Amăng mông bưp mơnuih ƀôn sang ƀơi phường 4, plơi prong Đà Lạt, ƀing khua pơ ala mơnuih ƀôn sang tơring čar Lâm Đồng hmư̆ tơlơi pơgôp hiăp mơng mơnuih ƀôn sang kơ hơdôm bruă akŏ phun, sit biă ñu lĕ hơdôm tơlơi tơnap tap amăng tơlơi hơdip mơda, anih dŏ, rơdêh nao rai mơng ƀing apăn bruă, mơnuih mă bruă tơdơi kơ pơmut hrŏm tlâo boh tơring čar Lâm Đồng, Dak Nông, Bình Thuận. Rơngiao kơ tơlơi tơnap lơm đuăi nao rai, bruă ĕp brơi anih dŏ ăt lĕ bruă glêh glar mơn, kiăng tơring čar Lâm Đồng tañ hơmâo hơdră pơsir hĭ. Ơi Hồ Trung Hiếu brơi thâo:

“Kâo bơngŏt biă mă lơm giăm 2.000 čô mơnuih apăn bruă mơng dua boh tơring čar Dak Nông hăng Bình Thuận glăi mă bruă, yua kơ bruă dưm dăp, djru brơi ƀing apăn bruă anai hiưm pă ñu. Lơm ƀing apăn bruă glăi mă bruă, bruă nao rai bưp tơnap tap mơn, anun kiăng dŏ glăi pơ Đà Lạt, tơdah dŏ glăi sui amra kiăng hơmâo anih dŏ. Kâo čang rơmang tơring čar Lâm Đồng hơmâo jơlan gah hăng hơdră bruă ječ kiăng pơsir hĭ. Ră anai, tui kâo hmư̆ hing Lâm Đồng-Đà Lạt man pơdong sang dŏ mơnuih mơnam dŏ kaih, lơm ƀing apăn bruă, mơnuih mă bruă glăk kiăng anih dŏ lu biă mă”.

Lăi glăi tơlơi tơña mơng mơnuih ƀôn sang, ơi Nguyễn Ngọc Phúc, kơ-iăng Khua Jơnum min mơnuih ƀôn sang tơring čar Lâm Đồng brơi thâo, tơring čar hơmâo laih hơdră prap lui kơ bruă anai.

“Ră anai, ƀing gơmơi glăk pel ĕp giăm 10 anih kiăng ƀing apăn bruă hơdôm boh tơring čar rai mă bruă. Anih dŏ brơi ƀing apăn bruă ăt glăk ĕp mơn kiăng pơhlôm brơi adơi ayong hơmâo anih dŏ hơđong. Rơdêh nao rai, ƀing gơmơi him lăng tơdah rơdêh 50 čô mơnuih đĭ, Dak Nông kiăng giăm 10 boh rơdêh yua ha wŏt, pơgiăng nao rai amăng hrơi tơjuh ƀudah hrơi sa kiăng adơi ayong nao mă bruă, Bình Thuận ăt kiăng hơpluh hơdôm, dua hơpluh boh rơdêh. Ƀing gơmơi ăt rơkâo kơnuk kơna hơmâo hơdră djru brơi prăk kak kơ ƀing apăn bruă lơm đuăi nao rai. Tơring čar amra git gai hơdôm gơnong bruă mă bruă kiăng hơmâo rơdêh đuăi nao rai amăng mông pơkă brơi ƀing apăn bruă nao mă bruă pơ tơring čar Lâm Đồng”.

Ăt đing nao kơ bruă pơmut anih anom bruă mă gưl tơring čar, mơnuih ƀôn sang plơi prong Vị Thanh, tơring čar Hậu Giang lăi pơthâo kơ bruă anai hăng Khua git gai pơ ala mơnuih ƀôn sang dêh čar ơi Trần Thanh Mẫn amăng mông bưp. Trần Văn Trung dŏ amăng să Long Mỹ brơi thâo:

“Mơnuih ƀôn sang hur har, đăo gơnang nao Ding jum kơđi čar, Khul apăn bruă Ping gah, Khua pơ ala mơnuih ƀôn sang dêh čar, Kơnuk kơna amra git gai truh kih bruă ngă hơbot anih anom kơđi čar. Ngă pơtrut pơđĭ kyar bơwih ƀong huă, hơkrŭ wai pơgang rơnuk rơnua, hrưn đĭ tơlơi hơdip kơ mơnuih ƀôn sang”.

