Ƀơi tơring čar Sơn La, tơring čar hmâo rơbêh kơ 1 klăk 300 rơbâo čô mơnuih ƀôn sang, amăng anun djuai ania ƀiă hmâo rơbêh kơ 83%, bruă mơ̆ng khul đah kơmơi djuai ania ƀiă apăn bruă gum hrŏm, lăi pơthâo, glăm ba bruă jao hrŏm hăng khua mua hơdôm bôh plơi pla dưi pơdah rơđah, Pha ra ƀơi Sơn La lĕ đing nao brơi pơđĭ kyar bruă đang hmua mă yua bôh thâo măi mok, bruă đang hmua hơdjă, bruă đang hmua klă. Đah kơmơi hmâo bruă mă yôm phăn amăng abih bang hơdôm bruă mơ̆ Sơn La glăk pok pơhai. Tui hăng ơi Lưu Minh Quân, Khua Grŭp pơtô ba mơnuih ƀôn sang Ping gah tơring čar Sơn La, tơring čar lăng ba bơwih brơi kơ bruă mơnuih apăn bruă, biă ñu đah kơmơi apăn bruă. Mrô đah kơmơi pơ ala kơ Khua pơ ala mơnuih ƀôn sang, đah kơmơi ngă Khua pơ ala mơnuih ƀôn sang tơring čar, mrô đah kơmơi gum hrŏm gưl ping gah, mrô mơnuih mut ping gah đah kơmơi... leng kơ lu hloh rơwang bruă hlâo. Kơnong mrô mơnuih ping gah đah kơmơi dưi mut mơ̆ng akô̆ rơwang bruă truh ră anai hmâo rơbêh kơ 42% mrô mơnuih ping gah phrâo mut. Brơi thâo kơ sa dua mơta bôh tơhnal amăng bruă dưm kơnar bơnai hăng rơkơi hăng pơđĭ tui bruă apăn mơ̆ng đah kơmơi ƀơi plơi pla, ơi Lưu Minh Quân lăi pơthâo:

 “Tơlơi phun ƀơi Sơn La, anun lĕ bruă khua git gai črâo ba pioh pơtrut kơtang bruă djru đah kơmơi hrŏ trun kơjap phik hluai tui hơdră bơwih ƀong ƀơi tơring čar. Sơn La lĕ sa amăng 14 bôh tơring čar mơ̆ng đơ đam dêh čar rơkâo hăng Khul mă yua hơdră phrâo măi mok amăng wai lăng ƀut pơkrem čan prăk pioh pơđĭ tui anô̆ klă bruă ngă juăt hăng tơlơi rơkâo phrâo. Sơn La ăt hmâo pok pơhai ngă tui mơn Akô̆ Bruă djru đah kơmơi hrăm bruă, pơjing bruă mă brơi rơbêh kơ 9.700 čô adơi amai. Pơtrut kơtang hơdôm bruă pơplông pơjing đah kơmơi Việt Nam rơnuk phrâo, djă pioh 651 hơdră, 2818 gru ba jơlan hlâo hăng 1292 čô đah kơmơi hmâo mă anăn đah kơmơi Việt Nam rơnuk phrâo”.

Ƀơi tơring čar Lai Châu, tui hăng ơi Vũ Mạnh Hà, Ding kơna pơhlôm hlâo Ping gah dêh čar ta, Kơ-iăng Khua git gai Ping gah tơring čar Lai Châu, tơring čar Lai Châu hmâo đing nao ngă tui bruă mă, bruă gơgrong mơ̆ng đah kơmơi, bruă đah kơmơi hăng tơlơi dưm kơnar bơnai hăng rơkơi. Amăng anun hmâo hơdôm Tơlơi pơtrun pơsit, hơdôm tơlơi pơsit kơ pơđĭ kyar bơwih ƀong neh wa djuai ania ƀiă hmâo bơdjơ̆ nao klă kơ adơi amai, čơđai muai amăng neh wa djuai ania ƀiă. Rơđah biă ñu, Ping gah tơring čar Lai Châu hmâo mă yua laih Tơlơi pơtrun pơsit 06 lơ 15 blan 3 thun 2021 kơ pơđĭ klă khul mơnuih apăn bruă git gai, wai lăng djuai ania ƀiă hăng mơnuih apăn bruă phun hơdôm gưl să rơwang 2021-2025, pơsit jơlan gah truh thun 2030; Tơlơi črâo ba mrô 9/2021 mơ̆ng Grŭp apăn bruă Ping gah tơring čar kơ kơtưn tơlơi git gai mơ̆ng gưl Ping gah pioh kơ bruă hrŏ trun tơlơi dô̆ rơkơi bơnai mơ̆ng muai hăng pơdô̆ giăm drah kơtak; akô̆ bruă djru đah kơmơi pok phun bruă mă; mă yua hơdră bruă pioh kơ adơi amai mă bruă, hơdră bruă pioh kơ đah kơmơi ƀă ană, bơwih brơi tơlơi suaih pral, hră pơgang gah ia jrao, kơčăo bruă ƀă ană ƀiă, pơgang tơlơi dưi hăng bôh tŭ yua mơ̆ng đah kơmơi ƀơi anăp tơlơi phiăn...

