Ƀơi tơring glông kual čư̆ siăng Bắc Yên tơring čar Sơn La, lu čơđai sang hră aka ƀu djop thun, ƀu hơmâo hră mơgăt rơdêh thut samơ̆ ăt đĭ rơdêh thut nao pơ sang hră, đĭ rơdêh thut ƀu klum muk kaih pơgang akŏ, pơgiăng 2,3 čô đĭ boh rơdêh thut, đĭ rơdêh dăp pơgăn, đĭ hmar, blă tă tăn, seng nao rai..., anun lĕ rup ƀuh ƀu hin ôh ƀơi jơlan glông amăng tơring glông Bắc Yên. 

Yak nao amăng thun hrăm phrâo 2023-2024, tơhan pơlih jơlan glông, wai lăng tơlơi rơnuk rơnua hơđong mơ̆ng sang bruă kông an tơring glông Bắc Yên hơmâo ngă hrŏm lu sang hră pơtrut bruă pôr pơthâo pơtô pơblang tơlơi phiăn rô nao rai ƀơi jơlan brơi čơđai sang hră thâo hluh.

Đại uý Lê Hữu Nhân-Kơ-iăng khua grup tơhan pơlih jơlan glông-pơgang rơnuk rơnua mơ̆ng anom bruă kông an tơring glông Bắc Yên brơi thâo, amăng blan 9/2023, jing blan tơlơi gơgrong ba brơi čơđai sang hră ngă tui djơ̆ tơlơi phiăn jơlan glông nao sang hră thun hrăm phrâo. Kiăng pơđĭ tui tơlơi thâo hluh, rŏng ngă tui hiam tơlơi phiăn pơkă rô nao rai ƀơi jơlan glông, jing ƀing čơđai sang hră, boh nik ñu čơđai sang hră mơnuih djuai ƀiă dŏ amăng djop plơi pla ataih mơ̆ng sang hră, nao rai pơ sang hră đĭ rơdêh thut, tơhan pơlih jơlan glông gah kông an tơring glông Bắc Yên hơmâo pơpha tơhan hyu dŏ krăp, hyu tir hrơi mlam. Đại uý Lê Hữu Nhân brơi thâo:

“Tơhan pơlih jơlan glông pơpha mơnuih mă bruă hyu tir, hyu krăo lăng djop anih hrơi mlam. Biă mă ñu gơmơi brơi sem lăng djop hnơr thun čơđai sang hră đĭ rơdêh thut ngă soh glăi kah hăng: pơkiăo nao rai, đĭ blă tă tăn, seng ieo hnuă, ƀu gưt klum đuăn pơgang akŏ lơ̆m đĭ rơdêh thut, laih dơ̆ng ngă hrŏm khua mua sang hră, nai pơtô pok mông pơtô lăi, pôr pơthâo tơlơi phiăn kơnuk kơna pơkă kơ bruă rô nao rai ƀơi jơlan glông, kah hăng ngă rŏm amĭ ama čơđai sang hră, pơtô lăi ƀing čơđai juăt ngă soh glăi, laih anun lăi pơthâo hăng ƀing nai pơtô ƀơi sang hră kiăng hơmâo hơdră pơtô lăi, bơtơhmal pơhŭi gơñu djơ̆ tui tơlơi phiăn pơtrun”.

Thun hrăm 2023-2024, đơ đam tơring glông Bắc Yên hơmâo 45 boh sang hră hăng rơbêh 20.000 čô čơđai sang hră mơ̆ng gưl muai trun anih 5, anih 9 hăng truh anih 12. Ƀing čơđai sang hră anih pơprong ƀiă thâo hluh laih kơ bruă tơhan pơlih jơlan glông gah kông an tơring glông Bắc Yên pôr pơthâo djơ̆ gêh găl hnơr thun čơđai sang hră. Adơi Lèo Thị Nga Diệu, hrăm anih 11A, sang hră pơtô re se tơring glông Bắc Yên lăi:

“Laih sa hrơi hmư̆ tơlơi pơtô pơblang djru kơ kâo hăng ƀing gơyut thâo hluh tong ten kơ Tơlơi phiăn jơlan glông, sit ta rô nao rai amăng jơlan glông đĭ rơdêh thut lĕ klum đuăn pơgang akŏ, ƀu dưi đĭ seng nao rai, blă ča čot ôh”.

