Tơlơi pơtrun pơsit kơ bruă ruah ơi Trần Thanh Mẫn ngă Khua git gai wai lăng pơ ala mơnuih ƀôn sang dêh čar tal 15 dưi hmâo ƀing mơnuih pơ ala kơ Khua pơ ala mơnuih ƀôn sang dêh čar pơsit hluai tui hăng 475/475 čô khua pơ ala gum hrŏm pơsit tŭ ư (hmâo 97,45% mrô mơnuih pơ ala kơ Khua pơ ala mơnuih ƀôn sang dêh čar). Khua git gai wai lăng pơ ala mơnuih ƀôn sang dêh čar ơi Trần Thanh Mẫn ƀuăn pơsit đĭ apăn bruă:

 “Gah yŭ khăn gru mriah bôh pơtŭ kơñĭ mơ̆ng Lŏn ia, ƀơi anăp Khua pơ ala mơnuih ƀôn sang dêh čar hăng neh wa pơ ala mơnuih ƀôn sang đơ đam dêh čar, kâo – Khua git gai wai lăng pơ ala mơnuih ƀôn sang lŏn ia djop mơnuih dưm kơnar Việt Nam ƀuăn pơsit: Ha pran jua hăng Lŏn ia, hăng Mơnuih ƀôn sang, hăng Phiah phiăn dêh čar djop mơnuih dưm kơnar Việt Nam; gir run hrưn đĭ ngă giong klă bruă mơ̆ Ping gah, Kơnuk kơna hăng Mơnuih ƀôn sang jao brơi”.

Pơhiăp tơdơi kơ đĭ apăn bruă, Khua git gai wai lăng pơ ala mơnuih ƀôn sang dêh čar ơi Trần Thanh Mẫn pơdah pran jua pơpŭ hăng thâo tơngia prong truh Khua mir sir Hồ Chí Minh; hơdor tơngia ƀing khua git gai nao hlâo, ƀing ngă hơkrŭ đưm, Amĭ Việt Nam sông kơtang, Khul ling tơhan sông kơtang, Sông kơtang mă bruă; hơdôm bôh sang anô̆ tơhan pơsăn drơi kơ lŏn ia, ƀing ling tơhan rơka, ruă, sang anô̆ djru ngă hơkrŭ đưm; bơni tơlơi git gai, črâo ba djơ̆, kơjăp mơ̆ng Grŭp mă bruă Ping gah dêh čar, Ding jum kơđi čar, Grŭp git gai Ping gah, mơ̆ng Khua git gai Ping gah dêh čar ta ơi Nguyễn Phú Trọng.

Tơlơi pơtrun pơsit kơ bruă ruah ơi Tô Lâm ngă Khua mir sir dêh čar djop mơnuih dưm kơnar Việt Nam dưi hmâo ƀing mơnuih pơ ala kơ Khua pơ ala mơnuih ƀôn sang dêh čar pơsit hluai tui hăng 472/473 čô khua pơ ala pơsit tŭ ư. Pơhiăp đĭ apăn bruă tơdơi kơ ngă lơphet ƀuăn gơgrong, Khua mir sir dêh čar ơi Tô Lâm ƀuan amra ngă tui tơpă, tum djop bruă jao, tơlơi dưi mơ̆ng Khua mir sir dêh čar hmâo Phiăn pơkă; ngă klă bruă jao amăng lŏn ia, pơtom hiăp, pơgang lŏn ia, rơnuk rơnua mơ̆ng lŏn ia.

 “Thâo dơlăm bruă gơgrong prong prin ƀơi anăp Ping gah, Kơnuk kơna, Mơnuih ƀôn sang, Kâo ƀuan amra ngă tui tơpă, tum djop bruă jao, tơlơi dưi mơ̆ng Khua mir sir dêh čar hmâo Phiah phiăn pơkă; ngă klă bruă jao amăng lŏn ia, pơtom hiăp, pơgang lŏn ia, rơnuk rơnua plơi pla mơ̆ng lŏn ia; gum hrŏm abih bang Ping gah, abih bang mơnuih ƀôn sang, abih bang khul ling tơhan hăng hơdôm khul grŭp amăng glông bruă kơđi čar ngă tui prong pran jua “gơgrong pô, phing kơ pran jua, gơgrong pran pô, ư-ang djuai ania”; gir run ngă tui truh kih djop hơdră pơtrun, jơlan gah mơ̆ng Ping gah, blung hlâo lĕ Tơlơi pơtrun pơsit Jơnum khua pơ ala đơ đam dêh čar tal 13 mơ̆ng Ping gah”.

