn. Brruă anai hơmâo lăi nao mơng rơwang mă bruă hlâo anun laih, ơi Dương Khắc Mai, Khua pơ ala mơnuih ƀon sang Dak Nông tơña Khua ding jum ngă hmua hăng pơđĭ kyar ƀon lan tui anai:

“Bruă ngă hmua ăt tui jơlan gah rơhaih đôč hluai tui rơnoh blơi mut, lơ̆m anun nua blơi kmơk, ia jrao pơgang phun pla đĭ kơtang, bruă ngă hmua ƀuh raih daih tui hluai hor hăng pơhrui gơnang nao sa, dua anih sĭ mơdrô. Hơdră bruă aka ƀu dưi pơhưč anom bruă tuh pơ alin amăng bruă anai. Rơkâo Khua ding jum brơi thâo, hơdră pơsir phun kơ bruă anai”.

Khua ding jum ngă hmau hăng pơđĭ kyar ƀon lan Lê Minh Hoa lăi glăi:

“Ƀing ta kiăng kơ pơplih glăi bruă ngă hmua, anun lĕ ba glăi gơnam tam sĭ mơdrô. Tơlơi pơhing, tơpă sit, bơyan pla brơi rĭm phun pla hăng amra ba sĭ mơdrô pơ hơdôm anih anom. Bruă sĭ mơdrô pơ tač rơngiao, amăng lŏn ia. Khua ding jum ngă hmua hăng pơđĭ kyar ƀon lan ăt ƀuăn hăng Khua dêh čar, amra tañ hrŏm hăng hơdôm anom bruă sĭ mơdrô tač rơngiao pơphun ngă tui bruă anai.

Khua Ding jum ơi Lê Minh Hoan lăi glăi tơlơi tơña

Tơña kơ bruă ngă đang hmua pơlir hăng anih anom blơi mut gơnam đang hmua, lu khua mua đing nao kơ bruă pơphun bơwih ƀong, lăi pơthâo anih anom sĭ mơdrô kah hăng bruă đôm pơkŏng glăi gơnam đang hmua amăng bơyan pơhrui. Ơi Hoàng Anh Công, Khua pơ ala mơnuih ƀon sang Thái Nguyễn tơña tui anai:

“Sa amăng hơdôm bruă phun lĕ yua hơdră blơi mut bơdjơ̆ nao hơnong pơkă gơnam đang hmua hiam hơdjă gah dêh čar Khač hơmâo lu anŏ pơplih kiăng kơ pơhlôm gơnam hơdjă lơ̆m blơi mut jai hrơi ƀuh lu tui, anai lĕ djơ̆ hăng hơnong pơkă mơng hơdôm boh dêh čar kual Mi kô̆ hăng dêh čar Mi. Tui Khua ding jum ƀing ta kiăng ngă hiưm pă, hơmâo hơdră bruă hơget kiăng kơ djru brơi mơnuih ƀon sang dưi pla pơjing gơnam hiam hơdjă sĭ nua yôm mơng anun kơtưn amăng bruă sĭ mơdrô pơ tač rơngiao hăng pơjing bruă sĭ mơdrô pơ tač rơngiao jai hơđong kjăp”.

Khua ding jum ngă hmua hăng pơđĭ kyar ƀon lan Lê Minh Hoan lăi rơđah:

“Amăng hơdôm thun laih ƀing ta pơmĭn dêh čar Khač lĕ dêh čar amuñ ba gơnam sĭ mơdrô, lơ̆m dêh čar Khač pơplih hơdră wai pơgang hŭi kơ klin kheng kah hăng pơhlôm gơnam hiam hơdjă ngă dêh čar ta bưp tơnap tap, anai lĕ tơlơi glăm ba mơng hơdôm ding jum, gơnong bruă gah gơnong glông, amăng anun hơmâo Ding jum ngă hmua hăng pơđĭ kyar ƀon lan yua kơ kaih lăi pơthâo kiăng mơnuih ƀon sang thân hăng mơnuih ngă hmua ăt aka ƀu pơplih ôh, aka ƀu đing nao kơ bruă anai”.

Tơña kơ bruă bơdjơ̆ nao nua kmơk, ia jrao pơgang phun pla, gơnam ƀong brơi hlô rông, hơdôm gơnam pioh yua amăng ngă đang hmua đĭ nua kơtang amăng hơdôm thun laih rơgao, ngă kơ mơnuih ngă hmua bưp tơnap tap, khŏm gir mă bruă kiăng hơmâo lơi, đa pơhrui ƀu hơmâo ôh. Sit biă ñu, dong mơng hrơi klin Covid-19 hơđuh đĭ, nua djop gơnam đĭ kơtang. Ƀing khua mua brơi thâo, anai lĕ tơlơi kiăng pơsir mơng gơnong bruă ngă hmua; laih dong rơkâo Khua ding jum ơi Lê Minh Hoan lăi rơđah hơdôm bruă pơsir pơ anăp anai kiăng kơ djru brơi mơnuih ƀon sang pơplih kiăng kơ djơ̆ hăng tơlơi sit nik ră anai.

“Anai lĕ bruă kiăng hloh, kiăng pơphun glăi bruă ba gơnam sĭ mơdrô, pla pơjing. Pơplih bruă ngă hmua, pơtrut pơsur neh met wa bơwih ƀong hrŏm. Lơ̆m neh met wa mut hrŏm anom bơwih ƀong hrŏm amra pơsit tong anih anom bơwih ƀong huă kiăng kơ hơdôm anom bruă bơdjơ̆ nao črâo ba, sĭ gơnam djơ̆ nua, pla pơjing gơnam hơdjă, črâo brơi plai ƀiă yua ia jrao, ngă hmua hơdjă”.

Hăng tơlơi tơña mơng yă Vương Thị Hương, Khua pơ ala mơnuih ƀon sang tơring čar Hà Giang kơ hơdră pơtrut bơwih ƀong sĭ mơdrô mut hrŏm pơlir hơbit bơwih ƀong ngă hmua hrŏm hăng blơi pơhrui gơnam ? Khua ding jum Lê Minh Hoan lăi glăi tui anai:

“Djop tơring čar kiăng gơgong pơlir hơbit hăng tơring čar pơkŏn kiăng pơhưč anom bơwih ƀong sĭ mơdrô pơhlôm hơđong gơnam pioh pơkra pơjing. Djop ƀon lan kiăng mut hrŏm kjăp, ha bơnah lĕ mơnuih ngă hmua, ha bơnah lĕ anom bơwih ƀong sĭ mơdrô. Kâo pơmĭn, hơdôm tơlơi truh kih mơng anom bơwih ƀong sĭ mơdrô hơmâo tuh pơ alin, tơlơi đăo gơnang, pơlăi nao rai mơng mơnuih ngă hmua, dua bơnah amra mut hrŏm. Tơlơi đăo gơnang ăt hloh hăng tơlơi pơkôl pơkă”.

Siu Đoan: Pơblang