Jơnum min apăn bruă phun pơ ala mơnuih ƀôn sang sem lăng, pơsit 2 pok hră pơtrun pơdjơ̆ nao bruă prăk kăk, kông ngăn kơnuk kơna hăng hră čih dăp hlâo akŏ bruă krăp lăng “Bruă ngă tui jơlan hơdră djru, tơlơi phiăn wai lăng, mă yua sang bruă kơnuk kơna tơdơi kơ ngă tui jơlan hơdră dăp glăi pơmut hrŏm sang bruă, gong gai kơnuk kơna”. Khua git gai pơ ala mơnuih ƀôn sang dêh čar ơi Trần Thanh Mẫn lăi pơtong:

“Anai lĕ akŏ bruă kơsem min dơlăm tong ten blung a mơ̆ng khua pơ ala mơnuih ƀôn sang dêh čar tal XVI; yua anai lĕ, bruă prăp lui khom ngă tui tong ten biă mă, djơ̆ rơ-ua mơ̆ng blung pơphun rim čră. Boh nik ñu, bruă mă krăp lăng tal anai khom lir hơbit tong ten hăng djơ̆ tơlơi git gai pơčrâo ba phun mơ̆ng gơnong dlông kơ bruă pơhlom, pơgăn ngă huač phăk phai hăng soh glăi, biă mă ñu tui hăng Hră pơtrun mrô 4 mơ̆ng gơnong dlông. Ră anai, bruă wai lăng, mă yua sang bruă kơnuk kơna tơdơi kơ ngă tui jơlan hơdră pơmut hĭ dăp glăi sang bruă, anom bruă gong gai kơnuk kơna hlăk rơbêh hĭ ngă kơ lu mơnuih mơnam đing nao biă mă”.

Pơgôp hiăp kơ bruă pơsir tơlơi kiăng mơ̆ng mơnuih ƀôn sang blan 5, Khua mua phun Jơnum min pơsir tơlơi kiăng mơ̆ng mơnuih ƀôn sang hăng Krăp lăng rơkâo hăng Jơnum min apăn bruă phun pơ ala mơnuih ƀôn sang dêh čar, brơi rơkâo kơnuk kơna, Khua dêh čar pơčrâo bruă djopng ding jum, anom bruă ƀơi gơnong dlông hăng djop tơring čar  brơi kơtưn pel ĕp boh tŭ yua ia săng pơkra ming mơ̆ng mơnong hơdip anăn E10, pơtrut bruă wai lăng tơlơi pơhing, pôr pơthâo, pơtô pơblang kiăng hơmâo tơlơi bơtŭ ư sa hnơ̆ng lơ̆m pok pơhai ngă tui; kơtưn bruă hyu ĕp lăng hăng hơdai gum tong ten hăng jơnum min mơnuih ƀôn sang ƀôn prong Hà Nội amăng bruă pok pơhai, ngă tui djop kơčăo bruă pơprong pok pơhai ƀơi ƀôn prong. Amăng anun, kiăng hơmâo jơlan hơdră hăng bruă pơsir rơđah rơđong pioh pok pơhai djop kơčăo bruă bơwih brơi pơdong plơi phrâo, akŏ pơdong glăi kiăng ngă hơđong tơlơi hơdip mơda laih anun tơlơi bơwih ƀong huă kơ mơnuih ƀôn sang bơbeč djơ̆ yua mơ̆ng hơdôm kơčăo bruă. Kơ boh yom phun anai, Khua Jơnum min Boh thâo ia rơgơi phrâo hăng Ayuh hyiăng, ơi Nguyễn Thanh Hải lăi lĕ, hră lăi pơthâo pơhrua nao dơ̆ng hơdôm tơlơi soh plư pleč hlăk hơmâo giăm anai, anun lĕ plư, pơgô̆ ƀing tha rơma, mơnuih pơdơi abih thun bruă laih kĭ hră nao pơdơi pơdă kiăng pơhŭi hlâo mơnuih ƀôn sang, laih dơ̆ng rơkâo djop tơring čar plơi pla khom hơmâo hơdră pơsir kơ tơlơi pơhing anai:

“Abih tơlơi hơdip arăng pơkom pioh hơdôm, rơngiă hĭ abih hmư̆ tơlơi plư pleč. Yua kơ anun amăng hră lăi pơthâo ăt čih pioh tơlơi anai phrâo hăng lăp đing nao. Rơkâo anom bruă kơnuk kơna hơmâo tơlơi dưi pơtong rơđah amăng să, tơring čar pơpă hơmâo, ƀing ta khom thâo tơlơi pơhing lăi pơthâo jăm tơlơi soh mơ̆n hă laih anun ƀing ta wai lăng hiư̆m pă pơsir hiư̆m lĕ”.

Đing nao kơ tơlơi pơtô hrăm, Khua Jơnum min gah Gru grua, Pơtô hrăm ơi Nguyễn Đắc Vinh brơi thâo, hlâo adih jơlan hơdră mơ̆ng kơnuk kơna kơnong lui prăk apah hrăm hră hơdôm mơta bruă hrăm bruă kah hăng ling tơhan, bruă ngă nai pơtô.

