VOV4.Jarai - Sa bruă hơmâo mơnuih ƀon sang lăp đing nao amăng rơwang hrơi tơjuh rơgao, anun lĕ bruă blung a Jơnum min khua git gai pơ ala mơnuih ƀon sang dêh čar pơgôp hiăp kơ Tơlơi phiăn lŏn tơnah (pơplih pơkra). Anai jing Tơlơi phiăn prong, yôm biă mă, bơdjơ̆ nao dlăm amăng tơlơi hơdip mơda bơwih ƀong - mơnuih mơnam mơng lŏn ia ta. Ƀơi mông jơnum, Jơnum min khua git gai pơ ala mơnuih ƀon sang dêh čar kiăng ngă rơđah bruă mă glăi lŏn pioh pơđĭ kyar bơwih ƀong - mơnuih mơnam yua tơlơi klă hiam, gêh gal kơ dêh čar, kơ mơnuih tơpuôl. Laih dong, kiăng lăng nao kơ prăk mă yua gah lŏn ia; biă ñu pơgăn tơlơi soh sat, ngă bruă kiăng klă mă pô đôč amăng bruă čih pơkra tơlơi phiăn.

Bruă čih pơkra Tơlơi phiăn lŏn tơnah kiăng ngă pơgiong tơlơi phiăn gah lŏn tơnah, pơsir bruă ngă bơrơkua nao rai, ƀu djơ̆ hrŏm amăng jơlan ngă bruă, tơlơi phiăn bơdjơ̆ nao lŏn tơnah. Pơhlôm ngă dưm kơnar tơlơi dưi hăng tơlơi klă hiam mơng Kơnuk kơna, mơnuih mă yua lŏn hăng pô tuh pơ plai. Rơđah rơđông, rơnuk rơnua anih sĭ mơdrô lŏn tơnah. Laih dong pơtrut tơlơi dưi mơnuih ƀon sang, plai ƀiă hơmâo bruă tơgŭ kơđi gah lŏn tơnah.

Ƀơi mông jơnum, Khua Jơnum min Tơlơi phiăn Lê Thị Nga kiăng pơsit rơđah hơdôm tơlơi pơkôl pơkă gah bruă Kơnuk kơna mă pơhrui glăi lŏn tơnah pioh pơđĭ kyar bơwih ƀong huă - mơnuih mơnam yua tơlơi gêh gal, klă hiam kơ lŏn ia, mơnuih ƀon sang kiăng huăi hơmâo pô hmao mă ngă ƀu klă, pơhrui glăi lŏn tơket tơkeng, ƀu djơ̆ tơlơi pơtrun, pơhlôm klă brơi pô hơmâo kơnuk kơna mă glăi lŏn. Biă ñu, pơhrui glăi lŏn pioh man pơdong kual plơi prong, kual sang dŏ:

“Bruă anai kiăng hơmâo tơlơi pơčrông sai, bơrơƀih nao rai kơplah wah ană plơi hăng anom bơwih ƀong tui hăng tơlơi pơtrun mrô 18. Tơlơi pơtrun mrô 18 pơsit ngă tui tơlơi phiăn bơlăi nao rai kơplah wah ană plơi hăng anom bơwih ƀong amăng bruă jao glăi lŏn tơnah pioh man pơdong plơi prong, sang dŏ pioh sĭ mơdrô. Tơlơi anai ƀu pơmut amăng bruă mă glăi lŏn ôh mơ̆, tơlơi anai kiăng hơmâo tơlơi bơkơtuai, mă gai djai hiăp mơng ană plơi hăng anom bơwih ƀong”.

Khua Jơnum min tơlơi phiăn yă Lê Thị Nga đĭ pơhiăp.

