VOV4.Jarai-Ding jum ia jrao pơtong rơđah, truh ră anai tơlơi pơhing klin kheng dưi wai lăng laih mơ̆n amăng dêh čar ta. Samơ̆, mrô mơnuih amăng plơi pla ăt dŏ đĭ na nao đôč yua kơ mơnuih mơnam pok glăi bruă mă kah tơđar. Hơdôm ƀing ƀă Covid 19, gong gai kơnuk kơna djop plơi pla hrom hăng ƀing ơi ia jrao, nai ia jrao laih anun ƀing mă bruă amăng gơnong bruă ia jrao ăt djru ba nao mơnong ƀong huă, gơnam yua  kiăng kơ djop mơnuih djơ̆ kman Covid 19 lêng kơ dưi lăng ba djru pơjrao bơkơnar soh. 

Phrâo anai, Sang ia jrao prong ƀôn prong Cần Thơ hơmâo tŭ jum 45 tơn oxy mơ̆ng ƀing mơnuih čơmah djru, pioh pơjrao kơ mơnuih duăm ruă dŏ đih pơ sang ia jrao pơjrao Covid 19 ruă kraih. Ƀơi mông tŭ mă gơnam djru, ơi ia jrao kơhnăk hnong II, Trần Quốc Luận, Khua sang ia jrao prong ƀôn prong Cần Thơ lăi, hơmâo tơlơi gum hrom mơ̆ng lu sang bruă kơnuk kơna, mơnuih ngă bruă sĭ mơdrô, ƀing čơmah amăng djop anih djru ba jing sa gơnam yôm ƀu hơmâo anŏ pơkă pioh kơ ƀing ruă djơ̆ kman Covid 19 hơđong pran jua đih pơjrao:

‘’Hăng hnong oxy pơpha brơi, kâo pơmin lĕ amăng mông anai yôm pơphăn biă mă, boh nik ñu hăng 300 čô mơnuih ruă djơ̆ kman Covid 19 pơjrao ƀơi glông pơngŏ tal dua hlăk duăm kraih laih anun amăng glông tal klâo pơ anai. Ƀing gơmơi  gir run mă yua rơnoh oxy hơmâo anai tŭ yua hloh, pơkrem hloh pioh pơjrao djop brơi kơ mơnuih duăm ruă  ƀă Covid 19’’.

Ră anai, djop tơring čar, ƀôn prong hơmâo akŏ pơjing khul nai ia jrao hyu pơjrao tơl sang anŏ amăng djop să, phường, tơring kual pioh djru, wai lăng hăng pơjrao brơi kơ ƀing F0 pơ sang mơtam. Ngă hrom hăng ƀing ơi ia jrao dŏ mă bruă amăng sang ia jrao, gơnong bruă ia jrao, Anom bruă hlăk ai tưodăm dra mut phung djop tơring čar, plơi pla jak iâu djru kơdung ia jrao pioh djru kơ mơnuih ƀă Covid 19 dŏ pơjrao pơ sang. Ayong Dương Hiệp Hưng, Khua anom bruă tơdăm dra mut phung plơi prong Quy Nhơn, tơring čar Bình Định brơi thâo:

‘’Ƀing gơmơi lăi pơthâo hrĕ telephôn hơmâo mrô iâu ječ, hơmâo tơlơi hơgĕt kiăng tơña lĕ, iâu nao pơ sang ia jrao, ƀing ơi ia jrao hyu pơjrao tơl sang ăt kah hăng iâu ƀing hlăk ai tơdăm dra mut phung djru ba. Ră anai, ƀing gơmơi hơmâo ba nao 136 čô mơnuih pơyơr pran jua djru djop plơi pla tui kru hơduah ĕp ƀing jĕ giăm mơnuih ƀă klin, test hmar kiăng tañ ƀuh’’.

Hrom hăng anun, kiăng pơhrŏ ƀiă mrô mơnuih ƀă klin duăm kraih tui lĕ, khom pơgang ană plơi, djru brơi dưi hơmâo ia jrao tañ, tŭ mă mơ̆ng ataih; laih anun pơtô brơi thâo hluh hơdră pơhlôm, pơgang mă pô amăng sang anŏ, hơmâo ƀing nai ia jrao djru brơi, ba gơnam yua gah ia jrao, mơnuih mă bruă, djru ia jrao, oxy...kiăng djop anŏ pơđĭ pran brơi mơnuih duăm ruă, ngă hrom  ia jrao akha kyâo hăng ia jrao prang pioh pơjrao mơnuih duăm ruă.

