Hơdor glăi tơlơi pơhiăp mơ̆ng ơi Trần Việt Hòa, Khua Anom bruă pơkĕ hyu apui apui lơtrik, Ding jum sĭ mơdrô dêh čar amăng mông jơnum hăng mơnuih mă tơlơi pơhing phrâo kơ tơlơi apui yua yua kơ Ding jum sĭ mơdrô dêh čar git gai lơ 7/6/2023 – lơm hmâo pioh kơƀah apui lơtrik amăng mông hmâo lu mơnuih mă bruă bơyan phang khôt rơnuč blan 5, akô̆ blan 6 kual Kơdư dêh čar ba truh tơlơi khom pơdjai apui pơplih nao rai ƀơi lu anih.

 “Khă hmâo gir run abih pran jua pioh pơhlôm apui lơtrik yua, samơ̆ bruă pioh kơƀah apui lơtrik pioh kơ bruă pơđĭ kyar bơwih ƀong – mơnuih mơnam lĕ bruă gơgrong ƀu dưi prah pơgang ôh. Ƀing gơmơi mơ-ĭt tơlơi rơkâo păp ñai abih bang mơnuih ƀôn sang, anom bơwih ƀong, hăng sa wot dong rơkâo ƀing čih tơlơi pơhing phrâo gŏng phun pôr jua pơhiăp hơdôm tơlơi pơhing pơkrem apui lơtrik pioh ƀing ta gum tơngan hrŏm, pioh hmâo hơdôm jơlan pơsir kiăng yak rơgao rơwang tơnap tap anai”.

Bôh nik kơƀah apui hmâo ba truh ƀu anet laih bruă ngă đang hmua – bơwih ƀong sĭ mơdrô mơ̆ng anom bơwih ƀong hăng tơlơi hơdip mơda mă yua mơ̆ng rim mơnuih ƀing ta. Amăng tơlơi kơƀah apui yua ƀơi kual Kơdư dêh čar, rơbêh kơ 4.000 MW apui lơtrik pơkĕ hăng jua angin ƀơi kual Tŏng Krah dêh čar, Dap Kơdư hăng kual Dơnung dêh čar hmâo ngă giong laih, samơ̆ ƀu dưi pơhrua mut amăng glông apui lơtrik ôh yua kơ lu bôh than, amăng anun ƀuh rơđah hloh lĕ bôh thâo pơkĕ hyu apui hăng kơƀah hơdôm gru than djơ̆ phiăn mơ̆ng rim rơwang bruă. Tơdơi kơ hơdôm tơlơi truh anai, ƀirô wai lăng kơnuk kơna lăi rơđah: Amra kơsem min, gơgrong hlâo pơdŏng hơdôm hơdră dăp pơplih tañ bŏng glăi hăng hơdôm tơlơi tơnap kơ apui yua pioh plai ƀiă kơƀah apui kơ mơnuih ƀôn sang hăng anom bơwih ƀong.

Hơdôm tơlơi črâo ba hluai tui hơdôm hră pơ-ar, tơlơi pơtrun mơ̆ng Gong gai dêh čar, Khua dêh čar truh gưl Ding jum, gơnong bruă, anom bơwih ƀong – tơlơi rơkâo amăng djop tơlơi amra hmâo, ƀu dưi pioh hmâo tơlơi kơƀah apui yua, kơƀah apui yua – hmâo ba tơbiă laih amăng ha mơkrah rơnuč thun 2023, biă ñu lơm hơdôm Tơlơi pơkă abih bang kơ apui yua mơ̆ng lŏn ia; Pơkă pơđĭ kyar apui lơtrik lŏn ia hăng Pơkă kual pơdŏng anih djă pioh apui, ia xăng ia jâo, hyuh gas mơ̆ng lŏn ia rơwang 2021-2030, tơhnal lăng nao truh thun 2050 dưi hmâo Khua dêh čar pơsit amăng hơdôm blan 5, 6, 7 phrâo rơgao. Tơlơi ba tơbiă lĕ ngă hiưm hơpă pioh pơplih phrâo hơdôm jơlan gah hmâo ba tơbiă amăng hră Pơkă kual anai, kiăng pơhlôm djop apui yua? Nai prin tha Nguyễn Anh Tuấn, gah Khul kơsem min bôh thâo hơdrôm hơdră pơhing apui yua Việt Nam tơpă lăi tui anai, amăng đơ đam dêh čar ƀơi anăp hăng sui thun leng kơ kiăng khom pơsir abih kiăng pơkrem apui yua nao hrŏm hăng tuh pơplai hơdôm apui lơtrik phrâo:

