VOV4.Jarai - Amăng rơwang hrơi tơjuh laih rơgao, ƀơi Ƀirô mă bruă, Khua git gai pơ ala mơnuih ƀon sang dêh čar ơi Vương Đình Huệ bưp ƀing ding kơna amăng grup bơwih ƀong huă, gru grua hăng tuai čuă ngui; ƀing khua mua pơ ala brơi hơdôm tơring amăng kual blah wang Việt Bắc. Đĭ pơhiăp amăng mông bưp, Khua git gai pơ ala mơnuih ƀon sang dêh čar lăi pơtong, anŏ yôm mơng gru grua ngă hơkrŭ đưm hlâo adih ƀơi Việt Nam lĕ anŏ djă pioh yôm hloh amăng bruă bơwih brơi tuai čuă ngui. Yua anun, amăng pơplih glăi bruă bơwih brơi tuai čuă ngui kiăng pơlir hăng bruă djă pioh, lăi pơthâo gru grua hing ang mơng rơnuk ngă hơkrŭ.

Khua git gai pơ ala mơnuih ƀon sang dêh čar ơi Vương Đình Huệ lăi pơtong, klin Covid-19 ăt bơbeč nao kơtang, samơ̆ anai ăt lĕ tơlơi dưi prong kiăng Việt Nam pơplih glăi tong ten, djop mơta amăng gơnong bruă tuai čuă ngui Việt Nam tui tơlơi pơtrun mrô 8 mơng Ding jum kơđi čar kiăng pơđĭ kyar bơwih brơi tuai čuă ngui jing gơnong bruă bơwih ƀong akŏ phun laih dong djơ̆ hăng tơlơi phiăn tuai čuă ngui hơmâo Ƀirô Khua pơ ala mơnuih ƀon sang dêh čar tŭ yap mă yua; pơtrut pơplih amăng bơwih bơwang, anih anom, bơwih ƀong sĭ mơdrô hăng hơdôm gơnam brơi kơ tuai čuă ngui; pơplih tơlơi pơmĭn kiăng kơ ba bruă bơwih brơi tuai čuă ngui pơƀut glăi, pơlir hơbit gơnong bruă hăng kual.

Pơhmutu hơdôm bruă pơđĭ kyar bơwih brơi tuai čuă ngui ƀơi hơdôm dêh čar amăng rŏng lŏn tơnah hơmâo pơhưč lu tuai nao ngui, pơsur bruă blơi gơnam tam ƀơi rĭm boh kual, rĭm boh dêh čar, Khua git gai pơ ala mơnuih ƀon sang dêh čar lăi pơtong, kiăng pơđĭ kyar gơnong bruă tuai čuă ngui, bruă yôm phun lĕ tơlơi pơmĭn, jơlan gah pơ anăp hăng gru grua yôm phara. Yua anun, ƀing ding kơna amăng grup bơwih ƀong huă, gru grua hăng tuai čuă ngui kiăng pơgôp hiăp mơng anun gum tơngan hrŏm mơng gơnong glông, ƀon lan hăng hơdôm anom bruă wai lăng kiăng pơtrut dong amăng bruă bơwih brơi tuai čuă ngui pơ anăp anai.

Khua git gai pơ ala mơnuih ƀon sang dêh čar lăng yôm, Khul djuai ania mơng Ƀirô Khua pơ ala mơnuih ƀon sang dêh čar, Anom bơwih ƀong huă, gru grua gah Khul pơlir hơbit hơdôm Khul boh thâo phrâo Việt Nam hơmâo gum hrŏm pơphun Jơnum bơkơtuai hăng ruah anăn lĕ: “Pơlir hơbit pơđĭ kyar bruă bơwih brơi tuai čuă ngui hrŏm hăng bruă djă pioh, lăi pơthâo hơdôm anŏ yôm tui gru grua ngă hơkrŭ ƀơi kual blah wang Việt Bắc” hăng 6 boh tơring čar anun lĕ: Cao Bằng, Bắc Kạn, Lạng Sơn, Thái Nguyên, Hà Giang, Tuyên Quang:

