Rơwang hrơi tơjuh rơgao, ding kơna ding jum kơđi čar, ding kơna khul git gai ping gah dêh čar, Khua anom bruă pơgăn ƀong kông ngăn dêh čar, ơi Phan Đình Trạc hrŏm hăng grup khua mua pơ ala mơnuih ƀôn sang dêh čar tơring čar Lâm Đồng hơmâo nao bưp mơnuih ƀôn sang ruah khuạing mơnuih ngă khua, ƀing apăn bruă kơnuk kơna ƀơi plơi prong Đà Lạt. Hrŏm hăng hơdôm tơlơi pơgôp hiăp lăi nao kơ rơnoh prăk blan, prăk pơhrua ngă khua dŏ aset đơi, mơnuih ruah khua ƀơi plơi prong Đà Lạt, Lâm Đồng đing nao biă mă kơ bruă pơgăn hưp ham ƀong kông ngăn. Mơnuih ruah khua anăn Lê Xuân Ninh pơgôp hiăp tui anai:

“Hơdôm thun giăm anai, bruă mă pơhlôm tơlơi hưp ham ƀong kông ngăn tŭ yua. Khă tui anun, lu anih dŏ hơmâo tơlơi pơphun bruă mă, ăt tơmâo hơdôm anih ngă bruă aka ƀu klă ôh. Rơkâo pơđĭ tui bruă mă pơgăn tơlơi soh hưp ham ƀong kông ngăn khut khăt, tong ten hăng kơtang hloh. Lơ̆m phat kơđi lu tơlơi soh ƀong kông ngăn, kâo rơkâo lĕ khom pơhrui mă glăi abih dram gơnam kông ngăn mơ̆ng Kơnuk kơna yua ƀing ƀong kông ngăn ngă rơngiă”.

Pơhiăp ƀơi mông bưp mơnuih ruah khua, ơi Phan Đình Trạc, ding kơna ding jum kơđi čar, ding kơna Khul git gai ping gah dêh čar, Khua anom bruă pơgăn hưp ham ƀong kông ngăn gơnong dlông lăi lĕ, hơdôm tơlơi pơgôp hiăp hăng tơlơi rơkâo mơ̆ng mơnuih ruah khua lăi pơthâo djơ̆ soh. Grup khua mua pơ ala mơnuih ƀôn sang dêh čar ƀơi tơring čar Lâm Đồng amra čih pioh, pơƀut glăi hăng mơ-it đĭ amăng mông jơnum khua mua pơ ala mơnuih ƀôn sang dêh čar jơnum pơ anăp sem glăi. Kơnong kơ bruă pơgăn tơlơi hưp ham ƀong kông ngăn dêh čar, ơi Phan Đình Trạc brơi thâo, mơ̆ng akŏ thun truh ră anai, đơ đam dêh čar hơmâo tơgŭ kơđi, pel ĕp abih bang 1.800 kơđi tơlơi, hăng 3.493 čô mơnuih ngă soh hưp ham ƀong kông ngăn, soh glăi amăng bruă bơwih ƀong huă hăng bruă ngă khua, đĭ tui 63,8% mrô kơđi tơlơi hăng 44,8% mrô mơnuih ngă soh pơkă hăng thun hlâo. Bruă mă pơgăn hưp ham ƀong kông ngăn hlăk pok pơhai ngă tui khut khăt, ƀu pơdơi ôh, ƀu hlơi ƀu dưi ƀudah anih arăng kom ôh. Ơi Phan Đình Trạc lăi:

“Amăng lu kơđi tơlơi giăm anai, jơlan hơdră brơi sem glăi, jŭ yap abih, pơgăn dram gơnam kông ngăn, rơnoh prăk kăk amăng sang bruă prăk ăt guang dar abih pioh jao kơ Khul git gai bruă pơgăn hưp ham ƀong kông ngăn git gai ngă tui dơ̆ng mơ̆ng akŏ thun anai laih anun jai hrơi hơmâo ba glăi boh tŭ yua. Sa tơlơi phrâo hloh lĕ amăng 4 blan akŏ thun bruă pơgăn hưp ham ƀong kông ngăn, mơ̆ng bruă tơgŭ kơđi truh kơ bruă ngă soh bơwih ƀong huă ƀu gưt duh jia, ngă soh amăng bruă pơphun juă nua sĭ mơdrô, blơi gơnam pơprong, ngă soh amăng bruă wai lăng mă yua lŏn mơnai glai klô, ngă rơngiă dram gơnam kông ngăn kơnuk kơna….anom bruă sem kơđi hơmâo pel ĕp tong ten, ngă rơđah hơdôm tơlơi soh sat ƀong kông ngăn djơ̆ hăng bruă ngă tŭ yua hloh”.

