Kual Tong Krah - Dap Kơdư hơmâo 19 boh tơring čar, plơi prong. Dua kual anai hơmâo kual lŏn, tơlơi bơwih ƀong, gru grua, mơnuih mơnam phara, hơmâo lu tơlơi gêh gal samơ̆ ăt ƀu ƀiă ôh tơlơi tơnap, tơlơi lông. Anai jing hơdôm bruă kiăng lăp đing nao amăng bruă iâu pơthưr pơtô ba ƀing đah kơmơi hăng hơdôm hơdră djru phara kơ ƀing đah kơmơi ƀơi hơdôm boh tơring čar kual Tong Krah - Dap Kơdư. Amăng kual anai, ƀôn prong Đà Nẵng jing tơring čar hơmâo lu đah kơmơi ngă khua hloh, ngă bruă amăng ping gah 3 gưl mơtăm laih anun lu tal 3 amăng dêh čar ta kơ mrô đah kơmơi ngă khua amăng ping gah. Hơdôm boh tơring čar kah hăng Nghệ An, Thừa Thiên-Huế, Dak Nông hơmâo mrô đah kơmơi ngă khua anom bruă ping gah đĭ tui lu hloh amăng kual mơ̆ng tơring čar, truh pơ tơring glông, să.

Tơring čar Kon Tum, Dak Lăk hăng Gia Lai hơmâo đah kơmơi ngă khua amăng anom bruă ping gah lĕ mơnuih ƀôn sang djuai ƀiă lu hloh (yap tui abih bang mrô đah kơmơi ngă khua amăng ping gah). Lơ̆m anun, Gia Lai jing tơring čar hơmâo lu tơlơi hmư̆ hing, hăng mrô đah kơmơi ngă khua amăng ping gah ƀơi 3 gưl lêng kơ djơ̆ hăng rơgao rơnoh pơkă ƀơi Tơlơi pơčrâo trun mrô 35-CT/TW mơ̆ng Ding jum kơđi čar. Mrô đah kơmơi ngă khua pơ ala mơnuih ƀôn sang dêh čar hăng khua amăng Jơnum min pơ ala mơnuih ƀôn sang tơring čar Gia Lai rơgao kơ 30% mrô pơkă, dong tal 4 amăng kual Tong Krah - Dap Kơdư.

Tui hăng hơdôm tơlơi hơmâo lăi pơthâo ƀơi mông Jơnum, hrŏm hăng pơđĭ kyar bơwih ƀong huă, tơlơi hơdip ƀing đah kơmơi 19 boh tơring čar kual Tong Krah - Dap Kơdư hơmâo pơplih rơđah. Ơi Võ Thanh An, Khua anom pơtô ba mơnuih ƀôn sang, Khua Jơnum min djŏp djuai ania mơnuih mơnam Việt Nam tơring čar Quảng Ngãi lăi, tơlơi lăp hơdor rơđah hloh tơlơi gơgrong bruă mơ̆ng đah kơmơi kual anai lĕ đah kơmơi ngă khua amăng ping gah, gong gai, đah kơmơi pơ ala mơnuih ƀôn sang dêh čar hăng tơring čar lu hloh kơ mơ̆ng hlâo. Bruă ruah đah kơmơi ngă khua pơ ala mơnuih ƀôn sang dêh čar hăng Jơnum min pơ ala mơnuih ƀon sang djŏp gưl ră anai lêng kơ đĭ soh, hơmâo lu đah kơmơi thun hlăk ai, hrăm bruă kơđi čar, apăn bruă, djơ̆ hăng tơlơi kiăng, hloh kơ rơwang bruă hlâo.

“Mơ̆ng bruă krăp lăng, Jơnum min djŏp djuai ania mơnuih mơnam tơring čar Quảng Ngãi ƀuh ƀing tơbiă anăn ruah ngă khua pơ ala mơnuih ƀôn sang dêh čar hăng Jơnum min pơ ala mơnuih ƀôn sang djŏp gưl lêng kơ klă, rơgơi, dưi ngă bruă hrŏm abih bang mơnuih. Pơtruh brơi Ping gah, gong gai hăng Khua mua pơ ala mơnuih ƀôn sang dêh čar hăng Jơnum min pơ ala mơnuih ƀôn sang djŏp gưl, hăng mơnuih dưi plĕ hră ruah khua”...

