VOV4.Jarai-Jơnum min apăn bruă pơ ala mơnuih ƀôn sang dêh čar hơmâo pơtrun jak iâu jơnum lok 3, khua mua pơ ala mơnuih ƀôn sang dêh čar tal XV, pok pơhai amăng lơ 23/5 laih anun him lăng pơđut jơnum truh lơ 17/6/2022. Hrơi blan rơgao, Grup khua mua pơ ala mơnuih ƀôn sang dêh čar ƀơi djop tơring čar amăng kual Dap Kơdư hơmâo lu mông bưp mơnuih ƀôn sang ruah khua pioh čih glăi tơlơi pơgôp hiăp, tơlơi rơkâo đĭ mơ-it kơ jơnum lok 3, khua mua pơ ala mơnuih ƀôn sang dêh čar pơsir.

Rơnuč blan 4 phrâo rơgao, ơi Phan Đình Trạc, ding kơna ding jum kơđi čar, ding kơna khul git gai ping gah dêh čar, Jhua anom bruă pơgăn tơlơi soh ƀong kông ngăn mơ̆ng gơnong dlông hrom hăng grup khua mua pơ ala mơnuih ƀôn sang dêh čar ƀơi tơring čar Lâm Đồng hơmâo nao bưp mơnuih ruah khua ƀơi să Ka Đô, tơring glông Đơn Dương. Pơ anai, mơnuih ruah khua rơkâo hăng pơgôp hiăp kơ grup khua mua pơ ala ƀơi tơring čar Lâm Đồng lu tơlơi tơnap tap kiăng djru pơsir, tơlơi aka ƀu gêh găl amăng tơring čar, tơring glông hăng kiăng Gơnong dlông đing nao pơsir hĭ.

Ơi Phan Đình Trạc nao bưp mơnuih ƀôn sang ruah khua ƀơi

 tơring glông Đơn Dương-Lâm Đồng

Tơlơi mơ̆ ană plơi pla mơnuih ruah khua gleng nao lu hloh lĕ, nua gơnam sĭ mơdrô đĭ na nao. Amăng anun, nua gơnam đang hmua, gơnam mă yua ngă hmua đĭ pơmă đơi, lơ̆m anun boh troh đang hmua ba sĭ mơdrô lĕ rơgêh, ngă kơ bruă ngă hmua pla pơjing amăng kual pla añăm pơtam phun bưp tơlơi tơnap tap prong. Mơnuih ruah khua Phan Tùng Châu, dŏ pơ plơi Nghiã Hiệp 2, să Ka Đô lăi:

"Ră anai gơnam yua mă bruă ngă hmua pơmă đơi, bơhmutu sa kơsăk kmơ̆k hơbâo pruai sĭ 1.250.000 prăk, hlâo kơ anun kơnong 950 rơbâo prăk đôč sa kơsăk, bơ gơnam sĭ mơdrô añăm pơtam rơ̆k tơ̆k djop mơta ba sĭ mơdrô rơgêh laih anun ƀu hơđong ôh. Rơkâo kơnuk kơna, djop gưl ngă hiư̆m pă djru ngă hơđong nua gơnam sĭ mơdrô mă bruă đang hmua laih anun ngă hơđong nua gơnam sĭ mơdrô boh troh kiăng mơnuih ƀôn sang gơmơi hơmâo anŏ kơnang, tơki”.

Ƀơi mông jơnum bưp anun, pơ ala kơ grup khua mua pơ ala tơring čar Lâm Đồng, ơi Phan Đình Trạc-Khua anom bruă pơgăn tơlơi hưp ham ƀong kông ngăn mơ̆ng Gơnong dlông čih pioh hơdôm tơlơi pơgôp hiăp, tơlơi rơkâo mơ̆ng ană plơi pla mơnuih ruah khua. Grup khua mua pơ ala čih pioh pơƀut glăi abih tơlơi rơkâo, mơ-it kơ djop sang bruă hơmâo tơlơi dưi ĕp glăi hăng pơsir, kơnong hơdôm tơlơi rơgao tơlơi dưi, grup pioh lăi pơthâo hăng khua mua pơ ala mơnuih ƀôn sang dêh čar jơnum lok pơ anăp anai.

“Abih bang ring bruă čar amăng tơring glông, tơring čar, truh pơ să, plơi pla lêng kơ bơwih brơi mơnuih ƀôn sang yua hrom soh. Čang rơmang mơnuih ƀôn sang thâo hluh hăng djru hrom tơlơi tơnap mơ̆ng khua mua gong gai kơnuk kơna ƀơi tơring glông. Ngă hrom tơlơi pơgôp hiăp anai kiăng mơnuih ƀôn sang hăng gong gai kơnuk kơna djru pơphun bruă hăng ngă tui. Kâo rơkâo khua mua tơring glông, khua mua tơring čar laih anun lu anom bruă ĕp glăi hơdră mă bruă lăng lăng pơsir djơ̆ lăp laih anun ngă gêh găl kơ mơnuih ƀôn sang lu hloh”.

