VOV4.Jarai-Prăp lui jơnum lok 4, khua mua pơ ala mơnuih ƀôn sang dêh čar tal XV pơ anăp, mơ̆ng lơ 5 truh lơ 11/10, Grup pơ ala mơnuih ƀôn sang dêh čar ƀơi Lâm Đồng jơnum bưp mơnuih ruah khua ƀơi hơdôm tơring glông, plơi prong amăng tơring čar. Lu tơlơi aka ƀu găl, mơnuih ruah khau rơkâo đĭ, kah hăng pơgang hlâo hăng pơgăn tơlơi soh ƀong kông ngăn, bruă mă pơgăn tơlơi taih amang amăng sang anŏ, jơlan hơdră pơkă lăng-pơjrao duam ruă, bruă ngă tui tơhnal dêh čar pơtrun, rơnoh prăk tuh pơ alin kơ bruă čar, bruă čuk pơkra jơlan glông nao rai amăng plơi pla, pơhlôm hơđong tơlơi hơdip mơda mơnuih mơnam….

Mơnuih ƀôn sang Lâm Đồng dŏ tơguan wơ̆t hrơi mlam kiăng čih anăn ngă hră yua lŏn ƀơi

anih ngă bruă sa bah amăng

Lu mơnuih ƀôn sang ruah khua tơring čar Lâm Đồng đing nao biă mă kơ hơdră pơhrŏ tơlơi ƀun rin hơđong kjăp, lu tơlơi pơsir ia hơdjă yua amăng kual plơi pla, wai lăng pơgang glai klô, mă yua kông ngăn amăng lŏn glai, djru sang bruă sĭ mơdrô hăng mơnuih ngă hmua pơđĭ tui boh tŭ yua sĭ mơdrô, pơgăn bruă pơkra hơbâo kmơ̆k pruai, gơnam yua ngă hmua ƀu klă. Sa boh yôm phun dưi hơmâo lu mơnuih ruah khua đing nao anun lĕ ngă hră pơsit brơi hră yua lŏn blung a kaih đơi, tơnap tap, sui hrơi blan.

Mơnuih ruah khua rơkâo đĭ hăng Grup khua mua pơ ala mơnuih ƀôn sang dêh čar ƀơi

Lâm Đồng hăng lu mơta tơlơi

Grup khua mua pơ ala mơnuih ƀôn sang dêh čar ƀơi Lâm Đồng pioh lu mông bơ ruă ruai, tơlơi pơhing, pơsir lu boh yôm phun pơkŏn, laih dơ̆ng čih pioh, pơtum hĭ abih tơlơi pơgôp hiăp mơ̆ng mơnuih ƀôn sang ruah khua lăi pơthâo amăng mông jơnum bưp.

Nay Jek: pơblang