Kơnôl 5/10, Grup kuai hăng rŭ đĭ tơlang ƀing tơhan pơsăn drơi (Grup K74) gah sang bruă khua tơhan ƀôn prong HCM, ăt hlăk pok tui anih hyu kuai, hơduah ĕp ƀơi anih B, đang bơnga Lê Thị Riêng. Amăng hrơi anun, adai hơjan, bơbeč djơ̆ bruă hyu klơi, rŭ kuai laih anun pơdŭ lơ̆n. Boh tơhnal lĕ, Grup K74 hơmâo ƀuh hăng kuai đĭ dơ̆ng 13 per tơlang tơhan djai pơsăn drơi yua kơ lơ̆n ia, amăng anun hơmâo gơnam pơtui amăng drơi jăn atâo mơnuih djai.

Yap mơ̆ng hrơi, kơnôl 23/6 truh ră anai, tơhan kơnuk kơna amăng grup hyu ĕp kuai đĭ tơlang tơhan djai pơsăn drơi hơmâo ƀuh 731 per ƀơi đang bơnga Lê Thị Riêng, phường Hoà Hưng, ƀôn prong HCM.

Amăng kual anai lĕ gah ƀut pơsat Đô Thành, dŏ glăi amăng pơsat Chí Hòa-Chợ Quán. Amăng mrô per tơlang ĕp ƀuh anun, 698 per lĕ hơmâo kuai ĕp ƀuh raih daih đôč; 33 per tơlang arăng dor sa ƀut ƀơi 8 bit anih, hơmâo dua anih amăng kual A hang 6 bit anih amăng kual B.