VOV4.Jarai - Ping gah Khul hơdôm anom bruă gơnong glông phrâo jao 1 klai prăk kiăng kơ man pơdong 20 boh sang brơi hơdôm sang anŏ kơnuk kơna čem rông ba, sang anŏ ƀun rin aka ƀu hơmâo sang dŏ ƀơi Bình Định. Ơi Nguyễn Quang Trường, Kơ-iăng Khua git gai Ping gah Khul hơdôm anom bruă gơnong glông brơi thâo, thun 2021, Ping gah amăng Khul hơmâo ngă tui tơlơi črâo trun mrô 05 mơng Khul apăn bruă Ping gah dêh čar amăng “kơtưn git gai mơng Ping gah hăng bruă pơhrŏ trun ƀun rin hơđong kjăp truh thun 2030”.

Mông jao prăk djru sang anŏ Kơnuk kơna čem rông a man pơdong sang

Tui anun, rĭm khul Ping gah kiăng pơlir hơbit, ngă giang mah, djru brơi ƀiă biă mă ñu sa boh tơring glông ƀun rin, să tơnap tap amăng đơ đam dêh čar kiăng djru brơi gơnam tam, črâo brơi mă yua boh thâo phrâo, djru brơi ƀon lan pơđĭ kyar bơwih ƀong huă, pơhrŏ trun ƀun rin. Truh ră anai, Ping gah amăng Khul hơmâo pơtrut gum pơgôp 17 klai 600 klăk prăk mơng sang bruă prăk, anom bơwih ƀong sĭ mơdrô, ƀing mơnuih čơmah hăng mơnuih apăn bruă, mơnuih mă bruă amăng khul Ping gah.

Siu Đoan: Pơblang