VOV4.Jarai-Ding jum Bruă mă, Tơhan rơka hăng Mơnuih mơnam phrâo ngă hră mơ-it kơ Khua dêh čar, kiăng pơthâo hăng Khua mir sir bruă ƀơk gơnam kơ mơnuih hơmâo gum laih kơnuk kơna ƀrô djơ̆ hơdor glăi tal 75 thun Hrơi pioh kơ Tơhan rơka hăng Mơnuih pơsăn drơi jăn kơ lŏn ia lơ 27/7. Tui hăng anun, anom bruă anai pioh lui 400 klai prăk blơi gơnam ƀơk sang anŏ hơmâo gum laih kơnuk kơna, ƀing amĭ Việt Nam sông kơtang khin hơtai, sang anŏ mơnuih djai pơsăn drơi jăn kơ lŏn ia, ƀing tơhan duăm ruă rơka rơkač.

Mơguah lơ 15/6, ƀơi Hà Nội, Khul djru sang anŏ mơnuih pơsăn drơi jăn kơ lŏn ia Việt Nam jơnum jak iâu ngă tui hơdră mơ-it tơlơi pơhing amăng telephôn “Hơdor tơngia kơ tơhan pơsăn drơi thun 2022”. Hăng hơdră mơ-it tơlơi pơhing čih TALS mơ-it nao kơ mrô 1400, sa tơlơi pơhing mơ-it, djru hrom 20 rơbâo prăk kơ bruă hơdor tơngia tơhan pơsăn drơi jăn thun 2022. Ngă tui mơ̆ng lơ 15/6 truh abih lơ 13/8/2022. Bruă ngă anai, pơdah rai pran jua hơdor tơngia yôm biă mă “Ƀong boh hơdor kơ pô pla mơñum ia hơdor kơ čroh hnoh”, hơdor tơngia tla pran laih anun tơlơi khăp hiam klă mơ̆ng djuai ania ta. Anai ăt jing hơdră djru sit nik kơ sang anŏ ƀing tơhan djai pơsăn drơi jăn kơ lŏn ia.

Nay Jek: Pơblang