Ƀơi să Đức Trọng, jơlan glông djru brơi bruă bơwih ƀong ngă đang hmua lĕ bruă hơmâo lu mơnuih ƀôn sang đing nao. Sa, dua ară jơlan nao pơ hmua ƀơi kual Đà Lạt, Đơn Dương, Đức Trọng hơmâo tuh ƀêtông samơ̆ ăt dŏ anet, aka ƀu tơkuh nao rai hăng jơlan phun, ngă kơ gơnam đang hmua khŏm pơdŭ pơplih lu wŏt, ngă đĭ tui prăk duh hăng bơdjơ̆ nao tơlơi bơwih ƀong huă. Ară jơlan nao pơ hmua ƀơi plơi Knai hơmâo tuh ƀêtông samơ̆ ară jơlan ĐH6 sui thun aka ƀu man pơkra. Hơdôm ară jơlan Tân Phú-Bảo Lộc, Bảo Lộc-Liên Khương ăt bưp tơnap tap amăng pơhrui glăi lŏn mơnai. Ơi Lê Hữu Quế, Khua git gai Ping gah plơi Phú Lộc, să Đức Trọng rơkâo: “Tơlơi đing nao git gai, pơtrut pơsur ngă tañ hơdôm ară jơlan phun pơlir nao rai amăng kual glăk pok pơhai amăng tơring čar; hmao tlôn pơsir hĭ tơlơi gun kơ pơhrui glăi lŏn mơnai, gir run pơsir hĭ djơ̆ hră pơkôl hăng hơdôm anom bruă man pơkra kaih, ngă bruă ƀu klă.”

Mơnuih ƀôn sang ruah khua rơkâo đing nao pơhlôm prăk pơkra ming jơlan glông amăng hơdôm kual ngă đang hmua, pơđĭ kyar jơlan pơdŭ pơgiăng gơnam logistics giăm tơdron rơdêh por jar kmar Liên Khương, ngă gêh gal ba gơnam đang hmua ba nao pơ hơdôm anih blơi pơhrui pơprong.

Mơng hơdôm tơlơi rơkâo anun, Khua apăn bruă Ping gah, Khua sang phat kơđi dêh čar Nguyễn Văn Quảng rơkâo kơtưn krăo lăng hơdôm ring bruă man pơkra jơlan phun, sit biă ñu lĕ hơdôm ară jơlan man pơkra kaih, laih dong hmao tlôn pơsir hĭ tơlơi gun kơ pơhrui glăi lŏn mơnai.

Ƀu djơ̆ kơnong jơlan glông, mơnuih ƀôn sang ruah khua să Đức Trọng ăt lăi pơthâo hơdôm bruă bơdjơ̆ nao asuk ruk, ia yua, lŏn mơnai, sang dŏ mơnuih mơnam; rơkâo pơsir hĭ bruă dưm dăp man pơdong sui thun gah Dơnung ia krông Dă Nhim. Bơdjơ̆ nao gong gai ƀon lan 2 gưl, mơnuih ƀôn sang rơkâo pơhrua mơnuih mă bruă, prăk mă yua, sem lăng hơdră djru brơi mơnuih apăn bruă, hơdôm khul grup ƀơi ƀon lan hăng hơdră pơsir hĭ hơdôm anih anom ƀu mă yua dong tah tơdơi kơ pơmut hrŏm.