Lăi pơthâo glăi ƀơi mông jơnum, Khua ding jum Kông ngăn lŏn tơnah hăng ayuh hyiăng Trần Hồng Hà brơi thâo, glăk čih pơkra tơlơi pơkă hăng bruă Kơnuk kơna mă glăi lŏn pioh pơđĭ kyar bơwih ƀong huă - mơnuih mơnam yua tơlơi klă hiam kơ lŏn ia, mơnuih ƀon sang, tơdah ƀu dưi pơsit rơđah hăng mrô lĕ amra hơmâo hơdră jŭ yap:

“Ƀing gơmơi thâo laih, hơdră jŭ yap aka ƀu djơ̆ tui pran mơn. Dua lĕ tơlơi pơkă hiư̆m pă kiăng thâo hluh klă kơ dêh čar, klă kơ mơnuih ƀon sang lĕ khŏm sem lăng rơđah hloh. Bruă anai gơmơi amra pơhmư̆ tui, pioh mông lăng glăi dong. Hăng hơdôm bruă ƀing ta lăi nao tơlơi klă hiam kơ lŏn ia, kơ mơnuih ƀon sang ƀing ta črâo pơƀuh rơđah hơdôm tơlơi ƀing ta kiăng lăi. Bơhmutu ră anai kiăng hơmâo mrô lŏn kiăo tui glông jơlan čih mă glăi, kiăng juă nua ba sĭ, laih anun mă mrô lŏn anai pơđĭ kyar pơkra jơlan”.

Pơhiăp ƀơi mông jơnum, Khua git gai pơ ala mơnuih ƀon sang dêh čar ơi Vương Đình Huệ lăi, Tơlơi phiăn lŏn tơnah (pơplih pơkra glăi) jing tơlơi phiăn yôm biă, bơdjơ̆ nao prong kơ bruă pơđĭ kyar bơwih ƀong huă - mơnuih mơnam. Lăng yôm bruă prăp lui čih pơkra tơlơi phiăn, Khua git gai pơ ala mơnuih ƀon sang dêh čar pơtă pơtăn kơ anom bruă čih tơlơi phiăn lăng glăi tŏng ten, pơhlôm tơlơi dưi, tơlơi gêh gal kơ abih bang. Biă ñu pơgăn bruă ngă soh, ngă bruă kiăng klă kơ pô đôč amăng hrơi blan čih tơlơi phiăn:

“Pơplih pơkra, pơhrua tui tơlơi pơkôl pơkă kiăng pơsir hĭ hơdôm tơlơi aka ƀu djơ̆, samơ̆ khŏm pơhlôm gêh gal kơ abih bang, sui thun. Khut khăt anăm pioh hơdôm tơlơi soh glăi glăk hơmâo ră anai pơmut amăng tơlơi phiăn jing djơ̆. Pơgăn tơlơi soh glăi, kiăng klă mă hơjăn amăng mông čih pơkra tơlơi phiăn hăng hơdôm bruă hơmâo sit nik samơ̆ bruă anun anet đôč, ƀu djơ̆ nao bruă kiăng ngă mơng sa, dua čô mơnuih pơpă thơ. Hăng pran jua yua anŏ klă kơ dêh čar, kơ mơnuih ƀon sang,gêh gal kơ anom bơwih ƀong, tơlơi dưi hăng tơlơi gal mơng rim čô mơnuih”.

Ơi Vương Đình Huệ git gai bruă kiăng ngă lơ̆m pơkra tơlơi phiăn khŏm kah phara lŏn tơnah kơnuk kơna hrŏm hăng lŏn tơnah hơjăn mơnuih ƀon sang.

Anai jing tơlơi phiăn pơgôp hiăp blung a, him lăng amra pơdah pơ Khua git gai pơ ala mơnuih ƀon sang dêh čar sem lăng, pơgôp hiăp blung a ƀơi Jơnum lok 4 pơ anăp, laih anun amra hơmâo sem lăng, pơsit brơi tơdơi kơ 3 wơ̆t jơnum. Tơlơi phiăn lŏn tơnah (pơkra glăi) amra pơsit brơi Tơlơi pơtrun mrô 18 mơng Khul khua gum bruă git gai Ping gah kơ bruă pơplih phrâo, ngă pơgiong tơlơi phiăn, pơđĭ tui tơlơi klă amăng bruă wai lăng hăng mă yua lŏn tơnah, ba lŏn ia ta jing dêh čar đĭ kyar hơmâo prăk pơhrui lu.

VOV 1: Čih - Siu H’Mai: Pơblang