Lu khua mua lăi, bruă pơblih tơña hăng lăi glăi lu mơta bruă, lu anom, črăn lăi glăi mơ̆ng ƀing khua ding jum, khua anom bruă hăng hơdôm čô kơ-iăng khua dêh čar tơpă ară, djơ̆ bruă kiăng tui hăng tơlơi tơña mơ̆ng ƀing pơ ala mơnuih ƀôn sang samơ̆ hmư̆ hăng glăm ba sit nik, pioh glăi sa tơlơi kơđŏm amăng bruă mă mơ̆ng ƀing pơ ala mơnuih ƀôn sang dêh čar, ăt kah hăng ngă djơ̆ tơlơi čang rơmang mơ̆ng mơnuih ƀôn sang ruah khua.

Phara hăng tơđar, jơnum lok anai, khua mua pơ ala tơña hơdôm khul bruă prong pơhrua kơ hơdră tơña tui hơdôm akŏ bruă či lăi nao kah hăng tơđar. Tui hăng anun, ding kơna amăng kơnuk kơna dêh čar amra lăi glăi soh hơgĕt tơlơi tơña lơ̆m bruă glăm ba mơ̆ng gơñu git gai, pơčrâo trun, lăng glăi bruă dưi ngă dơ̆ pă tui tơlơi ƀuăn hăng dưi ngă hơdôm mơta bruă. Pô pơ ala Tạ Văn Hạ, grup pơ ala mơ̆ng Quảng Nam lăng yôm črăn lăi glăi mơ̆ng ƀing khua ding jum hăng ding kơna amăng kơnuk kơna, črăn lăi glăi phun ngă djơ̆ hăng tơlơi ƀing pơ ala tơña mơ̆n. Bruă bơkơtuai nao rai anai djru kơ ding kơna amăng kơnuk kơna dêh čar, ƀing khua apăn akŏ gơnong bruă gưl dêh čar thâo tong ten, jĕ hloh hăng bruă lăi nao. Anai lĕ tơlơi gêh găl pioh kơ ƀing pơ ala pơtong glăi, krăo lăng bruă mă mơ̆ng ƀing khua ding jum hăng ding kơna amăng kơnuk kơna lăi glăi tơlơi gơñu ƀuăn ƀơi mông jơnum tơña bruă.

"Ƀing khua mua pơ ala tơña hơdôm bruă, djơ̆ amăng hră pơtrun, hơmâo kơsem min tong ten djop hră pơtrun kơ tơlơi tơña hăng lăi glăi ƀơi mông jơnum ƀing pơ ala mơnuih ƀôn sang dêh čar. Ƀing khua ding jum tŭ mă tơlơi tơña laih anun lăi glăi tơpă, ƀơi anăp mơta hơdôm bruă pơdjơ̆ nao ƀing pơ ala đing nao lu. Ƀing pơ ala ăt tơña pơkhuer brơi rơđah tong ten, pơčrong sai nao rai tơl đut črăn. Rơngiao kơ tơña ăt hơmâo mơ̆n tơlơi pơgôp hiăp, rơkâo đĭ lu hơdră djru kơnuk kơna pơsir, djru ƀing khua ding jum, anom bruă pok pơhai ngă tui klă hloh”.

Pô pơ ala Tô Thị Bích Châu, grup ƀôn prong Hồ Chí Minh lăi lĕ, tal tơña hăng lăi glăi pơphun tơpă, tơlơi tơña mơ̆ng ƀing pơ ala amăng mông jơnum lĕ djơ̆ hơdôm tơlơi mơnuih ƀôn sang ruah khua čang rơmang. Khă hnun, hăng hơdôm bruă mă, kah hăng gah ia jrao, pơtô hrăm, gru grua thâo thăi...mông mơnit pioh tơña ƀiă đơi, mông mơnit ƀing khua mua lăi glăi ƀu djop tui hăng tơlơi mơnuih ƀôn sang đing nao ôh.