Ƀơi phương Lâm Viên-Đà Lạt, hơdôm tơlơi rơkâo ăt đing nao hơdôm bruă jê̆ giăm tơlơi hơdip anun lĕ bruă pơhlôm brơi ia jrao, gơnam yua dong amăng hơdôm gơnam yua tui hră pơhlôm nua ia jrao; dưm dăp mơnuih mă bruă brơi Jơnum min djop djuai ania mơnuih mơnam hăng hơdôm khul grup, pơsir hĭ bruă asuk ruk, wai pơgang jum dar, pơđĭ kyar tuai čuă ngui mơtah; pơsir hĭ tơnap tap amăng ngă hră pơ-ar lŏn mơnai. Sa, dua bruă hơmâo mơnuih ƀôn sang ruah khua đing nao biă mă anun lĕ bruă kơƀah hơdrôm hră. Yă Nguyễn Thị Phương Diệu, dŏ amăng ƀut plơi Đa Thiện, brơi thâo ƀing amĭ ama khŏm photocopy sa, dua hơdrôm hră brơi ană bă hrăm hră, ngă pơhrua dong prăk yua hăng amra bơdjơ̆ nao bruă mă yua hơdrôm hră. “Ƀing amĭ ama glêh glar biă mă kơ bruă blơi hơdrôm hră brơi ƀing ană bă. Sa, dua hơdrôm bruă ră anai ăt dŏ kơƀah yua anun ƀing čơđai khŏm photo mă kiăng kơ hơmâo hơdrôm hră hrăm. Sa, dua hơdrôm hră ñu hơmâo ia iom jŭ mriah anun ăt khŏm nao photo hrup tui anun mơn ngă rơngiă lu prăk kak kah hăng bơdjơ̆ nao kơ bruă hrăm hră kơ ană bă. Laih dong lơm yua hơdrôm hră photo anun amra ngă soh bơdjơ̆ nao hơdrôm hră čoh hơđăp.”

Amăng hơdôm mông bưp, ƀing Khua pơ ala mơnuih ƀon sang tơring čar Lâm Đồng ăt lăi pơthâo brơi mơnuih ƀôn sang kơ boh tơhnal mơng Jơnum ƀu tui tơđar lok I, him lăng boh tơhnal amăng jơnum lok 2, Khua pơ ala mơnuih ƀon sang dêh čar tal XVI hăng lăi pơthâo ba than pơsir hĭ hơdôm tơlơi rơkâo mơng mơnuih ƀôn sang hluai tui hơdôm mông bưp hlâo anun. Pơlăi nao rai hăng mơnuih ƀôn sang ƀơi phương Lâm Viên-Đà Lạt, Khua apăn bruă Ping gah, Sang bruă phat kơđi dêh čar Nguyễn Văn Quảng pơsit tong hơdôm tơlơi pơgôp, tơlơi rơkâo amra pơtum pơƀut, ba nao hơdôm anom bruă bơdjơ̆ nao sem lăng, pơsir hĭ; hơdôm bruă dong amăng bruă glăm ba mơng ƀon lan kiăng đing nao pơsir hĭ hăng lăi glăi mơnuih ƀôn sang. “Ƀing Khua pơ ala mơnuih ƀon sang tŭ mă hơdôm tơlơi pơgôp hiăp mơng mơnuih ƀôn sang ruah khua. Ƀing gơmơi lăng hơdôm tơlơi pơgôp anai yôm phăn biă mă, pơdah tơlơi glăm ba mơng ƀing gơñu hăng ƀon lan, hăng lŏn ia. Bơ sa, dua tơlơi mơ̆ mơnuih ƀôn sang đing nao, kâo amra rơkâo khua mua tơring čar, sit biă mă ñu khua jơnum min tŏ tui hơmâo tơlơi git gai kiăng pơsir hĭ khut khăt hăng lăi glăi mơnuih ƀôn sang amăng hră pơ-ar brơi tong ten hloh.”

Hăng hơdôm tơlơi rơkâo dŏ glăi, ơi Nguyễn Văn Quảng tŭ yap, tŭ mă kiăng ƀing Khua pơ ala mơnuih ƀon sang tơring čar Lâm Đồng pơtum pơƀut, ba nao anom bruă bơdjơ̆ nao sem lăng, pơsir hĭ hăng djru brơi jơnum lok 2, Khua pơ ala mơnuih ƀon sang dêh čar XVI./.