Mơnuih ƀôn sang ruah khua ƀơi Dak Lak rơkâo đĭ lu boh yôm phun kơ jơnum lok 3

Rơnuč blan 4 rơgao, Grup khua mua pơ ala ƀơi tơring čar Dak Lak ăt hơmâo jơnum nao bưp mơnuih ƀôn sang hlâo kơ jơnum lok 3, tal XV. Ƀơi anih nao bưp, mơnuih ƀôn sang ruah khua ƀơi Dak Lak lêng rơkâo kơ ƀing pơ ala mơnuih ƀôn sang, Kơnuk kơna ăt kơtưn pok pơhai tŭ yua hloh hơdră pơhlôm, pơgang klin Covid 19, hrom hăng anun rŭ glăi tơlơi bơwih ƀong huă mơnuih mơnam amăng tơring čar; hơmâo hơdră kơtang hloh kiăng ngă hơđong nua sĭ mơdrô laih anun djru pơsir brơi bruă pơkra ming sĭ mơdrô mơ̆ng djop sang bruă mơdrô hăng mơnuih ƀôn sang.

Bơngơ̆t kơ nua lŏn tơnah đĭ kơtang, rung răng sĭ mơdrô lŏn tơnah thun blan rơgao amăng kual arăng či tuh pơ alin kơčăo bruă pơprong lơ̆m plơi prong Ƀuôn Ma Thuôt laih anun treng gah, mơnuih ruah khua ơi Bùi Minh Bảo, thôn2A, să Êa Mnang, tơring glông Čư̆ Mgar rơkâo đĭ tui anai:

“Blung hlâo lĕ khom pôr pơthâo akŏ bruă pơkă hnong kơ rĭm plơi pla, tơring čar, rĭm kual mơnuih ƀôn sang dŏ kiăng hơđong ăt kah hăng krăo lăng mơ̆ng mơnuih ƀôn sang kiăng arăng huăi pôr pơthâo tơlơi pơhing tă tăn ƀu djơ̆ hăng anŏ pơkă hnong mơ̆ng anom bruă kơnuk kơna. Kơ tơlơi kiăng biă mă, mơnuih ƀôn sang rơkâo ngă hmua samơ̆ ră anai ƀing mơdrô gơñu hyu blơi abih lŏn hong pioh man pơdong ngă bruă gơñu.

Ƀing kiăng kơ lŏn lĕ ƀu hơmâo lŏn, ƀing ƀu kiăng hyu blơi abih, ngă huač soh sel dram gơnam kông ngăn dêh čar. Yua kơ anun, rơkâo kơ kơnuk kơna hơdôm anom bruă hơmâo tơlơi dưi khom pơgăn tơlơi arăng hyu blơi lŏn pơkong lui pioh pơđĭ nua sĭ mơdrô, kiăng pơgang tơlơi rơnuk rơnua hơđong kơ mơnuih ƀôn sang laih anun kơ dêh čar”.

Ƀơi mông jơnum, mơnuih ruah khua đing nao hăng rơkâo đĭ lu biă mă ñu lĕ pơdjơ̆ nao rŭ glăi tơlơi bơwih ƀong huă hăng pơđĭ kyar bơwih ƀong huă mơnuih mơnam; pơdah thâo lu hơdră lăp djơ̆ hloh kiăng ngă hơđong nua sĭ mơdrô, hơđong anih anom sĭ mơdrô laih anun pơsir tơlơi tơnap tap kơ bruă ngă hmua, sĭ mơdrô mơ̆ng anom bruă mơdrô hăng mơnuih ƀôn sang tơdơi kơ abih klin Covid 19. Mơnuih ƀôn sang ruah khua ơi Lê Văn Lập dŏ ƀơ thôn 3, să Êa Mnang, tơring glông Čư̆ Mgar rơkâo đĭ tui anai:

“Tơlơi pơhing Covid 19 hăng tơdơi kơ Covid 19 tơlơi hơdip mơda mơnuih ƀôn sang ăt dŏ tơnap tap đôč. Hrom hăng anun, tơlơi  tơnap mơ̆ng hlâo, pơrơkua tơlơi tơnap phrâo dơ̆ng yua kơ lu mơta gơnam tuh kơ bruă đang hmua đĭ nua na nao kah hăng sa tơlơi tơnap hloh kơ mơnuih ƀôn sang. Klâo lĕ, nua gơnam boh troh đang hmua lĕ đĭ trun ƀu hơđong, prăk sĭ ƀu djop tla prăk čan.

Rơkâo kơnuk kơna hơmâo hơdră ngă hiư̆m pă rŭ glăi tơlơi bơwih ƀong huă pơsir tơlơi tơnap kơ mơnuih ƀôn sang. Sang bruă prăk ăt ngă gêh găl djru mơnuih ƀôn sang hơmâo prăk čan amuñ hloh pioh mơnuih ƀôn sang hrưn đĭ amăng tơlơi hơdip mơda”.

Hrom hăng anun, mơnuih ruah khua tơring čar Dak Lak ăt rơkâo djop gưl anom bruă ăt ngă gêh gal djru hlâo hloh pơsir bruă mă, čan prăk pơđĭ kyar pơkra ming amăng kual; gleng nao tuh pơ alin, ming pơkra glăi jơlan glông amăng plơi prong hăng djop să yua dah ră anai lu črăn jơlan răm tui laih; kiăng pơtong glăi pok pơhai tŭ yua hloh hơdôm hơdră rŭ glăi tơlơi bơwih ƀong huă mơnuih mơnam amăng tơring čar, boh nik ñu amăng kual plơi pla mơnuih ƀôn sang djuai ƀiă; ĕp lăng, krăo lăng rơnoh prăk tuh pơ alin hăng bruă mă juă nua tuh pơ alin djơ̆ tơlơi phiăn, blơi gơnam yua gah bruă ia jrao hăng bruă pơtô hrăm.

Nay Jek: Pơblang