Bôh tơhnal pơsit ruah Khua mir sir, Khua git gai wai lăng pơ ala mơnuih ƀôn sang hăng mrô hră plĕ ruah lu brơi ƀuh tơlơi đăo kơnang mơ̆ng mơnuih pơ ala Khua pơ ala mơnuih ƀôn sang dêh čar, ăt lĕ tơlơi lăi pơthâo hyu tơlơi čang rơmang mơ̆ng mơnuih ƀôn sang. Khua mir sir phrâo Tô Lâm hăng Khua git gai wai lăng pơ ala mơnuih ƀôn sang dêh čar ơi Trần Thanh Mẫn pơhlôm djop hơdôm tơhnal pơkă hrŏm mơ̆ng ding kơna Ding jum kơđi čar, Grŭp git gai Ping gah, hmâo tơlơi đăo kơnang prong amăng abih bang Ping gah hăng Mơnuih ƀôn sang. Khua pơ ala Phạm Văn Hòa, Grŭp Đồng Tháp čang rơmang:

 “Dua tơlơi pơhiăp mơ̆ng Khua mir sir, Khua git gai wai lăng pơ ala mơnuih ƀôn sang, hơdôm tơlơi pơhiăp anai khom lăi rơđah kơ drơi pô kâo hăng mơnuih ƀôn sang čang rơmang prong biă Khua mir sir, Khua git gai wai lăng pơ ala mơnuih ƀôn sang dêh čar pơsit pran jua yak rơgao tơlơi tơnap, yak rơgao tơlơi gun pioh ngă giong klă bruă jao mơ̆ng Ping gah, Kơnuk kơna hăng Mơnuih ƀôn sang jao brơi”.

Amăng hơdôm hrơi bruă bơwih ƀong amăng lŏn ia hăng jar kơmar bưp lu tơlơi tơnap, bruă ruah giong mơnuih apăn bruă git gai phun amra djru hơkrŭ đĭ dong pran đăo kơnang, pơjing pran pơtrut pioh abih bang glông bruă kơđi čar đing nao ngă giong bruă dô̆ hmâo lu tơlơi tơnap gah anăp. Khua pơ ala mơnuih ƀôn sang Tạ Văn Hạ, Grŭp tơring čar Quang Nam pơsit, Khua mir sir ơi Tô Lâm hăng Khua git gai wai lăng pơ ala mơnuih ƀôn sang dêh čar ơi Trần Thanh Mẫn leng kơ mơnuih dưi pơhrăm hmâo akô̆ tlôn, găn rơgao lu bruă apăn yôm phăn, hmâo bôh thâo, tơlơi găn rơgao amăng bruă mă.

 “Tal jơnum anai hmâo sa tơlơi yôm phăn hloh hăng ăt dưi hmâo mơnuih ƀôn sang đing nao, biă ñu bruă ruah mơnuih apăn bruă. Khua pơ ala mơnuih ƀôn sang ruah Khua mir sir, Khua git gai wai lăng pơ ala mơnuih ƀôn sang dêh čar hluai tui bôh tơhnal ruah pơdah pran gơgrong mơ̆ng mơnuih pơ ala Khua pơ ala mơnuih ƀôn sang dêh čar ƀu djơ̆ kơnong kơ hăng ƀing khua git gai ôh mơ̆ dưi ruah hrơi anai mơ̆, ñu dô̆ jing bruă gơgrong ngă hiưm hơpă lăp djơ̆ tơlơi Ping gah kiăng, pran jua mơnuih ƀôn sang amăng bruă git gai lŏn ia”./.