Rơwang hrơi tơjuh rơgao, Grŭp Khua pơ ala mơnuih ƀôn sang dêh čar tơring čar Dak Lak hmâo laih mông bưp mơnuih pơ ala kơ mơnuih ƀôn sang amăng hơdôm bôh tơring glông Krông Pač, Čư̆ Mgar, Ea Sŭp hăng Buôn Đôn. Hlâo kơ Tal jơnum lok 9, Khua pơ ala mơnuih ƀôn sang dêh čar tal XV hăng rơnoh tañ mơ̆ng bruă dưm dăp glăi jơlan gah mă bruă čar, sa amăng hơdôm čang rơmang hloh mơ̆ mơnuih pơ ala kơ mơnuih ƀôn sang pơdah pran jua ruah djơ̆ mơnuih păn bruă hăng bruă apăn phrâo.

Ƀơi anih bưp, lu mơnuih pơ ala kơ mơnuih ƀôn sang pơdah pran jua tŭ ư hrŏm hăng hơdră pơtrun dưm dăp rơbô̆t jơlan gah mă bruă čar, samơ̆ ăt rơkâo mơn bruă pơpha mơnuih apăn bruă khom đing nao truh bôh thâo, pran jua hăng tơlơi abih pran jua mă bruă hăng mơnuih ƀôn sang. Ơi Nguyễn Duy Thành, mơnuih pơ ala kơ mơnuih ƀôn sang thôn 14, să Ea Kly, tơring glông Krông Păc lăi tơlơi gum pơhiăp:

“Rơbô̆t jơlan gah mă bruă čar mơ̆ng dêh čar truh plơi pla mơnuih ƀôn sang ƀing gơmơi mơ-ak biă hăng tŭ ư hrŏm. Tơdah tal anai ƀing gơmơi rơkâo hăng Khua pơ ala mơnuih ƀôn sang dêh čar, rơkâo hăng Ping gah ƀing ta khom ngă tui khut khă, pioh ba mơnuih hmâo pran jua, hmâo tơhnal lăng, hmâo pran jua klă, hmâo bôh thâo glông djru mơnuih ƀôn sang. Ruah ƀu djơ̆ thơ hmâo mơnuih ƀu djop pran klă, ƀu djop tơhnal lăng thơ dô̆ glăi apăn bruă mơ̆, hơdôm mơnuih hmâo tơhnal lăng, hmâo pran jua lĕ pơwot glăi plơi pla”.

Bơdjơ̆ nao tơlơi hơđong tơlơi hơdip mơda mơnuih mơnam, mơnuih pơ ala kơ mơnuih ƀôn sang lăi đĭ ăt dô̆ mơn hơdôm bôh sang anô̆ ƀun rin, sang anô̆ hmâo tơlơi hơdip mơda tơnap tap hơdip amăng sang tơ̆i, sang răm samơ̆ akă dưi čơkă mă hơdră bruă djru gum mơ̆ng Kơnuk kơna. Mơnuih pơ ala Thân Ngọc Duyến, ƀơi plơi Phước Hòa 1, să Ea Quang, tơring glông Krông Pač lăi pơthâo:

“Ƀơi să kâo hmâo sa čô ling tơhan hơđăp ră anai lĕ ruă tơtăng ară drah, 2 čô ană lĕ huyng hyuang, ƀu hmâo sang dô̆. Ƀing gơmơi lĕ ling tơhan hơđăp rơkâo kơ Jơnum min lĕ Jơnum min lăi lĕ tơring glông pơsit brơi kơ Ea Quang 9 bôh sang, ƀu dô̆ dưi pơhrua nao dong tah. Ră anai, Ling tơhan hơđăp să ƀing gơmơi pơsur pơdŏng brơi atur sang laih. Tui anun lăi pơthâo glăi khua pơ ala mơnuih ƀôn sang dêh čar lĕ, sang anai dưi pơdŏng sang mơn?”.

Hơdôm tơlơi gum pơhiăp, rơkâo đĭ mơ̆ng mơnuih ƀôn sang dưi hmâo Grŭp Khua pơ ala mơnuih ƀôn sang dêh čar hăng khua mua hơdôm Gơnong bruă, Anom bruă hăng Khua Jơnum min mơnuih ƀôn sang hơdôm bôh tơring glông ƀơi anăp lăi glăi. Hăng hơdôm tơlơi gum pơhiăp, rơkâo đĭ hloh kơ tơlơi dưi pô pơsir, Grŭp khua pơ ala mơnuih ƀôn sang dêh čar tơring čar Dak Lak pơkôl amra hơdai nao hơdôm bôh ƀirô apăn bruă anai pel ĕp, hrŏm hăng anun amra lăng tui, krăp lăng bruă pơsir pioh pơhlôm tơlơi tŭ yua lăp djơ̆ mơ̆ng mơnuih ƀôn sang.

