VOV4.Jarai - Lăi pơthâo glăi ƀơi mông ngă rơđah kơ bruă pơtô hrăm amăng hrơi mông hơmâo klin Covid-19 yua Jơnum min gru grua, pơtô hrăm mơng Ƀirô khua git gai pơ ala mơnuih ƀon sang dêh čar pơphun, amăng tlam lơ 25/2, Ding jum pơtô hrăm lăi pơƀut nao hơdôm mơta bruă prong: Pơhlôm rơnuk rơnua lơ̆m pok bah amăng sang hră hăng pơhlôm anŏ klă amăng hrơi hơmâo klin Covid-19. Hơdôm tơlơi tơnap, tơlơi lông kiăng pơhlôm rơnuk rơnua lơ̆m pok bah amăng sang hră; hơdră pơsir pơhlôm rơnuk rơnua, tơlơi suaih pral kơ ƀing nai pơtô biă ñu lĕ ƀing čơđai yŭ 12 thun, aka ƀu tlâ̆o vaccine; hơdôm hơdră pơtô hrăm online...anun jing hơdôm tơlơi dŏ bơngơ̆t mơng ƀing khua ƀơi mông ngă rơđah bruă. Pơhiăp ƀơi mông jơnum lăi pơthâo, Kơ-iăng khua git gai pơ ala mơnuih ƀon sang dêh čar ơi Trần Thanh Mẫn kiăng anom bruă pơtô hrăm pơƀut git gai pơhlôm rơwang hrăm tal 2 thun 2021-2022 pơđut hĭ truh kih.

Siu H’Mai: Pơblang