VOV4.Jarai-Rơwang hrơi tơjuh rơgao, Khua git gai pơ ala mơnuih ƀôn sang dêh čar ơi Vương Đình Huệ hăng Grup khua mua pơ ala mơnuih ƀôn sang dêh čar djop tơring čar hơmâo nao bưp mơnuih ƀôn sang ruah khua hlâo kơ jơnum lok 4, tal XV či pơphun mơ̆ng lơ 20/10 pơ anăp. Ƀơi mông bưp mơnuih ƀôn sang ruah khua, mơnuih ƀôn sang lăi pơthâo, rơkâo đĭ lu tơlơi yôm, čang rơmang ƀing pơ ala mơnuih ƀôn sang đing nao hăng pơsir.

Grup khua mua pơ ala mơnuih ƀôn sang dêh čar ƀơi tơring čar Dak Nông hơmâo nao bưp laih mơnuih ruah khua pơ hơdôm să Nâm N’Jang tơring glông Dak Song, să Quảng Tâm tơring glông Tuy Đức, să Quảng Phú tơring glông Krông Nô hăng să Quảng Sơn tơring glông Dak Glong, hmư̆ mơnuih ruah khua rơkâo đĭ. Ƀơi mông bưp, ƀing khua mơnuih ƀôn sang dêh čar ƀơi Dak Nông lăi pơthâo tơlơi pơhing kơ jơnum lok 4 khua mua pơ ala tal XV him lăng pơphun amăng blan 10 anai, sem glăi lu boh yôm phun, hơdôm kơčăo bruă tơlơi phiăn dêh čar, amăng anun hơdôm tơlơi phiăn pơdjơ̆ nao jĕ giăm biă mă amăng tơlơi hơdip mơda rĭm hrơi mơnuih ƀôn sang. Anun lĕ tơlơi phiăn Mơnuih ngă pô kual plơi pla, Tơlơi phiăn lŏn tơnah čih pơkra glăi, Tơlơi phiăn pơgang mơnuih blơi yua, Tơlơi phiăn bơwih ƀong hrom.

Mơnuih ngă hmua Dak Nông čang rơmang abih yơh tơlơi koh lui –pla glăi, pla laih –koh lui

Mơnuih ruah khua tơring čar Dak Nông rơkâo đĭ lu tơlơi dŏ hơmâo ƀu găl amăng lu tơring čar, biă mă ñu tơlơi soh glăi, ƀu gêh găl, gun hĭ mă yua lŏn tơnah, pơgang glai rưng, kaih pơsir bruă ngă hră pơar pơ kual plơi pla. Mơnuih ruah khua ăt rơkâo hăng ƀing pơ ala mơnuih ƀôn sang dêh čar kiăng hơmâo jơlan hơdră tong ten hloh gah bruă ia jrao, pơtô pơjuăt; bruă tuh pơ alin čuk pơkra jơlan glông, dăng hrĕ apui lơtrik amăng kual tơnap tap….Biă mă ñu amăng bruă ngă hmua, mơnuih ruah khau rơkâo đĭ bruă anăp nao djru mơnuih ngă hmua pơklaih hĭ mơ̆ng tơlơi juăt ƀuh “Sit djơ̆ bơyan lĕ rơngiă nua”, “koh lui-pla glăi; pla giong-koh lui”. Mơnuih ruah khua ơi Lê Quang Phi, dŏ pơ să Nâm N’Jang, tơring glông Dak Song, anih pla tiu lu tơring čar Dak Nông lăi:

“Thun 2018 tiu rơngiă nua hăng djai abih, mơ̆ng anun mơnuih ngă hmua gơmơi pơblih laih pla hơdôm pơjeh phun pla pơkŏn, lu biă mă boh čroh. Tơring čar Dak Nông ăt pơdah thâo lu jơlan hơdră pla phun boh čroh kah hăng pla boh ƀơr, truh ră anai boh ƀơr lu laih samơ̆ rơnoh sĭ mơdrô ƀu yôm ôh, anun ƀu hơmâo pô blơi, glăi pơblih pla phun pla pơkŏn dơ̆ng yơh. Kâo čang rơmang ngă hiư̆m pă tơring čar Dak Nông čih pơsit anăn boh čroh kơ hơdôm pơjeh phun pla, boh čroh hơmâo rơnoh yôm kơ tơlơi bơwih ƀong huă. Laih anun hơdôm thun giăm anai gơmơi ăt hmư̆ lu tơlơi pơhing lăi man pơdong sang măi pơkra ming boh čroh pơjing mơnong ƀong, duiw djă lui sui, samơ̆ ƀuh rơđah amăng tơring glông aka ƀu hơmâo sang măi pơpă ôh ming pơkra mơnong ƀong huă".

Ăt amăng rơwang hrơi tơjuh rơgao mơ̆n, Khua git gai pơ ala mơnuih ƀôn sang dêh čar ơi Vương Đình Huệ hăng Grup pơ ala mơ̆ng ƀôn prong Hải Phòng nao bưp mơnuih ƀôn sang ruah khua ƀơi tơring glông Thủy Nguyên, ƀôn prong Hải Phòng hlâo kơ jơnum lok 4, khua mua pơ ala mơnuih ƀôn sang dêh čar tal XV. Ƀơi mông bưp, lu mơnuih ruah khua ƀơi tơring glông Thủy Nguyên, ƀôn prong Hải Phòng pơdah rai pran jua đăo kơnang, hok mơak ƀơi anăp kơ boh tơhnal pơđĭ kyar lŏn ia; ƀuh tơlơi git gai mơ̆ng Ping gah, khua mua pơ ala mơnuih ƀôn sang dêh čar, Kơnuk kơna mah tơnap tap yua klin kheng Covid 19 ngă samơ̆ git gai, pơčrâo ba bruă mă ăt hơmâo ba glăi boh tơhnal tŭ yua mơ̆n, lăp bơni biă mă. Ƀing pơ ala mơnuih ƀôn sang dêh čar hơmâo jơlan hơdră pơtrun djơ̆ găl, hmao kru pơsir tơlơi tơnap mơ̆ng mơnuih ƀôn sang hăng sang bruă sĭ mơdrô.