Tui amai Nguyễn Thị Kim Trúc dŏ amăng plơi prong Vị Thanh, bruă ngă anai ƀu djơ̆ kơnong djru ngă hơbot anih anom mă bruă đôč ôh mơ̆ ăt pơtrut kah pơpha, jao tơlơi glăm ba prong ƀiă, ngă gêh gal brơi gong gai ƀon lan tŏ tui tơlơi gơgrong amăng bruă git gai wai lăng.

“Anăp nao pơjing anih anom kơđi čar hơbot, mă bruă klă, pơhlôm mut hrŏm amăng tơlơi git gai, wai lăng, lăp djơ̆ hăng tơlơi rơkâo pơđĭ kyar mơng lŏn ia amăng rơnuk phrâo. Tơlơi anai ăt lăp djơ̆ hăng jơlan gah pơplih phrâo anih anom mơng hơdôm boh dêh čar amăng rŏng lŏn tơnah”.

Tŭ mă tơlơi pơgôp hiăp mơng mơnuih ƀôn sang, Khua git gai pơ ala mơnuih ƀôn sang dêh čar ơi Trần Thanh Mẫn lăi pơthâo hăng mơnuih ƀôn sang hơdôm hơdră bruă mơng Ping gah amăng ngă hơbot anih anom mă bruă. Khua git gai pơ ala mơnuih ƀôn sang dêh čar lăi pơtong, anai lĕ bruă ngă hơkrŭ prong prin aka ƀu hơmâo ôh hlâo anun kiăng ngă hơbot anih anom mă bruă, pơhlôm anih anom mă bruă klă, tŭ yua. Bruă ngă hơbot anih anom mă bruă amra pơtrut tuh pơ alin bơwih ƀong huă-mơnuih mơnam, pơhlôm bruă wai pơgang rơnuk rơnua kiăng pơjing anih anom kơđi čar mă bruă rơđah hơđông, hơđong kjăp.

“Bruă ngă hơbot anih anom mă bruă kiăng ƀing ta pơtrut tuh pơ alin pơđĭ kyar. Pơ anăp anai amra mơ-it nao Khua pơ ala mơnuih ƀôn sang dêh čar thun 2025-2026 amra hrŏm truh prăk duh hrăm hră 30 rơbâo klai. Ră anai glăk pơčrông sai amăng sang hră kơnuk kơna pơdong, ăt dưi pok prong gah rơngai sang anŏ kơnuk kơna pơdong, kơ bruă anai pơ anăp kiăng đing nao. Tom brơi bưq mơnuih ƀôn sang, Khua git gai Ping gah ơi Tô Lâm rơkâo Hà Nội blan 9 anai djru prăk brơi ƀing čơđai sang hră ƀong huă yang hrơi dong. Anai lĕ hơnong pơkă mơng Ping gah, Kơnuk kơna kiăng gơgrong bơwih brơi mơnuih ƀôn sang kơ tơlơi hơdip mơda”.

Mông bưp mơnuih ƀôn sang ƀơi tơring čar Lâm Đồng hăng Hậu Giang pơdah tong ten tơlơi đing nao, tơlơi pơmĭn mơng mơnuih ƀôn sang ƀơi anăp kơ bruă pơplih anih anom mă bruă, laih dong mơ-it nao tơlơi đăo gơnang tơlơi črâo trun, hơdră bruă mơng Ping gah, Kơnuk kơna. Pran jua pơplih phrâo, ngă hơbot anih anom lĕ hơdră bruă yôm phun kiăng hrưn đĭ tŭ yua amăng bruă wai lăng kơnuk kơna. Hơdôm tơlơi pơgôp hiăp abih pran jua mơng mơnuih ƀôn sang amra jing tơlơi pơtrut phun kiăng pơplih anih anom hơmâo pok pơhai tŭ yua, sit nik, kiăng lŏn ia pơplih phrâo hăng pơđĭ kyar djop mơta amăng rơnuk phrâo./.