VOV4.Jarai - Mơguah lơ 13/4, ƀơi plơi prong Kon Tum, Phun kông ti Tân Cảng Sài Gòn (Quân chủng Hải quân) ngă hrŏm hăng Anom pơtô bruă Ping gah tơring čar Kon Tum pơphun ngă lơphet brơi hră pơsit čem rông ba sang anŏ tơhan djai pơsăn drơi, mơnuih djru hơkrŭ lŏn ia hăng brơi prăk hrăm hră “Tŭi rơđah tơlơi kiăng khăp” thun 2022 kơ čơđai sang hră tơnap tap.

Brơi prăk “Tŭi rơđah tơlơi kiăng khăp” thun 2022 kơ ƀing čơđai.

Ƀơi mông ngă lơphet, Phun kông ti Tân cảng Sài Gòn hơmâo brơi hră pơsit čem rông ba 10 čô mơnuih lĕ sang anŏ tơhan djai pơsăn drơi hăng sang anŏ hơkrŭ lŏn ia ƀơi 4 boh tơring glông mơng tơring Kon Tum: Kon Plong, Kon Braih, Đăk Glei hăng Đăk Hà. Tui anun, rim blan Kông ti Tân Cảng Sài Gòn amra djru, čuă jơmư hơdôm boh sang anŏ amăng hrơi ngui prong, hrơi tê̆t hăng rim boh sang anŏ lĕ năng ai 22 klăk prăk lơ̆m sa thun, laih anun hrơi blan čem rông ba pơphun mơng blan 4/2022. Ƀrô hrơi anai, Kông ti Tân Cảng Sài Gòn ăt djru pơdong brơi 5 boh sang hơdor tơngia ƀơi 2 boh tơring glông anun lĕ Sa Thầy hăng Kon Plong, rim boh sang hơmâo nua 80 klăk prăk mơng Keh prăk mơnuih mơnam pioh djru mơnuih tơnap mơng Kông ti, brơi prăk “Tŭi rơđah tơlơi kiăng khăp” thun 2022 kơ 10 čô čơđai sang hră ƀơi Kon Tum sang anŏ tơnap tap, găn rơgao tơnap tap amăng bruă hrăm, rim anung hơmâo 4 klăk.

Siu H’Mai: Pơblang