Adơi Lèo Thị Nga Diệu lăi pơthâo dơ̆ng: “Tơlơi hơmâo ƀơi tơring glông Bắc Yên gơmơi lĕ gơyut čơđai sang hră aka truh thun dưi mơgăt rơdêh thut ôh samơ̆ amĭ ama ăt jao rơdêh thut brơi đĭ nao hrăm hră. Lu wơ̆t glăi mơ̆ng sang hră, ƀing gơyut anun gơñu pơgiăng lu đĭ hmar, blă ča čot, seng ieo hnuă, mah ƀơi jơlan hơmâo lu gơyut čơđai sang hră phrâo tơbiă mơ̆ng sang hră glăi pơ sang. Kâo ƀuh tui anun hŭi rơhyưt đơi. Hơmâo sa wơ̆t ƀiă tra ƀing gơyut anun đĭ rơdêh thut jrŏm djơ̆ yua gơñu đĭ hmar đơi, hŭi biă mă”.

Amăng 9 blan akŏ thun 2023, Grup tơhan pơlih jơlan glông pơgang rơnuk rơnua, kông an tơring glông Bắc Yên hơmâo ngă hrŏm djop sang hră gưl klâo Bắc Yên, sang hră đôm lăm kơnuk kơna čem rông hăng sang hră gưl klâo Bắc Yên, sang hră pơtô re se, pơtô hrăm bruă, pơtô brơi tơlơi phiăn jơlan glông hơmâo 3 mơguah brơi 1.130 wơ̆t čơđai sang hră dŏ hmư̆, ƀơk hơdôm pok hră tơlơi pơhing pơtô lăi kơ tơlơi rơnuk rơnua jơlan glông. Anom bruă Pơtô hăng Pơjuăt tơring glông ngă hrŏm pơphun pơtô 42 wơ̆t pok hơmâo giăm 9.700 wơ̆t khua mua, ƀing nai pơtô hăng čơđai sang hră hmư̆. Nai pơtô Bạc Văn Ân-Kơ-iăng khua sang hră đôm lăm gưl dua hăng sang hră gưl klâo Bắc Yên brơi thâo:

“Sang hră đôm lăm gưl dua hăng gưl klâo Bắc Yên hơmâo pơtô lăi kơ čơđai sang hră hơdôm tơlơi pơkă amăng Tơlơi phiăn hăng lu hơdră ngă kah hăng mông jơnum kơkuh kơ akŏ rơwang hrơi tơjuh, rim mơguah hrơi sa, pơtô hrăm lu mông hrăm gah rơngiao amăng anun hơmâo jak iâu tơhan pơlih jơlan glông gah kông an tơring glông Bắc Yên ngă hrŏm sang hră pơtô pơblang tơlơi phiăn jơlan glông, mơ̆ng anun kiăng tơlơi phiăn dưi ngă tui sit nik amăng bruă mă rim hrơi, ƀing čơđai sang hră thâo hluh hăng ngă tui djơ̆ tơlơi phiăn pơtrun”.

Hăng lu hơdră ngă tui sa hnong, tong ten čih pơkra hăng lu hơdră tum teč, tơlơi hâo hluh mơ̆ng čơđai sang hră tơring glông kual čư̆ siăng Bắc Yên tơring čar Sơn La jai hrơi dưi pơđĭ tui, mah hnun bruă pơgang tơlơi rơnuk rơnua jơlan glông jing sa bruă mă ječ ameč kiăng biă mă djop sang bruă kơnuk kơna gum tơngan hrŏm hăng mơnuih mơnam, pioh pơtô lăi, pôr pơthâo djop mơta tơlơi pơtrun dưi pơlar hyu lu hăng prong hloh.