Rơbêh kơ sa blan hăng anai, yap mơ̆ng hrơi đĭ dô̆ sang khăp pap yua kơ Anom bruă Kông ang pơdŏng brơi, yă H’Wăn Byă 56 thun, ƀơi thôn 2, să Ea Siên, plơi prong Buôn Hồ ăt dô̆ hơnong mơn pran jua mơ-ak. Ñu lăi pơthâo, tơlơi hơdip mơda amĭ rơngiă rơkơi, ană rơngiă ama, lu thun hyu dô̆ kơnang kơ arăng, 2 ar lŏn ngă đang hmua kơnong kơ djop ƀong huă, anun bruă hmâo sang dô̆ pơdŏng kơjăp ăt kah hăng sa tơlơi rơpơi mơn.

  “Gah Kông ang pơdŏng sang dô̆ kơ kâo, kâo mơ-ak biă. Mơ̆ng hrơi rai dô̆ ƀuh tơlơi suaih pral klă, pran jua mơ-ak, ƀu bơngot kơ sang dô̆ dong tah. Kâo tha laih, ƀu dô̆ pran mă bruă, ƀu dưi ngă rai prăk pioh pơdŏng sang phrâo ôh. Bơ̆ dŏ kơnang kơ sang ayong na nao ăt ƀu klă gal mơn. Bơni kơ khul kông ang hăng hơdôm gưl gơnong bruă”.

Ăt hmâo hrŏm tơlơi yâo mơ-ak lơm dô̆ pơ̆ sang phrâo tal anai, ơi Trần Anh Dũng, 58 thun, ƀơi thôn 3, să Ea Bung, tơring glông Ea Sup, tơring čar Dak Lak, lăi pơthâo:

  “Thun 1980 sang anô̆ kâo mơ̆ng Đà Nẵng rai pơ̆ Ea Sup pơdŏng pưk sang đang hmua. Yua kơ tơnap tap khom dô̆ amăng sang tơ̆i prong akă truh 20m2, hơjan lĕ ia ƀlĕ, pơ-iă lĕ ƀui hlŭ. Dưi hmâo Kông ang tơring glông Ea Sup hăng hơdôm gưl pơdŏng brơi sang dô̆ klă hiam, ră anai hmâo sang phrâo dô̆ hơdip mơda  ƀu bơngot kơ hơjan ia ƀlĕ, ƀui hlŭ dong tah, sang anô̆ kâo mơ-ak biă".

Ea Sup lĕ tơring glông blung a ƀơi Dak Lak ngă giong tơhnal hmâo jao lĕ pơdŏng 80 bôh sang dô̆ kơ hơdôm bôh sang anô̆ tơnap tap hlâo kơ bơyan hơjan ia ling dăo. Đại úy Hoàng Thế Quang, Khua Khul pơphô brơi, Kông ang tơring glông Ea Sup lăi pơthâo tơlơi găn rơgao:

  “Kông ang tơring glông hmâo rơkâo hơdôm bôh anom djru brơi gơnam man pơdŏng ăt kah hăng hơdôm mơnuih man pơkra sang mă yua tơdăng gơnam man pơkra hăng djru hlâo prăk man pơdŏng, kiăng hmao rơnoh bruă tañ giong pơdŏng hơdôm bôh sang djru hơdôm bôh sang anô̆”.

