VOV4.Jarai - Mơmot anai lơ 28/4, Khul ia jrao kyâu bơrơkal mriah dêh čar Việt Nam gum hrom hăng Jơnum min mơnuih ƀôn sang tơring čar Thừa Thiên Huế amra pơphun ngă Lơphet pok phun Blan gum djru khăp păp thun 2022 hăng anăn ñu “Pơkĕ hrom plơi pla – Ngă lar hyu bruă gum djru khăp păp” hăng hơdor glăi Hrơi Khul ia jrao bơrơkal mriah hăng Blan ƀang mriah jar kơmar (8/5). Blan gum djru khăp păp thun 2022 pok pơhai amăng blan 5, hăng hơdôm bruă mă prong hloh djru mơnuih ƀôn sang tơnap tap mơng lơ 8/5 truh lơ 19/5. Amăng mông ngă lơphet Blan gum djru khăp păp thun 2022, Khul ia jrao kyâu bơrơkal mriah dêh čar Việt Nam pok phun dua Jơlan hơdră phun pok pơhai amăng 5 thun pơ̆ anăp, anun lĕ: Jơlan hơdră: “Pơhlôm rơnuk rơnua kơ mơnuih ƀôn sang ƀun rin, tơnap tap hyu mă akan hơdang” hăng “Mơnong ngă bơbuă kơ čơđai muai ƀun rin, ƀu klă drơi jăn” amăng abih bang glông bruă Khul. Jơlan hơdră amra ƀơk brơi tal blung a kơ 14 bôh tơring čar, ƀôn prong gah kual Tŏng krah dêh čar; pơphun Sang čơ khăp păp kơ mơnuih ƀôn sang tơnap tap bơbeč djơ̆ yua ayuh hyiăng ƀu klă ngă, klin ruă ngă./.

Siu H’ Prăk: Pơblang