 “Hơdră bruă pơkă pơtô pơhrăm hăng pơhrăm brơi dong mơnuih apăn bruă đah kơmơi rơgao kơ 5 thun lĕ bôh tơhnal hmâo sa dua bôh yôm: Sa lĕ, thâo, bruă gơgrong hăng bruă mă mơ̆ng ping ping gah, gong gai mơ̆ng abih bang mơnuih mơnam, amăng anun drơi pô đah kơmơi gah bruă mă, bruă apăn hăng bruă đah kơmơi amăng tơlơi phrâo hmâo lu tơlơi pơplih klă. Dua lĕ, bruă dưm kơnar bơnai hăng rơkơi amăng djop bruă kơđi čar, bơwih ƀong, bôh thâo mơnuih mơnam hmâo laih hơdôm bôh tơhnal pơplih phrâo. Khul đah kơmơi git gai wai lăng brơi kơ hơdôm bôh ƀirô, anom bruă đĭ wot mrô, anô̆ klă ñu".

Yă Tôn Thị Ngọc Hạnh, Kơ-iăng Khua Khul pơlir hơbit đah kơmơi Việt Nam brơi thâo, lăi pơthâo abih bang bôh tơhnal ngă tui bruă đah kơmơi, hmâo laih lu bôh tơhnal klă hăng pơplih rơđah gru amăng tơlơi pơmin. Bruă gơgrong mơ̆ng hơdôm gưl, hơdôm gơnong bruă, tơring čar amăng hơdôm hrơi rơgao ăt pơđĭ tui mơn. Hăng dưi hmâo tơlơi lăng ba dơlăm, đah kơmơi jai hrơi jai gum hrŏm dơlăm hloh amăng hơdôm bruă mă mơ̆ng tơlơi hơdip mơda mơnuih mơnam, pơtŏng sit bruă mă, bruă apăn hăng tơlơi pơčeh phrâo, djru amăng hơdôm bôh than hrŏm mơ̆ng hơdôm bôh tơring čar, ƀôn prong ăt kah hăng đơ đam dêh čar. Khă hnun hai, tơlơi pơmin kơ bơnai hăng rơkơi jing hơdôm anô̆ ngă gun kơ bôh thâo, hơdră bruă, ăt dô̆ bơdjơ̆ nao mơn tơlơi pơđĭ kyar mơ̆ng đah kơmơi. Lăng ba dong bruă đah kơmơi hăng bruă ngă tui hơdră bruă amăng ƀut đah kơmơi amăng rơwang ră anai amra jing gru than phun pơđĭ tui bruă apăn mơ̆ng đah kơmơi kah hăng ngă tui tơlơi dưm kơnar bơnai hăng rơkơi amăng djop bruă kơđi čar bơwih ƀong bôh thâo mơnuih mơnam. yă Tôn Thị Ngọc Hạnh brơi thâo:

 “Hăng bruă ngă tui hơdôm hơdră bruă hrŏm pioh kơ ƀing đah kơmơi, sa lĕ, ră anai hơdôm hơdră bruă tơlơi phiăn kiăng pơhlôm tơlơi dưi kơ đah kơmơi jai hrơi jai dưi pơhlôm klă, hơdră bruă hơđong tơlơi hơdip mơda mơnuih mơnam hmâo ba abih bang. Djru hơdôm mơnuih kah hăng đah kơmơi djuai ania ƀiă, đah kơmơi ƀu klă drơi jăn, đah kơmơi đuăi hyu dô̆, đah kơmơi thun tha rơma... bôh nik bruă tŭ mă hăng bôh tơhnal ngă tui hơdră bruă ăt dô̆ lu mơn tơlơi lăp kiăng đing nao".

Bôh tơhnal bruă đang kơmơi hơdôm hrơi rơgao jai hrơi jai djru pơtŏng sit bruă mă yôm phăn mơ̆ng khul đah kơmơi apăn bruă. Bruă ngă tui hơdră bruă pioh kơ đah kơmơi gah kơdư hơdôm brơi rơgao sa wot dong pơtŏng sit tơlơi lăng ba, črâo ba khut khăt mơ̆ng gưl ping gah, tơlơi gum hrŏm ha amăng plĕ, tơpă mơ̆ng hơdôm gưl, hơdôm gơnong bruă, hơdôm khul grŭp pioh kơ bruă đah kơmơi; biă ñu lĕ tơlơi gơgrong hlâo, pơčeh phrâo hăng hmao kiăo tui tơlơi rơkâo bôh nik hmâo mơ̆ng hơdôm bruă Khul amăng hơdôm hrơi rơgao./.