“Ƀing ta pơphun hơdră tơña lăi glăi lu mơta tơlơi prong, abih bang pơdjơ̆ nao bơwih ƀong huă, gru grua thâo thăi, bruă mơnuih mơnam, kơđi čar, pơgang rơnuk rơnua, hơđong kơ lŏn ia kơnong 2 hrơi mơkrah lĕ ƀu dưi djop ôh. Yua kơ anun, hơdôm tơlơi lăi glăi mơ̆ng khua ding jum, khua anom bruă ăt pơkă mông mơnit mơ̆n, kơnong djop mă jăng jai đôč. Yua ƀing pơ ala kiăng thâo rơđah, tong ten lĕ khom ba pơčrong sai lu wơ̆t. Yua kơ anun rơdah hơmâo tơlơi tơña pơ anăp anai, kâo pơmin lĕ ruah mă hơdôm tơlơi đing nao tong ten dơlăm hloh”.

Tui hăng ĕp lăng hơdră tơña hăng lăi glăi ƀơi mông jơnum lok 6 khua mua pơ ala mơnuih ƀôn sang dêh čar tal XV, mơnuih ƀôn sang ruah khua ơi Lê Hữu Chỉnh, dŏ ƀơi phường Thắng Lợi, plơi prong Ƀuôn Ma Thuột, tơring čar Dak Lak lăi lĕ, bruă tơña hăng lăi glăi jơnum lok tal anai ƀuh pơhaih rơđah laih, tơpă ară, tong ten. Pô tơña hăng mơnuih lăi glăi hơmâo prăp lui tong ten, thâo hruaih tơlơi či lăi glăi.

“Dua hrơi mơkrah tơña hăng lăi glăi, kâo ƀuh ƀing khua mua apăn akŏ sa gơnong bruă ngă djơ̆ yơh, khua dêh čar hăng khua git gai pơ ala mơnuih ƀôn sang dêh čar ăt hnun mơ̆n. Kâo pơmin lĕ hơmâo lu tơlơi pơblih biă mơ̆n. Tơhnal pơkă pơprong dưi ngă mơ̆ng bruă pơgang rơnuk rơnua truh kơ bơwih ƀong huă mơnuih mơnam, biă mă ñu ƀing pơ ala mơnuih ƀôn sang hăng kơnuk kơna đing nao kơ bruă ană mơnuih yơh phun, bơmhutu lăi nao bruă pơđĭ prăk blan, bruă pơtô hrăm, bruă ia jrao, gru grua tơlơi pơhing ăt lăi nao mơ̆n; hrŏm hăng jơlan glông, tơdrun kompăn, tơdron rơdêh por laih anun gir run kiăng hơmâo truh 3.000 km jơlan rơdêh đuăi hmar amăng rơwang bruă anai, kâo ƀuh sa bruă mă prong prin biă. Sa čô mơnuih ƀôn sang ruah khua kâo ƀuh mơak hăng đăo kơnang kơ khua mua pơ ala mơnuih ƀôn sang amra ngă giong bruă jao”.

Lăi nao kơ črăn lăi glăi mơ̆ng Kơ-iăng Khua dêh čar ơi Trần Lưu Quang, pô pơ ala Nguyễn Thị Sửu, grup tơring čar Thừa Thiên Huế brơi thâo:

“Kâo ƀuh tơlơi tơpă, khin pơhaih anŏ kơƀah, khin pơčrâo ba tong ten bruă aka ƀu dưi ngă hăng amra pơsir tơlơi kơƀah aka ƀu dưi ngă anun laih anun hơduah ĕp jơlan hơdră tơbiă đuăi mơ̆ng tơlơi tơnap tap, gun gan. Ƀu djơ̆ lăi pô pơ ala kiăng tơña đôč ôh hơdôm tơlơi tơnap anun, kiăng pơsir hĭ, kiăng hơmâo anih kơnang mơ̆ Kơnuk kơna dêh čar yơh sa amăng hơdôm anih lăp ưh kơnang, tơki prong hloh dưi pơsir djop jơlan hơdră tơlơi kiăng, tơlơi čang rơmang mơ̆ng mơnuih ƀôn sang ruah khua amăng dêh čar.