Dak Lak lĕ tơring čar hmâo mrô mơnuih ƀôn sang lu hloh Dap Kơdư hăng 1,95 klăk čô mơnuih, 45 djuai ania adơi ayong dô̆ hơdip hrŏm. Mrô sang anô̆ ƀun rin mơ̆ng tơring čar ră anai dô̆ giăm truh 8%. Djru hơdôm bôh sang anô̆ plai ƀiă tơnap tap, mơ̆ng krah blan 3/2024, Ding jum kông ang pok pơhai Akô̆ bruă pơdŏng 1.200 bôh sang dô̆ khăp pap ƀơi Dak Lak. Rim sang hmâo nua 80 klăk prăk, amăng anun Ding jum Kông ang djru 50 klăk prăk, gong gai plơi pla djru hrŏm mrô dô̆ glăi; Kông ang hơdôm bôh tơring glông, să djru hrơi bruă. Sang pơdŏng tui gru 36B (Ding jum Kông ang), kual lŏn prong 36m2, hăng pơnăng geč, rap pơbung tôl, bah amăng pơsơi hăng atur gač men. Tui hăng Thiếu tá Lê Vinh Quy – Khua Kông ang tơring čar Dak Lak, truh mông anai, đơ đam tơring čar hmâo ngă giong laih giăm truh 500 bôh sang jao kơ mơnuih ƀôn sang mă yua. Ră anai kông ang hơdôm bôh tơring glông, plơi prong glăk pơtrut tañ rơnoh bruă pioh ngă giong bruă man pơdŏng abih bang hơdôm sang dô̆ hlâo kơ lơ 30/10/2024:

 “Ƀing gơmơi gum hrŏm hăng hơdôm gơnong bruă, anom bruă, gong gai hơdôm bôh plơi pla hăng kơtưn khul mơnuih anăp nao plơi pla pioh djru neh wa prăk pran pơdŏng sang hăng gơnam tam pơkra sang kơ neh wa. Rơngiao kơ pơhlôm klă kơjăp, kông ang tơring čar ăt rơkâo mơn kông ang hơdôm bôh anih anom khom ngă giong amăng hơdôm hrơi tañ hloh jao kơ hơdôm bôh sang anô̆, ngă gal brơi pioh neh wa hơđong pran jua mă bruă”.

 Akô̆ bruă pơdŏng 1.200 bôh sang khăp pap brơi kơ hơdôm bôh sang anô̆ tơnap tap pơdah tơlơi lăng ba phara mơ̆ng Ding jum Kông ang pioh kơ mơnuih ƀôn sang tơring čar Dak Lak. Bruă ngă anai djru sit nik pơhlôm tơlơi hơdip mơda hơđong mơnuih mơnam, pơdŏng plơi pla phrâo, pơtrut bruă “Abih bang mơnuih ƀôn sang pơgang rơnuk rơnua plơi pla lŏn ia”; anăp nao čơkă mơ-ak hơdor glăi 120 thun Hrơi pơdŏng tơring čar Dak Lak.

 Hlâo kơ anun, Kông ang tơring čar Dak Lak hăng Kông ang tơring glông Čư̆ Kuiñ ăt hmâo gum hrŏm mơn hăng gong gai plơi pla pơphun ngă lơphet pok phun pơdŏng “Sang hơdor tơngia” kơ sang anô̆ ling tơhan pơsăn drơi Kông ang mơnuih ƀôn sang Trần Quốc Thắng, mơnuih mă bruă hơđăp ƀơi Kông ang să Ea Tiêu djai amăng tơlơi kơsung blah lơ 11/6.

Ngă tui hơdră pơtrun mơ̆ng Ping gah, Kơnuk kơna hăng Ding jum kông ang kơ bruă bơwih brơi ling tơhan rơka ruă, sang anô̆ ling tơhan pơsăn drơi, mơnuih djru ngă hơkrŭ hăng ngă hơkrŭ, hơdôm hrơi rơgao, Keh prăk hơdor tơngia ƀing gŏp Ding jum Kông ang; Keh prăk hơdor tơngia ƀing gŏp Kông ang tơring čar Dak Lak hrŏm hăng tơlơi gum hơgôp, djru gum mơ̆ng abih bang khul Kông ang amăng đơ đam dêh čar hmâo đing nao laih, djru ba sa črăn prăk 500 klăk prăk pioh pơdŏng “Sang dô̆ hơdor tơngia” kơ mơnuih mơ̆ng sang anô̆ Thiếu tá, Pơsăn drơi Trần Quốc Thắng./.