Ƀơi hơdôm anih pơbưp, ƀing Khua pơ ala mơnuih ƀôn sang tơring čar Gia Lai lăi pơthâo brơi mơnuih ƀôn sang boh tơhnal, jơlan hơdră hăng boh than mơng jơnum lok 7, Khua pơ ala mơnuih ƀôn sang dêh čar  tal XV laih rơgao. Mơnuih ƀôn sang hok mơ-ak hăng tơlơi dưi mơng jơnum tal anai, sit biă ñu bruă tŭ yap ngă tui lu črăn tơlơi phiăn phrâo hrŏm hăng hơdôm boh tơhnal yôm phăn.

Hrŏm hăng anun, mơnuih ƀôn sang ăt lăi nao hơdôm bruă aka ƀu klă amăng ƀon lan, čang rơmang hơmâo Khua pơ ala mơnuih ƀôn sang đing nao sem lăng. Sit biă ñu lĕ bruă ngă hră pơ-ar lŏn mơnai dŏ lu tơnap tap, sui hrơi ngă bơngŏt amăng mơnuih mơnam; bruă kơƀah ia yua ăt aka ƀu pơsir hĭ; rơkâo Kơnuk kơna djru brơi klă dong mơnuih djơ̆ jrao hret hăng ƀing apăn bruă gưl să. Ƀơi plơi prong Ayun Pa, mơnuih ƀôn sang rơkâo kiăng wai lăng kjăp bruă rông čim črang črah amăng plơi pla; ƀing mơnuih djru hơkrŭ tơnap tŭ mă prăk djru mơng kak ATM.