VOV4.Jarai - Ƀơi tơlơi pơtrun mrô 08 pơtrun lơ 28/3, Kơnuk kơna pơsit djru rim čô mơnuih 500.000 prăk/ blan , hrơi blan djru lu hloh 3 blan, hăng ƀing mă bruă amăng anom bơwih ƀong kual sang măi, pơkra gơnam, ƀudah amăng kual bơwih ƀong phun glăk apah dŏ sang arăng (juăt iâu sang trọ) mơng lơ 1/2 truh lơ 30/6. Ơi Vũ Trọng Bình, Khua anom wai lăng bruă mă (Ding jum Mơnuih mă bruă tơhan rơka hăng mơnuih mơnam) brơi thâo: pô hlơi mă bruă amăng anom bơwih ƀong, anih sĭ mơdrô, pơkra gơnam hăng hơmâo kĭ hră ngă bruă mơng 1 blan truh kơ lu hloh, laih dong glăk apah mă sang arăng, amra hơmâo djru ba soh, ƀu thâo ruai kơ hră mă bruă jăng jai ƀudah mă bruă sit nik ôh. Ăt tui hăng ơi Bình mơn, him lăng, prăk djru tui tơlơi pơtrun 08 mơng Kơnuk kơna kơ djru prăk apah sang dŏ kơ mơnuih mă bruă hơmâo năng ai 3 klăk 500 rơbâo čô mơnuih hăng mrô prăk kơnuk kơna brơi lĕ 6.600 klai.

Siu H’Mai: Pơblang