Lơm anun, ƀơi tơring čar Lâm Đồng, Kơ-iăng Khua git gai pơ ala mơnuih ƀôn sang dêh čar Nguyễn Đức Hải hrŏm hăng grŭp hyu mă bruă hmâo mă bruă hăng tơring čar hăng Anom kơsem min put ayuh Đà Lạt kơ bruă pok pơhai Tơlơi pơtrun pơsit 57 mơ̆ng Ding jum kơđi čar hăng Tơlơi pơtrun pơsit 193 mơ̆ng Khua pơ ala mơnuih ƀôn sang dêh čar, kiăng pơplih phrâo amăng pơđĭ kyar bôh thâo phrâo măi mok hăng pơplih mrô.

Kơ-iăng Khua git gai pơ ala mơnuih ƀôn sang dêh čar lăi rơđah, bruă pơphô hơdră pơkă phara ha jăn kiăng kiăo tui tơlơi hmâo sit, pơhlôm ha amăng plĕ, ba glăi bôh tơhnal, bĕ hrŏm hrŏm hăng ngă tŭ mơ̆ng hmâo. Lâm Đồng ăt dưi pơsur mơn, tañ pơjing anom phun pơplih phrâo pơčeh phrâo, pơplih phrâo lu ngăn rơnoh, pơjing phun kơ pơđĭ kyar bôh thâo phrâo măi mok ƀơi tơring čar. Kơ-iăng Khua git gai pơ ala mơnuih ƀôn sang dêh čar Nguyễn Đức Hải brơi thâo:

“Jê̆ hăng anai, Grŭp črâo ba hmâo sa tơlơi pơtô brơi rơđah črâo ba kơ hơdôm plơi pla, hăng pran jua hrŏm lĕ, khua mua dlông hloh ƀơi tơring čar ƀơi anăp črâo ba. Jơlan hơdră khom rơđah, hmâo tơhnal pơkă, hmâo pơpha bruă jao rơđah. Ƀing ta ngă hiưm hơpă hmâo ba tơbiă hơdră kơ pô kơsem min bôh thâo, hơdră pơkă pioh pơplih phrâo ngăn rơnoh ngă tui, hăng hơdră tuh pơplai amra jing bruă đing nao hlâo. Tui anun Lâm Đồng khom hmâo anom pơplih phrâo pơčeh phrâo phara kơ bruă anai hă lui? Bruă gơgrong lĕ ƀing gơmơi amra kơsem min, ruah mă pioh lăi pơthâo glăi”.

Kiăng pok pơhai ba glăi bôh tơhnal hơdôm tơlơi pơtrun pơsit anai, Kơ-iăng Khua git gai pơ ala mơnuih ƀôn sang dêh čar ơi Nguyễn Đức Hải rơkâo tơring čar Lâm Đồng khom kiăo tui hơdôm bôh yôm črâo ba mơ̆ng dêh čar, pơhlôm dưi ngă, abih bang, pơhlôm, pơlir hơbit, ha amăng plĕ hăng hmâo tơhnal sit lăp djơ̆ hăng phara ha jăn mơ̆ng tơring čar. Bĕ čih glăi tơlơi pơsit ba truh kơčăo bruă hmâo tơhnal hrŏm hrŏm, kơƀah tơlơi dưi ngă tui. Hrŏm hăng anun, khom lăng yôm bruă gơgrong, biă ñu bruă gơgrong mơ̆ng pô apăn akô̆ amăng git gai, črâo ba pơphun pok pơhai, pel ĕp bruă ngă tui bruă jao, pơhlôm rơđah, tơpă, ba glăi bôh tơhnal hăng dưi ngă tui. Ƀu pioh hưp mă hơdră bruă, ngă rơngiă đôč, khưi khai.

Tal anai, Kơ-iăng Khua git gai pơ ala mơnuih ƀôn sang dêh čar ơi Nguyễn Đức Hải hăng Grŭp hyu mă bruă hmâo nao čuă, brơi gơnam tam dua bôh sang anô̆ gah hơdră bruă gum djru ƀuh rơđah hloh ƀơi tơring glông Đức Trọng, tơring čar Lâm Đồng, rơkâo gong gai tơring glông, hơdôm gưl, hơdôm gơnong bruă đing nao hloh dong tơlơi hơdip mơda hơdôm bôh sang anô̆ gah hơdră bruă, mơnuih djru ngă hơkrŭ đưm ƀơi tơring čar./.