Ăt amăng rơwang hrơi tơjuh rơgao, Grup khua mua pơ ala mơnuih ƀôn sang dêh čar tơring čar Dak Lak hơmâo mông mă bruă hăng jơnum min mơnuih ƀôn sang tơring čar Dak Lak hăng anom bruă amăng tơring čar. Ƀơi mông mă bruă, ƀing khua mua pơ ala djop gơnong bruă amăng tơring čar Dak Lak hơmâo lăi pơthâo lu tơlơi tơnap tap hăng rơkâo gơnong dlông sem glăi, pơsir hĭ anŏ ngă gun pioh pơtrut pơđĭ kyar bơwih ƀonghuă mơnuih mơnam ƀơi tơring čar pơ anăp. Amăng anun, tơlơi đing nao hlâo hloh lĕ pơkra jơlan glông nao rai pơtruh nao rai djop anih amăng kual, amăng lăm kual Dap Kơdư. Ơi Võ Ngọc Tuyên, Khua Gơnong bruă Man pơpha hăng tuh pơ alin tơring čar Dak Lak rơkâo:

“Amăng mông jơnum lok anai khua mua pơ ala mơnuih ƀôn sang amra pơsit lu jơlan hơdră tuh pơ alin čuk pơkra jơlan rơdêh đuăi hmar Gia Nghĩa –Chơn Thành amra hơmâo anŏ tŭ yua, dua lĕ kiăng ngă djơ̆ anŏ kiăng mơ̆ng mơnuih ƀôn sang kual Dap Kơdư, ăt amra rơkâo ba lu črăn jơlan mơ̆ng Ƀuôn Ma Thuôt hăng Gia Lai laih anun mơ̆ng Gia Lai nao pơ Gia Nghĩa tuh pơ alin čuk pơkra mơ̆ng ră anai truh thun 2030. Hlâo adih hơmâo hơdră bruă čuk pơkra jơlan rơdêh đuăi hmar Việt Nam, amăng hơdră bruă čuk pơkra tơdơi kơ 2030. Ƀing ta kiăng dăp glăi akŏ klôn bruă mă, anŏ pơpă kiăng đing nao hlâo thun 2030, hnun kah čuk pơkra pơtruh nao rai plah wah djop arăt jơlan rơdêh đuăi hmar amăng kual Dap Kơdư”.

Pơdjơ̆ nao kơ bruă ngă tui hơdôm hơdră bruă tơhnal pơkă mơ̆ng dêh čar, lu tơlơi pơgôp hiăp rơkâo ƀing pơ ala mơnuih ƀôn sang sem glăi hăng git gai djop ding jum, anom bruă jŭ yap glăi abih hră pơar tơlơi phiăn pơkă kiăng huăi pơrơkua nao rai. Ơi Đỗ Đức Hà, Kơ-iăng Khua Gơnong bruă Tơlơi phiăn tơring čar Dak Lak  lăi rơđah:

“Ƀuh rơđah hơdră mơ̆ng dêh čar pơtrun djơ̆ biă ñu ƀu kơnong kơ hră pơar pơtrun tui tơlơi phiăn pơkă đôč ôh, samơ̆ pioh pok pơhai ngă tui lĕ tơring čar ngă hră pơar pơtrun brơi ngă tui, bruă anai khom ngă tui djơ̆ tơlơi phiăn pơkă rơđah rơđong samơ̆ ƀu bơkơđai glăi hăng tơlơi phiăn. Mah hnun ră anai hlăk ngă tui hơdră pơtrun mơ̆ng dêh čar, ƀing ta khom čih pơkra glăi brơi gêh găl tŭ ư hrŏm sa hnong”.

Ƀơi mông mă bruă, ƀing pơ ala nao jơnum ăt rơkâo hăng lu boh yôm phun pơdjơ̆ nao amăng lu bruă kah hăng : kông ngăn amăng gŭ lŏn, pơhlôm nua, tơlơi phiăn, pơblih rơnoh prăk blan, sang dŏm păk djru mơnuih mă bruă apah, mrô mơnuih mă bruă sit nik amăng gơnong bruă pơtô hrăm, bruă mă pơkă hnong, bruă mă yua lŏn…Grup khua mua pơ ala mơnuih ƀôn sang dêh čar tơring čar Dak Lak čih pioh, pơƀut hĭ abih tơlơi pơgôp hiăp anun ba pơdah đĭ kơ khua mua pơ ala mơnuih ƀôn sang dêh čar hăng djop ding jum anom bruă sem glăi hăng pơsir.