VOV4.Jarai - Rơwang hrơi tơjuh rơgao, Khua git gai wai lăng pơ ala mơnuih ƀôn sang dêh čar ta ơi Vương Đìng Huệ hmâo git gai Jơnum lăng nao rai mơng ataih pok pơhai bruă Khul pơ ala mơnuih ƀôn sang hơdôm bôh tơring čar, plơi prong kual Pơngŏ dêh čar ta thun 2022. Khua pơ ala khua mua hơdôm anih anom, ding jum gơnong bruă hăng rơbêh kơ 200 čô khua pơ ala mơng 25 bôh tơring čar, ƀôn prong gum pơhmư̆ mông jơnum. Rơkâo ba tơbiă amăng thun 2022 lĕ pơđĭ kơjăp dong bruă mă mơng Khul pơ ala mơnuih ƀôn sang hơdôm gưl.

Amăng mông jơnum, hơdôm tơlơi gum pơhiăp khua pơ ala bơkơtuai hơdôm tơlơi găn rơgao, bôh tơhnal bruă mă yôm phăn mơng Khul pơ ala mơnuih ƀôn sang kah hăng bruă lăng tui, bưp mơnuih ƀôn sang, pơsit hơdôm tơlơi yôm phăn mơng plơi pla; hrom hăng anun ba tơbiă hơdôm tơlơi rơkâo đĭ, kiăng pơđĭ dlông hloh dong bruă mă mơng Khul pơ ala mơnuih ƀôn sang. Yă Phùng Thị Hồng Hà, Kơ-iăng Khua Khul pơ ala mơnuih ƀôn sang ƀôn prong Hà Nội rơkâo đĭ:

“Rơkâo Jơnum min apăn bruă Khua pơ ala mơnuih ƀôn sang dêh čar črâo ba mă yua hơdôm tơlơi pơkă kơ bruă mă tơdơi kơ lăng tui, pơkă bruă gơgrong mơng pô apăn akô̆ anom bruă dưi lăng tui amăng ngă tui hơdôm tơlơi klah čun lăng tui mơng Khul pơ ala mơnuih ƀôn sang ƀôn prong, quận, tơring glông, plơi prong biă ñu lĕ amăng bruă lăng tui bruă mă mơng Jơnum min mơnuih ƀôn sang, Khua Jơnum min mơnuih ƀôn sang phường ƀơi hơdôm quận, plơi prong; kiăng pơhlôm Khua Jơnum min mơnuih ƀôn sang phường ngă tui djơ̆ bruă gơgrong, bruă mă dưi jao; bĕ lui raih amăng bruă mă lom ƀu hmâo Khul pơ ala mơnuih ƀôn sang phường lăng tui”.

Đơ đam anih jơnum

Ơi Sùng A Hồ, Khua Khul pơ ala mơnuih ƀôn sang tơring čar Lai Châu lăi lĕ, amăng bôh nik bruă mă mơng Khul pơ ala mơnuih ƀôn sang, hmâo lu tơlơi yôm phăn ƀudah kiăng ječ, phrâo hmâo kơplah wah dua tal jơnum bơdjơ̆ nao truh bruă ngă tui pơđĭ kyar bơwih ƀong – mơnuih mơnam – pơgang lŏn ia – rơnuk rơnua ƀơi plơi pla khom hmâo tơlơi pơsit mơtăm. Lom anun, tui hăng tơlơi pơkă mơng hơdôm tơlơi phiăn hăng hră pơ-ar gah yŭ tơlơi phiăn, bruă mă anai gah tơlơi dưi pơsit mơng Khul pơ ala mơnuih ƀôn sang lĕ, khom dô̆ tơguan truh tal jơnum Khul pơ ala mơnuih ƀôn sang tơring čar kah mơng pel ĕp, pơsit. Ơi Sùng A Hồ lăi đĭ tơlơi gum pơhiăp:

“Khua pơ ala mơnuih ƀôn sang dêh čar ta, Gong gai dêh čar khom kơsem min mă yua hră pơ-ar pơkă rơđah tơlơi dưi mơng Khul pơ ala mơnuih ƀôn sang tơring čar bơdjơ̆ nao truh bruă pel ĕp, pơsit hơdôm tơlơi phrâo hmâo kơplah wah dua tal jơnum Khul pơ ala mơnuih ƀôn sang. Pel ĕp glăi, pơkă rơđah hloh hơdôm bôh yôm či kiăng khom hmâo tơlơi pơpha bruă apăn ƀudah jao tơlơi dưi kơ Khul pơ ala mơnuih ƀôn sang pel ĕp, pơsit kơplah wah dua tal jơnum, biă ñu lĕ hơdôm bôh yôm bơdjơ̆ nao hơdră pơtrun tuh pơplai, wai lăng lŏn prăk kak, hơdôm tơlơi kiăng ječ phrâo hmâo; pơkă rơđah hơdră ngă, jơlan ngă tui dưi hmâo Khul pơ ala mơnuih ƀôn sang jao tơlơi dưi pơsir kơplah wah dua tal jơnum hăng bruă gơgrong mơng Khul pơ ala mơnuih ƀôn sang lom pơsit hơdôm tơlơi anun”.

