​Sit biă ñu ră anai, lơ̆m jơlan hơdră akŏ pơdong plơi pla phrâo hơmâo ngă giong lĕ bruă nao rai ƀơi jơlan ƀơi hơdôm boh să kual čư̆ siăng mơ̆ng Khánh Hoà lêng kơ hơmâo pơkra bêtông, prong hiam. Jơlan hiam, samơ̆ tơlơi thâo hluh nao rai ƀơi jơlan mơ̆ng neh met wa pơ anai aka ƀu hơmâo ôh, abih bang aka ƀu thâo pơmin, ƀu kơđiăng ôh lơ̆m mơgăt rơdêh, biă ñu lĕ hlăk ai kah hăng: ƀu đoa muk pơgang akŏ, đĭ hmar, bliă rơdêh ča čot, pơgiăng lu đơi mơnuih...Ƀơi kual čư̆ siăng, lu mơnuih đĭ rơdêh thut lĕ ƀing hlăk ai, tui anun ƀing mơnuih thâo tơlơi phiăn lơ̆m đĭ rơdêh lĕ khŏm klum muk pơgang akŏ samơ̆ thâo hă ƀŭ, ngă tui hă ƀŭ lĕ yua tơlơi pơmin rim čô mơnuih mơn. Amai Cao Thị Dân ƀơi să Cầu Bà, tơring glông čư̆ siăng Khánh Vĩnh, tơring čar Khánh Hoà brơi thâo:

“Đa đĭ rơdêh lĕ thâo klum muk pơgang akŏ, đa lĕ ƀu klum ôh yua dah sang jê̆”.

Ƀơi čư̆ siăng, lu čơđai glăk 12, 13 thun đôč mơgăt rơdêh thut pơkra mă laih. Mơ̆ng anet tui anun baih, truh kơ prong mah aka ƀu nao hrăm tơlơi phiăn nao rai ƀơi jơlan, aka ƀu hơmâo hră mơgăt rơdêh samơ̆ tơdah hơmâo rơdêh lĕ đĭ hyu yơh. Sit nik hơmâo ƀơi kual čư̆ siăng lĕ rơdêh gơñu pơkra mă dong, ƀu rơnuk rơnua ôh, samơ̆ rơdêh anai hơmâo lu tơdăm ngek dra muai đĭ biă. Hơmâo mơn ƀing hlăk ai mơñum tơpai giong đĭ rơdêh đuăi hyu ƀơi jơlan. Ơi Triệu Mạnh Hải, tơring glông Khánh Vĩnh, Khánh Hoà brơi thâo:

“Tơlơi thâo hluh ƀơi anai aset biă, dua dong lĕ hrăm ƀu truh anih lơ̆m hơmâo rơdêh lĕ đuăi hyu ča čot đôč. Tơhan wai lăng jơlan bơtơhmal kah mơ̆ng thâo pô ñu ngă soh, samơ̆ bruă rơgao baih, hiư̆m thâo ngă dong”.

Tơhan kông an jơlan glông juăt dŏ glăk pel ĕp, bơtơhmal ƀing ngă soh, samơ̆ pơdong anih dŏ gak juăt ngă ƀơi jơlan prong đôč. Yua hnun, hơdôm glông jơlan mut nao rai amăng să, amăng plơi hơmâo hlăk ai ngă soh aka ƀu hơmâo pơsir ôh. Hơdôm wơ̆t hyu pơtô pơblang, pơtă pơtăn hai ăt aka ƀu pơplih mơn tơlơi pơmin ngă tui tơlơi phiăn jơlan nao rai mơ̆ng mơnuih ƀôn sang čư̆ siăng. Sa amăng hơdôm tơlơi tơnap dong mơ̆ng bruă pơhlôm rơnuk rơnua jơlan nao rai amăng kual čư̆ siăng lĕ tơhan kông an wai lăng jơlan hơmâo ƀiă đôč mơnuih lơ̆m anun plơi pla prong biă. Sa amăng hơdôm hơdră ngă bruă mơ̆ng Khánh Hoà hăng bruă thâo pơmin thâo hluh kơ tơlơi phiăn nao rai jơlan glông kơ neh met wa djuai ƀiă, kual čư̆ siăng lĕ pơtrut tui tơlơi grong bruă mơ̆ng tha plơi, khua plơi, mơnuih ană plơi kơnang amăng plơi, mơ̆ng anun pok prong, pơsur gơñu jing mơnuih hyu pơtô pơblang tơlơi rơnuk rơnua lơ̆m nao rai ƀơi jơlan. Ơi Nguyễn Ngọc Hoa, Khua jơnum min mơnuih ƀôn sang să Khánh Trung, tơring glông Khánh Vĩnh brơi thâo:

“Ƀing gơmơi ruah sa čô mơnuih pơ ala brơi mơnuih ană plơi kơnang ăt kah hăng mơnuih djuai ƀiă či gum ngă bruă pơtô pơblang, tap năng jao kơ kông an tơña, pơtô brơi, pơtă pơtăn ƀing juăt ngă soh tơlơi phiăn nao rai ƀơi jơlan”.

Rim hrơi ƀơi lu glông jơlan čư̆ siăng ăt dŏ hơmâo mơn hlăk ai tơdăm dra đĭ rơdêh pơkra mă, ƀu klum muk pơgang akŏ hăng bruă mơgăt rơdêh ngă kơ lu mơnuih dŏ kơtuă mơn. Anom bruă tơhan kông an wai lăng jơlan Kông an tơring čar Khánh Hoà hơmâo hơbô̆ bruă pơtô pơblang mơnuih ƀôn sang kơ “Pơtô tơlơi phiăn rơnuk rơnua nao rai ƀơi jơlan kơ mơnuih ƀôn sang čư̆ siăng Khánh Vĩnh rơwang thun 2021-2025”. Mơ̆ng anun hơmâo pơtô lu wơ̆t laih kơ giăm 1 rơbâo čô pơ ala kơ hơdôm anom bruă, grup, hơdôm anom bruă kơđi čar, tha plơi; mơnuih ƀôn sang djuai ania ƀiă ƀơi 3 boh să Liên Sang, să Cầu Bà, să Sơn Thái (gah tơring glông Khánh Vĩnh) hăng Sang hră trung cấp pơtô hrăm bruă kơ ană bă djuai ƀiă tơring glông Khánh Vĩnh...Brơi 70 boh muk pơgang akŏ, plĕ hră ƀơi jơlan kơ rơnuk rơnua jơlan nao rai; ƀuăn ngă tui tơlơi rơnuk rơnua jơlan glông kơ ƀing čơđai sang hră; pơkra 2 kơƀang pôr pơhing rơnuk rơnua hăng boh pia “Tơhan wai lăng jơlan nao rai yua rơnuk rơnua ƀơi hơdôm glông jơlan” ƀơi Jơlan 27C ƀơi 2 boh să Cầu Bà hăng să Sơn Thái. Mah bruă pơhlôm hơđong rơnuk rơnua jơlan glông ƀơi kual čư̆ siăng mơ̆ng Khánh Hoà ăt aka ƀu hơmâo tui hăng tơlơi kiăng, khă hnun hăng tơlơi gum ngă khut khăt kar hăng ră anai, sit nik amăng hrơi blan pơ anăp, bruă pơhlôm rơnuk rơnua jơlan nao rai amăng kual čư̆ siăng amra hơmâo tơlơi pơplih klă, djru plai ƀiă tơlơi truh pơjrom pơtlă ƀơi jơlan đơ đam tơring čar.