 “2024-2025 mơ̆ pơiă hang kah hăng blan 5 blan 6 phrâo rơgao hă sit ñu kual Kơdư glăi kơƀah mơ̆ ƀu hmâo hơdră hơget pioh pơsir. Ră anai kơnong kơ hmâo pơkrem apui lơtrik đôč, yua ƀiă hĭ. Gong gai dêh čar, hơdôm ding jum, gơnong bruă bơdjơ̆ nao khom ngă tui khut khăt, ƀu pơtrut kơ hlơi ôh, biă ñu hơdôm ding jum bơdjơ̆ nao”.

Hmâo hơdôm bruă bơkơtuai na nao amăng dêh čar hăng jar kơmar kơ apui yua, amăng anun pơđĭ kyar apui yua pơkra glăi, laih anun mă yua pơkrem hăng ba glăi bôh tơhnal apui yua “rŭ đĭ” amăng thun 2023. Lu tơlơi pơtă dưi ba tơbiă, nao hrŏm hăng tơlơi rơkâo mơtah, agaih, pơplih apui yua dưm kơnar. Pô juăt bruă bơwih ƀong, Nai prin tha Võ Trí Thành tơpă ară lăng ƀuh: mrô ngăn rơnoh – ană mơnuih – hơdră phrâo măi mok hăng bôh thâo pơkă – hơdră bruă lĕ hơdôm bôh yôm phun kiăng tañ pơtlaih ngăn rơnoh tuh pơplai mơnuih ƀôn sang kơ pơđĭ kyar bruă apui lơtrik, yua kơ rim thun Việt Nam kiăng pơhrua nao dong ƀiă hloh 14 – 16 klai prăk dolar Mi pioh ngă tui tơlơi Pơkă apui yua 8 tui djơ̆ hơdră dăp.

Ƀơi anăp, kiăng pơhlôm apui lơtrik yua thun 2024, Khua Ding jum sĭ mơdrô dêh čar ta Nguyễn Hồng Diên rơkâo hơdôm bôh anom bơdjơ̆ nao khom ngă klă 2 bruă pơhlôm apui yua hăng pơkrem apui lơtrik hăng lăng anai lĕ dua jơlan pơsir yôm phăn pơhlôm apui lơtrik amăng thun 2024:

 “Tui hăng tơlơi črâo ba mrô 29 mơ̆ng Khua dêh čar lĕ rim sang măi khom pơhlôm apui yua phun kơ bruă mă mơ̆ng sang măi pơkĕ apui. Tui anun hăng khom ngă tui tơpă Tơlơi črâo ba mrô 20 mơ̆ng Khua dêh čar kơ bruă kơtưn pơkrem apui lơtrik kơ rơwang 2023 – 2025. Kâo lăi lĕ jơlan pơsir pơkrem apui lơtrik ăt lĕ jơlan kiăng biă, yap wot hơdôm dêh čar pơdrŏng arăng ăt khom pơkrem apui lơtrik mơn. Ƀing ta mă yua apui lơtrik khưi khai đơi. Yua kơ nua apui yua ƀiă, yua kơ tơlơi črâo ba pơkrem apui ƀing ta akă sit nik brơi ƀuh dơlăm brơi kơ mơnuih mă yua apui, anun yơh ngă khưi khai lu. Tơlơi pơtrun 20 mơ̆ng Khua dêh čar hmâo lăi lu rơđah laih, ƀing ta khom ngă tui”./.