Khua git gai pơ ala mơnuih ƀôn sang dêh čar ơi Vương Đình Huệ bưp

 mơnuih ƀôn sang ƀơi ƀôn prong Hải Phòng

Mơnuih ruah khua ăt lăi pơthâo lu tơlơi hlăk hơmâo ră anai aka ƀu klă kah hăng čih pơkra tơlơi phiăn dêh čar, kiăng ĕp lăng tong ten, djơ̆ tong huăi ngă glah glar lu črăn ngă hră pơar, amuñ ngă tui, gêh găl kơ mơnuih ƀôn sang hăng sang bruă sĭ mơdrô; bruă čih pơkra tơlơi phiăn Pơkă lăng, pơjrao duăm ruă; Tơlơi phiăn Sem ĕp amăng bruă čih pơkra glăi; bruă mă  pơhlôm, pơgang apui ƀong sang; tơlơi mơnuih ngă nai pơtô hrăm hră tơbiă bruă, pơdơi bruă, kơƀah nai pơtô, bruă čih pơkra hơdrôm hră hrăm; pơblih rơnoh prăk blan, jơlan hơdră pioh kơ mơnuih ngă bruă čar, kơnuk kơna.

Lăi glăi tơlơi tơña mơ̆ng mơnuih ruah khua gah bruă ia jrao, amăng anun rơkâo ƀing pơ ala mơnuih ƀôn sang pơsit tong ten rơnoh ia jrao, pơdjop ia jrao pơjrao duăm ruă. Yua ră anai, mơnuih pơkă lăng hăng pơjrao duăm ruă dưi pơhlôm rơnoh prăk ia jrao lĕ ƀu hơmâo ia jrao ôh, khom nao blơi ia jrao pơ rơngiao, pơmă rơngiă prăk lu, boh nik ñu mơnuih ƀun rrin, Khua git gai pơ ala mơnuih ƀôn sang dêh čar ơi Vương Đình Huệ brơi thâo, Kơnuk kơna glăk git gai pơblih glăi khom djop ia jrao, tŭ yua hăng rơnoh hơđong:

“Khua mua pơ ala mơnuih ƀôn sang dêh čar jao laih kơnuk kơna hơmâo hơdră khom pơsir hmao kru tơlơi gun pok pơhai juă nua blơi gơnam yua gah ia jrao, pơjrao duăm ruă. Ăt hơmâo pok pơhai juă nua blơi ia jrao ƀơi Ding jum ia jrao. Ră anai glăk gir run, Kơnuk kơna, khua mua pơ ala mơnuih ƀôn sang ăt git gai djop ding jum, anom bruă ia jrao sem glăi, jŭ yap djop tơlơi pơtrun mơ̆ng anom bruă ia jrao. Kiăng tañ ngă hluh hĭ anŏ gun, pok pơhai tơpă amăng bruă wai lăng rơnoh ia jrao".

Mơnuih ruah khua lăi pơthâo tơlơi kơƀah nai pơtô hrăm hră, ƀu sa hnong pơtrun kơ bruă mă, wai lăng hơdrôm hră hrăm dŏ lu tơlơi lŭk pŭk aka ƀu găl; rơkâo ba hơdrôm hră pơtô mơ̆ng anih sa truh anih 12 jing gơnam yua kơnuk kơna pơkă nua, bĕ hĭ tơlơi sang bruă sĭ mơdrô, sang bruă in pơkra hơdrôm hră pơsit mă rơnoh hrup ră anai. Lăi glăi tơlơi anai, Khua git gai pơ ala mơnuih ƀôn sang lăi dơ̆ng:

“Amăng thun pơ anăp, khua mua jơnum min apăn bruă phun pơ ala mơnuih ƀôn sang dêh čar amra krăo lăng sa hnong bruă tôm, anun le pơblih phrâo hơdră hăng hơdrôm hră pơtô hrăm, amăng anun boh yôm phun lĕ čih pơkra, in hơdrôm hră, sĭ mơdrô hăng mă yua hơdrôm hră hrăm. Klă ƀiă brơi djop sang hră pô blơi, ba dưm amăng sang djă pioh hơdrôm hră, pơđok hră, kiăng dưi mă yua lu thun, mă yua lu gưl. Sem glăi hơdră čih pơkra in tơglit hiư̆m pă? Bruă mơnuih ƀôn sang ngă hrom pơčruh prăk blơi sĭ mơdrô hiư̆m pă? Pơ anăp anai khom ngă khut khăt yơh bruă anai”.

Hrom hăng bruă čih pơkra tơlơi phiăn dêh čar, mơnuih ruah khua amăng dêh čar hlăk dŏ čang rơmang lu tơlơi dŏ hơmâo ră anai, amra hơmâo ƀing pơ ala mơnuih ƀôn sang dêh čar pơdah thâo hăng bơkơtuai ĕp hơdră pơsir tong ten amăng mông jơnum lok 4, tal XV pơ anăp anai.

VOV Dap Kơdư-Nay Jek: Pơblang