Khă hnun, rơngiao kơ hơdôm tơlơi klă, ăt hơmâo mơn lu bruă kiăng lăp đing nao. Mrô pơđĭ kyar đah kơmơi ƀơi lu bruă aset hloh kơ rơnoh pơkă tong krah amăng dêh čar, kah hăng mrô mơnuih mă bruă hơmâo hrăm bruă aset, prăk pơhrui pơset, mrô sang anŏ rin lu; taih amang amăng sang anŏ ăt lu mơn; mrô đah kơmơi djuai ƀiă ngă khua prong hơmâo aset đôč pơhmu hăng đah kơmơi ngă bruă amăng kơnuk kơna. Yă Siu H’Thoan, Khua khul pơlir hơbit đah kơmơi tơring glông Čư̆ Prong, tơring čar Gia Lai pơgôp hiăp:

“Adơi amai glăk lăp đing nao bruă ră anai lĕ bruă mă, prăk pơhrui. Bơwih ƀong dŏ tơnap biă. Amăng anun ăt bơdjơư nao tơlơi pơmin, tơlơi dưi či pơđĭ kyar. Adơi amai mơnuih djuai ƀiă lu ƀing gơñu ngă hmua, bruă mă yua hơdôm tơlơi bơwih brơi hơmâo ƀiă đôč, tơlơi gêh gal pơđĭ kyar aset anun bruă hơduah ĕp bruă mă, djru ba adơi amai hơmâo pran jua pơđĭ kyar bơwih ƀong jing bruă yôm biă mă”.

Pơ ala kơ Grup pơphun jơnum, yă Nguyễn Thị Minh Hương, Kơ-iăng khua khul đah kơmơi Việt Nam bơni kơ hơdôm tơlơi hơmâo bơkơtuai, tơlơi rơkâo mơ̆ng ƀing pơ ala, laih anun čang rơmang anai amra jing sa amăng hơdôm phun tơhnal kiăng tơring čar ba tơbiă hơdră pơđĭ tui tơlơi gơgrong bruă mơ̆ng đah kơmơi; ba tơbiă hơdră ngă bruă tong ten či pơphun ngă hơdôm hơdră djru kơ ƀing đah kơmơi tŭ yua; ngă gal brơi kiăng ƀing khua đah kơmơi dưi pơtrut tui tơlơi rơgơi, pơđĭ tui tơlơi kơdrưh mơ̆ng ƀing gơñu či gum pơgôp, djru kơ sang anŏ hăng mơnuih tơpuôl.

“Hơdôm bruă anai ăt hơmâo laih ping gah, gong gai lăng ba, khă hnun ăt dŏ hơmâo mơn tơlơi dŏ ataih mơ̆ng hră pơ-ar hăng bruă ngă sit nik. Pô ngă khua amăng khul ăt ƀuh mơn tơlơi gơgrong bruă mơ̆ng gơñu lĕ khŏm ngă bruă gir, hur har, thâo pơčeh phrâo hloh amăng bruă ngă tui hơdôm jơlan hơdră laih anun khŏm lăng ba ƀing đah kơmơi pơkŏn yua dah amăng grup amra hơmâo anŏ phara mơn, wơ̆t hăng grup mơnuih djuai ƀiă ăt hơmâo lu grup pơkŏn mơn, kiăng pơsit rơđah tơlơi kiăng mơ̆ng rim čô mơnuih đah mơ̆ng ngă bruă lăp djơ̆ laih anun hơmâo hơdră ngă bruă djơ̆ hăng rim čô mơnuih”.

Hăng 2 wơ̆t jơnum hơmâo “Bruă ngă gah ƀing đah kơmơi hăng bruă ngă tui hơdră djru hăng grup đah kơmơi phara hơjăn” hăng “Bruă đah kơmơi ngă khua hăng pơtrut tui tơlơi gơgrong bruă mơ̆ng ƀing khua đah kơmơi”, jơnum bơkơtuai hơmâo pơhmư̆, hơdor lui hơdôm tơlơi pơgôp hiăp đah mơ̆ng ngă klă hloh tơlơi gơgrong bruă mơ̆ng ƀing đah kơmơi amăng rơnuk phrâo. Amăng anun, phun ñu lĕ pơđĭ kyar bơwih ƀong huă, mơnuih mơnam, gru grua, pơđĭ tui tơlơi hơdip mơda, pran jua kơ đah kơmơi djuai ƀiă, đah kơmơi tui đăo hăng pơđĭ tui tơlơi apăn bruă mơ̆ng ƀing khua amăng Khul pơlir hơbit đah kơmơi ƀơi plơi pla, kiăng pơplih phrâo hơdră ngă bruă kiăo tui tơlơi kiăng sit nik laih anun hơmâo hơdră djru hlâo či pơphun klă hơdôm jơlan hơdră ngă bruă glăk hơmâo gah ƀing đah kơmơi.