“Kâo ăt tŭ ư hăng anăn pơphun hrơi anai amăng mông jơnum bơkơtuai anai, Bruă bơwih brơi tuai čuă ngui hăng sit biă ñu lĕ pơđĭ kyar bơwih brơi tuai čuă ngui pơlir hăng djă pioh, lăi pơthâo hơdôm gru grua yôm phara mơng rơnuk ngă hơkrŭ. Gru grua yôm phara mơng rơnuk ngă hơkrŭ ƀơi Việt Nam lĕ sa anŏ yôm hơmâo djop mơta amăng bruă bơwih brơi tuai čuă ngui mơng dêh čar Việt Nam hăng jar kmar. Yua anun, amăng bruă pơplih bơwih brơi tuai čuă ngui pơlir hăng bruă djă pioh, lăi pơthâo gru grua yôm mơng rơnuk ngă hơkrŭ. Anai lĕ gru grua yôm hloh amăng lŏn ia ta.

Khua git gai pơ ala mơnuih ƀon sang dêh čar brơi thâo, tơdơi kơ hrơi Jơnum gru grua đơ đam dêh čar, tui tơlơi klah čun mơng Khua git gai Ping gah ơi Nguyễn Phú Trọng, Ping gah hăng Kơnuk kơna hơmâo jao Ding jum gru grua, bơrơguăt drơi jăn hăng tuai čuă ngui pơjing sa jơlan hơdră tui hơnong pơkă kiăng pơđĭ kyar gru grua, amăng anun hơmâo boh tơhnal djă pioh, lăi pơthâo gru grua yôm ƀơi hơdôm anih djă pioh gơnam yôm đưm hlâo adih.

Khua git gai pơ ala mơnuih ƀon sang dêh čar ơi Vương Đình Huệ rơkâo, pơđĭ kyar bruă bơwih brơi tuai čuă ngui kiăng pơlir kjăp hăng bruă ngă tui 3 jơlan hơdră tui hơnong pơkă dêh čar amăng man pơdong plơi pla phrâo; pơđĭ kyar bơwih ƀong- mơnuih mơnam kual mơnuih djuai ania ƀiă hăng čư̆ siăng, pơhrŏ trun rin rơpa hơđong kjăp.

Pơ anăp anai, gơnong bruă tua čuă ngui kiăng pơgôp pơtrut tañ pok pơhai hơkrŭ glăi hăng pơđĭ kyar bơwih ƀong huă-mơnuih mơnam, ngă tui hơdôm tơlơi pơtrun, rơnoh prăk djru mơng Ƀirô Khua pơ ala mơnuih ƀon sang dêh čar, Kơnuk kơn, amăng anun hơmâo bruă djru brơi mơnuih mă bruă kiăng kơ bong glăi, ngă gêh gal brơi mơnuih mă bruă hơđong pran jua mă bruă.

Khua git gai pơ ala mơnuih ƀon sang dêh čar ơi Vương Đình Huệ pơsit tong, Ƀirô Khua pơ ala mơnuih ƀon sang dêh čar, hơdôm anom bruă amăng Ƀirô čang rơmang khul pơlir hơbit Khul boh thâo phrâo Việt Nam hăng Anom bruă bơwih ƀong, gru grua, ƀing ding kơna amăng Grup pơgôp hiăp na nao, kiăng pơgiong hơdră bruă, hơdôm tơlơi črâo trun mơng Ƀirô Khua pơ ala mơnuih ƀon sang dêh čar ; kah hăng bruă krăo lăng bơdjơ̆ nao bruă anai. Ƀirô Khua pơ ala mơnuih ƀon sang dêh čar hok mơ-ak hăng amra đing tơngia hmư̆ tơlơi pơgôp hiăp mah mơng khul grup ƀudah rĭm čô mơnuih, kah hăng mơ-it hră pơ-ar, kiăng ngă hiưm pă, Ƀirô Khua pơ ala mơnuih ƀon sang dêh čar jai hrơi jê̆ giăm hăng tơlơi sit nik.

Siu Đoan: Pơblang