Biă ñu, ƀơi Kontum, neh wa mơ-ak biă čơkă Đại tướng Phan Văn Giang, Ding kơna Ding jum kơđi čar – Khua Ding jum Khul ling tơhan dêh čar ta nao pơhmư̆ Hrơi Jơnum ngui Gum hrom hơbit abih bang djuai ania. Tơlơi anun jai pơdah tơlơi nao hrom kơjăp kơplah wah khul ling tơhan hăng mơnuih ƀôn sang

Ƀơi Hrơi jơnum ngui ƀing khua pơ ala hăng mơnuih ƀôn sang plơi Đăk Tiêng Kơ Tu, să Đăk La, tơring glông Đăk Hà, tơring čar Kontum hmâo gum hrom lok glăi phiăn juăt ư-ang mơng Jơnum min djop djuai ania mơnuih mơnam dêh čar Việt Nam rơgao 92 thun pơdŏng hăng pơđĭ kyar. Anăp nao Bruă pơsur “Abih bang mơnuih ƀôn sang gum hrom pơdŏng plơi pla phrâo, plơi prong hơdeč hmar” hăng Bruă pơsur “Ngă pơplih tơlơi pơmin hơdră ngă mơng neh wa djuai ania ƀiă, ngă brơi neh wa djuai ania ƀiă hrưn đĭ tơtlaih mơng ƀun rin kơjăp phik”, thun rơgao 147 bôh sang anô̆ mơnuih ƀôn sang hăng giăm truh 1.000 čô mơnuih biă ñu lĕ neh wa djuai ania ƀiă Bahnar plơi Đăk Tiêng Kơ Tu hmâo bơwih ƀong huă klă, gum hrom hơbit gum djru nao rai tơdruă hơdai bơ đĭ kyar bơwih ƀong pơplih tơlơi hơdip mơda. Ră anai đơ đam plơi kơnong kơ dô̆ 3 bôh sang anô̆ ƀun rin hăng 9 bôh sang anô̆ ƀun rin ƀơƀiă; 136 bôh sang anô̆ dưi tŭ yap sang anô̆ tâ̆o yâu.

Pơ ala kơ Khua git gai Ping gah, Kơnuk kơna, Jơnum min djop djuai ania mơnuih mơnam dêh čar Việt Nam Đại tướng Phan Văn Giang, Ding kơna Ding jum kơđi čar, Kơ-iăng Khua git gai Ping gah Khul ling tơhan dêh čar, Khua Ding jum Khul ling tơhan hơ-ư̆č hmưi, pơsit yôm hơdôm bôh than mơ̆ Mơnuih ƀôn sang plơi Đăk Tiêng Kơ Tu dưi ngă. Khua Ding jum khul ling tơhan lăi rơđah: Gum hrom hơbit lĕ hơdră pơtrun, hơdră bruă prong mơng Ping gah hăng Wa Hồ kiăng ngă tui dlông hloh pran kơtang abih bang djuai ania. Jing juăt laih, mơng lu thun hăng anai, bruă pơphun Hrơi Jơnum ngui gum hrom hơbit abih bang djuai ania ƀơi hơdôm anih anom mơnuih ƀôn sang dô̆ tal hơdor glăi Hrơi pơdŏng Jơnum min djuai ania pơlir hơbit Việt Nam jing gru hiam phiăn juăt, ngă bruă jơnum truh hăng plơi pla mơnuih ƀôn sang, anăp nao rim sang anô̆ hăng rim mơnuih ƀôn sang. Hrơi Jơnum ngui gum hrom hơbit abih bang djuai ania thun anai jai yôm hloh tơdơi rơbêh kơ 2 thun bơbĕč mơng klin Covid-19, samơ̆ gah yŭ tơlơi git gai mơng Ping gah, Kơnuk kơna, tơlơi gum hrom mơng abih bang glông bruă kơđi čar hăng gum pran hrom, sa jua mơng abih bang mơnuih ƀôn sang, lŏn ia hmâo laih hơdôm bôh tơhnal prong amăng abih bang bruă mă.