Khua git gai wai lăng pơ ala mơnuih ƀôn sang dêh čar ơi Vương Đình Huệ pơhiăp klah čun bruă jơnum

Pơhiăp amăng mông pơđut jơnum, Khua git gai wai lăng pơ ala mơnuih ƀôn sang dêh čar ta ơi Vương Đình Huệ pơtă, lăi pơthâo dong, mut dơlăm dong bruă apăn, bruă mă, tơlơi dưi mơng Khul pơ ala mơnuih ƀôn sang, Grŭp apăn bruă Khul pơ ala mơnuih ƀôn sang, hơdôm Grŭp Khul pơ ala mơnuih ƀôn sang, Grŭp pơ ala kơ Khul pơ ala mơnuih ƀôn sang hăng khua pơ ala Khul pơ ala mơnuih ƀôn sang tui tơlơi pơkă mơng Tơlơi phiăn pơplih pơkra, pơhrua nao sa dua mơta tơlơi mơng Tơlơi phiăn pơphun bruă Gong gai dêh čar hăng Tơlơi phiăn pơphun gong gai plơi pla, biă ñu hăng ƀing khua pơ ala phrâo gum hrom tal blung a lĕ khua pơ ala Khul pơ ala mơnuih ƀôn sang.

“Pel ĕp dong, pơdŏng hăng ngă giong hăng pơphun ngă tui Akô̆ bruă pơplih phrâo dong, pơđĭ tui anô̆ kơjăp tal jơnum Khul pơ ala mơnuih ƀôn sang, bruă bưp mơnuih ƀôn sang, tơña hăng lăi glăi tơlơi tơña kiăng ngă klă hloh bruă jao, tơlơi dưi mơng Khul pơ ala mơnuih ƀôn sang tơring čar, ƀôn prong wot pơphun bruă hăng pơhlôm ngă tui Phiah phiăn hăng tơlơi phiăn; pơdŏng gong gai mă bruă mơnuih ƀôn sang, mă hră ruah, plĕ hră ruah; pơsit hơdôm tơlơi yôm phăn amăng hơdôm bruă hăng lăng tui bruă ngă tui Phiah phiăn hăng tơlơi phiăn ƀơi plơi pla. Bruă pơplih phrâo, pơđĭ tui bôh thâo, ba glăi bôh tơhnal, bôh tŭ yua bruă mă mơng Khul pơ ala mơnuih ƀôn sang khom lăng tui jơlan hơdră ngă tui Tơlơi pơtrun pơsit Jơnum prong Ping gah đơ đam dêh čar hăng Jơnum Ping gah tơring čar, ƀôn prong. Khom dŏng hăng lăng khua pơ ala Khul pơ ala mơnuih ƀôn sang lĕ phun than, anô̆ klă hăng bruă mă mơng khua pơ ala Khul pơ ala mơnuih ƀôn sang pơsit truh anô̆ kơjăp, bôh tŭ yua mơng bruă mă gah Khul pơ ala mơnuih ƀôn sang lăi hrom. Djop hơdră pơtrun pơsit bơdjơ̆ nao plơi pla tui tơlơi dưi khom mă mơnuih ƀôn sang, anom bơwih ƀong ngă phun akha, dưm bôh tŭ yua lŏn ia, djuai ania ƀơi dlông hloh hăng blung hlâo hloh”.

Khua git gai wai lăng pơ ala mơnuih ƀôn sang dêh čar ta ơi Vương Đình Huệ rơkâo, mơng tơlơi găn rơgao mơng Khua pơ pơ ala mơnuih ƀôn sang dêh čar hăng Khul pơ ala mơnuih ƀôn sang sa dua bôh tơring čar, ƀôn prong, Khul pơ ala mơnuih ƀôn sang hơdôm bôh tơring čar, ƀôn prong pơphun pel ĕp glăi, pơdŏng, lăi pơthâo gưl ping gah hrom sa gưl hluai tui hơdră pơtrun ƀudah Khul pơ ala mơnuih ƀôn sang mă yua Tơlơi pơtrun pơsit kơ jơlan hơdră čih pơkra hơdôm hră pơ-ar pơkă tơlơi phiăn kơ rơwang bruă kiăng gơgrong hlâo tañ, mơng ataih amăng pơdŏng pơjing, ngă giong glông bruă, hơdră pơkă pơčeh phrâo pơđĭ kyar bơwih ƀong – mơnuih ƀôn sang mơng plơi pla; đing nao bruă pơplih phrâo hơdôm Tơlơi pơtrun pơsit pha ra mơng Khua pơ ala mơnuih ƀôn sang pioh kơ hơdră pơphun gong gai hăng hơdră bruă pha ra kơ sa dua bôh tơring čar, ƀôn prong./.

            VOV1: Čih – Siu H’ Prăk: Pơblang