Amăng hơdôm thun rơgao, puih kơđông ƀu djơ̆ kơnong kơ ngă giong klă bruă wai lăng ƀơi plơi pla ôh mơ̆ dô̆ jing anih ngă rơđah măng pơgang rơnuk rơnua bruă kơđi čar, pơgang tơlơi hơđong kơ glông guai dêh čar Việt Nam hăng Kur. Bôh tơhnal anun hmâo lĕ gơnang kơ puih kơđong hmâo gum hrom klă hăng gong gai plơi pla pok pơhai truh kih hơdră “Jua teng kual guai dêh čar”. Hơdră dưi pok pơhai mơng thun 2012 truh ră anai hmâo 10 thun laih samơ̆ ăt dô̆ glăi mơn bôh tơhnal sit nik.

Dŏng giăm hăng guai lŏn ia Việt Nam hăng Kur, dua bôh să Mỹ Quý Đông hăng Mỹ Quý Tây dưi lăng lĕ anih hang tơngia gah tơlơi ngui hla ƀai ƀong prăk, klĕ dŏp, ba mơnuih găn guai lŏn ia ngui hla ƀai ƀong prăk. Ƀơi anăp tơlơi anun, thun 2012, Puih kơđông bah amăng jang dêh čar ƀơi Mỹ Quý Tây hmâo gum hrom laih hăng Grŭp git gai Khul ling tơhan, kông ang tơring glông Đức Huệ hăng gong gai dua bôh să pok pơhai hơdră “Jua teng kual guai dêh čar”, hơdră pok phun dưi hmâo mơnuih ƀôn sang hur har pran jua anăp nao hăng lăi pơthâo kơ khul tơhan pơgang guai dêh čar rim wot hmâo tơlơi truh. Trung tá Cao Xuân Hiền Apăn bruă kơđi čar, Puih kơđông bah amăng jang guai dêh čar Mỹ Quý Tây, Ling tơhan pơgang guai dêh čar tơring čar Long An brơi thâo:

 “Rơgao hyu lăi pơhing pơsur lĕ, mơnuih ƀôn sang thâo dơlăm bôh tŭ yua mơng hơdră “Jua teng kual guai dêh čar”. Mơng tơlơi thâo anun neh wa hmâo anăp nao klă hrom hăng ling tơhan pơgang guai dêh čar hăng hơdôm khul pơkon gum hrom ba glăi bôh tơhnal biă “Jua teng kual guai dêh čar”. Yap mơng hrơi pok phun truh ră anai tơlơi rơnuk rơnua hơđong ƀơi plơi pla kơjăp phik, hơdôm tơlơi tơpai asơi ngui hla ƀai, ngă rung răng bơpơtaih plai ƀiă laih”.

Lom pơphun pok pơhai hơdră, mơnuih apăn bruă, mă bruă ƀơi puih kơđông hmâo abih pran jua pơtô brơi mơnuih ƀôn sang atông teng tui tơlơi pơkă pha ra, pơphun pơhrăm hơdôm bruă kiăng mơnuih ƀôn sang hăng hơdôm khul apăn bruă ngă tui djơ̆ jơlan gah ba tơbiă. Rơgao kơ pơhrăm mơnuih ƀôn sang thâo atông teng hiưm hơpă lăi pơthâo hmâo pơtuh apui ƀong, atông hiưm hơpă hmâo tơlơi rung răng ƀudah klĕ dŏp kiăng djă ba gơnam kiăng hloh lom gum hrom pơsir. Ơi Võ Văn Bình ƀơi ấp 3, să Mỹ Quý Đông, tơring glông Đức Huệ, tơring čar Long An brơi thâo:

 “Abih bang hơdôm tơlơi truh ƀơi anai dưi hmâo mơnuih ƀôn sang dŏng yua biă. Rơđah biă ñu kah hăng lom hmâo tơlơi ƀơi sang anô̆ hne adih lĕ jua teng anun amra lăi pơthâo kiăng mơnuih ƀôn sang tum pơƀut glăi pioh gum djru sang anô̆. Laih anun pơkĕ hrom kơplah wah mơnuih ƀôn sang hăng gong gai plơi pla hăng puih kơđông pơgang guai lĕ kơjăp biă”.

Pơdŏng ƀơi 2 să dô̆ hmâo lu tơlơi tơnap, lu mơnuih ƀôn sang amuñ hmâo ƀing săt yua mă kiăng djru ƀing ngă soh, yua anun Puih kơđông pơgang guai dêh čar Mỹ Quý Tây gum hrom na nao hăng khul kông ang, khul ling tơhan plơi pla pơphun lăi pơhing pơsur neh wa gum hrom pơgang jơlan guai dêh čar pŏng guai dêh čar hăng djă pioh tơlơi hơđong plơi pla, pơgang rơnuk rơnua lŏn ia. Truh ră anai abih bang hơdôm sang anô̆ hmâo lŏn ngă đang hmua giăm hăng dêh čar Kur leng kơ ngă hră pơgang anih anom pŏng guai giăm hăng đang hmua pô, mơng anun tơlơi rơnuk rơnua guai dêh čar dưi ƀơƀrư̆ hơđong, ƀing ngă soh tơlơi phiăn hmâo plai ƀiă rơđah rơđông.

Hăng mơnuih ƀôn sang ƀơi anai, mơnuih apăn bruă tơhan, ling tơhan Puih kơđông pơgang guai dêh čar Mỹ Quý Tây ră anai lĕ hơdôm mơnuih ƀôn sang mơng sang anô̆. Ăt yua anun mơ̆, lom hơdră bruă djơ̆ mơng ling tơhan pơgang guai dêh čar pơphun dưi hmâo mơnuih ƀôn sang tŭ ư hrom anăp nao hăng abih pran jua gum hrom khul pơgang guai dêh čar, djă kơjăp tơlơi rơnuk rơnua ƀơi lŏn ia pô. Pơdŏng jơlan guai kơplah wah Việt Nam hăng Kur rơnuk rơnua, pơđĭ kyar./.