Hăng bruă mă pơ̆ anăp anai ơi Phan Văn Giang, Khua Ding jum khul ling tơhân dêh čar rơkâo tơring čar Kontum, tơring glông Đăk Hà hăng mơnuih ƀôn sang plơi Đăk Tiêng Kơ Tu ngă tui dong pran jua Gum hrom hơbit ngă tui ba glăi bôh tơhnal hơdôm tơhnal pơđĭ kyar mơ̆ Ping gah, Kơnuk kơna hmâo ba tơbiă:

 “Gơgrong hlâo pơplih phrâo rơđah hăng pok pơhai ba glăi bôh tơhnal Tơlơi pơtrun pơsit mrô 19 gah bruă đang hmua, mơnuih ngă đang hmua hăng plơi pla truh thun 2030 hăng tơhnal lăng truh thun 2045. Tơlơi pơtrun pơsit 23 mơng Ding jum kơđi čar kơ pơđĭ kyar bơwih ƀong mơnuih mơnam pơhlôm pơgang rơnuk rơnua amăng kual Dăp Kơdư tơhnal lăng truh thun 2045. Pơphun klă hơdôm bruă bơkơtưn khăp kơ lŏn ia mơng mơnuih ƀôn sang. Pơtrut, pơsur hơdôm mơnuih ba gru hlâo, hơdôm khul grŭp, mơnuih mơbruă pơjing phun gơgrong bơkơtưn phrâo. Gum hrom klă pơdŏng Ping gah, pơdŏng gong gai, pơdŏng hơdôm khul apăn bruă kơđi čar, mơnuih mơnam klă hiam, kơjăp kơtang. Pok pơhai ngă tui klă Bruă pơsur Abih bang mơnuih ƀôn sang gum hrom hơbit pơdŏng plơi pla phrâo, plơi prong hơdeč hmar”.

Tal nao pơhmư̆ Hrơi jơnum ngui Gum hrom hơbit abih bang djuai ania hăng mơnuih ƀôn sang plơi Đăk Tiêng Kơ Tu, pơ ala kơ Khua git gai Ping gah, Kơnuk kơna, Jơnum min djop djuai ania mơnuih mơnam dêh čar Việt Nam Đại tướng Phan Văn Giang, Ding kơna Ding jum kơđi čar, Khua Ding jum Khul ling tơhan dêh čar ƀơk 100 bôh sang dô̆ gum hrom hơbit kơ mơnuih ƀôn sang djop djuai ania tơring čar Kontum hăng abih bang nua ñu 5 klai prăk. Khua ding jum hrom hăng Grŭp mă bruă, Jơnum min djop djuai ania mơnuih mơnam dêh čar Việt Nam hăng tơring čar Kontum ăt ƀơk mơn gơnam brơi giăm truh kơ 100 bôh sang anô̆ gah hơdră bruă hăng sang anô̆ bun rin mơng să Đăk La.

Ăt amăng tal nao mă bruă ƀơi tơring čar Kontum mơn, ơi Phan Văn Giang nao čuă, mă bruă ƀơi Sư đoàn 10, Quân đoàn 3. Čuă hăng pel ĕp bruă pơhrăm tơhan ƀơi hơdôm bôh puih kơđông, ơi Phan Văn Giang hmâo pơsur laih mơnuih apăn bruă tơhan, ling tơhan, biă ñu lĕ ƀing ling tơhan mơnuih djuai ania ƀiă, khom hơkrŭ pơsir djop tơlơi tơnap, lăng yôm pran jua gum hrom hơbit, gơgrong klă bruă pơhrăm, ngă juăt kiăng ngă pô phao kơtuang, măi mok phrâo.

Đại tướng Phan Văn Giang rơkâo git gai hơdôm bôh puih kơđông ngă tui tơpă bruă pơhrăm hơdôm jơlan gah kơdŏng blah, ngă tui bruă ling tơhan, pơgang lŏn ia ƀơi plơi pla tui bruă mă Dăp Kơdư. Đại tướng Phan Văn Giang rơkâo, pơ̆ anăp anai, hơdôm bôh anom mơng Sư đoàn 10 khom gum hrom kơjăp hăng gưl Ping gah, Gong gai hăng Hơdôm khul ling tơhan ƀơi plơi pla thâo kơjăp tơlơi ƀơi plơi pla, ngă klă bruă pơtô ba mơnuih ƀôn sang, gum hrom djru mơnuih ƀôn sang pơđĭ kyar bơwih ƀong, hrŏ trun ƀun rin, pơdŏng bruă kơđi čar plơi pla kơjăp kơtang./.