“Hơdôm bruă mă phara đôč mơnuih ƀôn sang aka ƀu thâo kah hăng bruă kơsem min gah apui ayuh kiăng biă mă, samơ̆ jơlan hơdră pơkă aka ƀu djop ngă pơhưč arăng mut hrăm ôh-samơ̆ yom biă mă, anun yơh jơlan hơdră djru mơ̆ng kơnuk kơna khom djru ba hăng lăi pơthâo tum teč hloh ƀu mă prăk apah hrăm hră, anai lĕ tơlơi kiăng pôr pơthâo, pơtô lăi lu mơnuih ƀôn sang kiăng thâo, kiăg hơmâo mơnuih mut hrăm pioh pơtô pơhrăm, hơmâo tơlơi ruah mă djơ̆ găl pioh kơ pơhrua mơnuih mă bruă kơ lŏn ia”.

Pơhiăp đĭ ƀơi mông jơnum, Khua git gai pơ ala mơnuih ƀôn sang dêh čar ơi Trần Thanh Mẫn lăng yom Jơnum min pơsir tơlơi kiăng mơ̆ng mơnuih ƀôn sang hơmâo pơblih phrâo amăng bruă čih hră lăi pơthâo; laih dơ̆ng rơkâo đĭ rim blan, Jơnum min ngă hrŏm Sang bruă djop djuai ania mơnuih mơnam, anih thâo lu tơlơi pơmin, anŏ kiăng, tơlơi rơkâo mơ̆ng mơnuih ƀôn sang pioh pơđĭ tui lu hloh boh tŭ yua amăng hră čih lăi pơthâo. Khua git gai pơ ala mơnuih ƀôn sang dêh čar ơi Trần Thanh Mẫn pơtă pơtăn dơ̆ng:

“Bruă mă pơsir tơlơi kiăng mơ̆ng mơnuih ƀôn sang tong ten hloh, ƀu kơnong dŏ glăi ƀơi mông tŭ jum mơnuih ƀôn sang, pơsir hră rơkâo, mơ-it đĭ tơlơi rơkâo đôč ôh. Kâo rơkâo pơsir bruă mơnuih ƀôn sang rơkâo lĕ khom tŭ mă djơ̆ tơlơi kiăng mơ̆ng pran jua mơnuih ƀôn sang, jing kah hăng anŏ lăi lui hlâo kơ jơlan hơdră, kah hăng gai pơkă boh tŭ yua amăng bruă git gai wai lăng amăng kơnuk kơna dêh čar. Kâo rơkâo pơ anăp adih, đing nao 5 mơta tơlơi. Sa lĕ, anăm lui tơlơi kiăng mơnuih ƀôn sang rơkâo đĭ nao tơdơi kơ tơlơi ƀu mơak klă hil rơ̆t mơ̆ng mơnuih ƀôn sang. Ta khom pơđing hmư̆, hyu sem lăng kiăng thâo tơlơi pơhing hăng khom truh hiăp hlâo. Dua lĕ, lăi glăi tơlơi rơkâo mơ̆ng mơnuih ruah khua lăp djơ̆ hloh. Mrô rơnoh lăi glăi tong ten, lăp čih pioh, samơ̆ gai pơkă tal rơnuč lĕ ƀu djơ̆ kơnong hră čih lăi glăi đôč ôh, dŏ jing bruă hơmâo pơsir laih hă aka, mơnuih ƀôn sang ƀuh tŭ ư djơ̆ găl mơ̆n hă, anun yơh yom hloh”.

Khua git gai pơ ala mơnuih ƀôn sang dêh čar ăt rơkâo, krăp lăng bruă mơnuih ƀôn sang rơkâo khom ruah mă djơ̆ anŏ dŏ đôm, khom kah pơpha rơđah bruă hơmâo. Kơđi tơlơi hơmâo lĕ lăng nao djơ̆ khom pơsir giong bruă, ƀu dưi bĕ ôh. Bruă pơsir giong djơ̆ tơlơi phiăn, abih tơlơi dưi, ƀu hơmâo tơlơi phrâo hơmâo dơ̆ng ôh, khom sơ̆n pran jua pơsir, jak iâu, laih dơ̆ng ngă djơ̆ tơlơi tơpă tui tơlơi phiăn pơkă, ƀu dưi lui sui ngă rơngiă hơđong, rơnuk rơnua; pơđĭ tui rơnoh lăi lui hlâo mơ̆ng bruă pơsir anŏ kiăng mơ̆ng mơnuih ƀôn sang; khom pơčrâo rơđah anăp či ngă bruă, phun tơdŭ, anih glăm ba, rơkâo đĭ  pơsir hăng tơlơi pơkă lăng tui giong rơkâo đĭ; rơkâo blan hlâo khom pơtrut, pơtong glăi mơtam amăng blân tơdơi kiăng pơsir khom giong.