Tui hăng Ding jum ia jrao, ră anai, amăng mrô rơbêh 200 rơbâo čô mơnuih ƀă Covid 19 hlăk dŏ pơjrao amăng dêh čar ta, hơmâo rơbêh 100 rơbâo čô F0 dŏ pơjrao pơ sang, dưm dưm 47%; giăm 15 rơbâo čô mơnuih dŏ pơjrao pơ anih pơčlah mơnuih mơnam pơtum, dưm dưm hăng 7%; mrô dŏ glăi lĕ giăm 100 rơbâo čô  dŏ pơjrao pơ sang ia jrao. Hrơi blan giăm anai, mrô mơnuih djai yua klin Covid 19 ăt lu pơ ƀôn prong Hồ Chí Minh hăng či lu glăi dơ̆ng ƀơi Bình Dương, Đồng Nai, tăp năng pơ plơi prong jưh jom Hà Nội.

Kiăng pơhlôm brơi mơnuih ƀôn sang ƀă Covid 19 lêng kơ dưi pơjrao bơkơnar soh, Ding jum ia jrao prăp lui djop laih ia jrao pơgang klin, hơmâo 46 mơta ia jrao tui hră pơtrun mrô 2626 mơ̆ng Ding jum ia jrao. Tui hăng Kơ-iăng Khua dêh čar ơi Vũ Đức Đam, amăng akŏ bruă, Ding jum ia jrao ảma blơi 400 rơbâo liêu Molnupiravir, samơ̆ truh ră anai kiah hơmâo 250 rơbâo liêu. Samơ̆, dŏ hơmâo wơ̆t ia jrao pơkơdong glăi hăng virus pơkŏn anun lĕ ia jrao Favipiravir, ră anai dŏ 2 klăk asar ia jrao. Abih bang ia jrao anun  amra mă yua pơjrao kơ mơnuih duăm ruă ƀă Covid 19. Kơ-iăng Khua dêh čar, ơi Vũ Đức Đam rơkâo:

‘’Favipiravir brơi pơpha nao kơ djop tơring čar, hlơi ƀă klin lĕ ƀơk mơtam pioh pơjrao. Pơ anăp anai amra hơmâo dơ̆ng ia jrao Pfizer hăng lu sang măi hlăk prăp lui pơkra ia jrao Molnupiravir amăng dêh čar ta pô. Ră anai, hlăk ngă giong hơdră pioh pơjrao mơnuih duăm ruă pơ sang anŏ mơtam. Kiăng pơhrŏ mrô mơnuih djai, khom hơmâo hơdră krăo lăng rĭm mơnuih duăm ruă. Hăng glông pơngŏ tal 2, glông tal sa pơkă lăng pơjrao mơ̆ng ataih, sit mơ̆n ƀu lui kơ hlơi ôh lăi ƀu pơkă lăng mơ̆ng ataih, glông tal 2 lĕ pơjrao ƀơi anăp mơta’’.

Kơ-iăng Khua dêh čar ơi Vũ Đức Đam ăt pơtrun hiăp, Ding jum ia jrao khom prăp lui djop ia jrao, ƀu lui kơƀah ia jrao ôh; git gai, pơtô brơi djop tơring čar, djop sang ia jrao prăp lui blơi ia jrao pioh pơjrao; gơgrong ba pơtong glăi djuai ia jrao, wai lăng mă tong ten djop ia jrao blơi hăng mă yua; pơpha hơdôm ia jrao hơmâo pioh pơjrao djơ̆ anŏ hăng hmao kru; khom ia jrao pơđôm lui hŭi hơmâo tơlơi ječ ameč či kiăng.

Laih dơ̆ng, pơtô brơi, ngă gêh găl brơi djop sang bruă, anom bruă blơi ia jrao, pơkra ia jrao pơjrao Covid 19; pơtrut mă yua lông lăng, jao boh thâo ia rơgơi laih kơsem min, pơkra vaccine, pơkra ia jrao pơjrao Covid 19 amăng dêh čar kiăng prăp lui hlâo ia jrao ta pô laih anun dưi pơkrem prăk kăk.

Nay Jek: Pơblang