Ƀơi Dak Lăk, Khul khua pơ ala mơnuih ƀôn sang dêh čar tơring čar ngă hrŏm hăng Kông an tơring čar jơnum mă tơlơi pơgôp hiăp hăng Hơdrôm tơlơi phiăn Hình sự (čih pơkra glăi), Tơlơi phiăn akŏ pơdong anom bruă hơduah ĕp kơđi hình sự (čih pơkra phrâo) hăng Tơlơi pơtrun kơ tơlơi pơkă, hơdră djru phara hơjăn pơsir hĭ bruă ngă soh tơlơi phiăn bơdjơ̆ nao bơwih ƀong huă kơnuk kơna, bơwih ƀong huă mơnuih ƀôn sang ngă pô, mă yua boh thâo mrô, ia rơgơi, tơlơi pơčeh phrâo hăng ba yua ia rơgơi mrô.

Ƀing khua tŭ ư kiăng biă pơtrun tơlơi phiăn, tơlơi pơtrun djơ̆ hăng tơlơi kiăng ră anai. Lu tơlơi pơgôp hiăp kah pơpha anih dưi hơduah ĕp kơđi, lăng glăi djŏp tơlơi pơkă gah bruă bơtơhmal, lui hĭ bơtơhmal ƀudah pơdơi jăng jai ngă kơđi hình sự, laih dong pơhrua hơdôm bruă ngă soh, anăn tơlơi soh phrâo.

Pơgôp hiăp hăng Hơdrôm tơlơi phiăn Hình sự (čih pơkra glăi), pô pơ ala mơ̆ng Gơnong bruă Tơlơi phiăn tơring čar Dak Lăk lăi bruă mă yua anăn iâu “tơlơi soh bơkơnar”, “tơlơi soh kơtang hloh”, “tơlơi soh tơdu ƀiă” ƀơi črăn 6, Tơlơi pơkă 4 aka ƀu lăp djơ̆ hăng bruă čih tơlơi phiăn ôh: “Anăn tơlơi soh jing anăn arăng iâu mơ̆ng ƀing ngă soh, ƀu djơ̆ či lăi nao tơlơi soh kơtang, rơnang ƀudah không bơtơhmal hơget ôh. Yua hnun, kiăng sem lăng či mă yua boh pia anai pơhlom brơi anŏ djơ̆ amăng hră tơlơi phiăn”.

Hăng Tơlơi phiăn anom bruă hơduah ĕp kơđi hình sự (čih pơkra glăi), lu tơlơi pơgôp hiăp lăi nao hơdôm tơlơi aka ƀu hruaih amăng bruă hơduah ĕp kơđi, biă ñu lĕ anom bruă hơduah ĕp kơđi dua gưl. Thượng tá Đặng Quang Hưng, Khua kông an phường Ea Kao, tŭ ư čih pơkra jing tơlơi phiăn djŏp bruă mă, tơlơi dưi mơ̆ng ƀing hơduah ĕp kơđi jing Khua ƀudah kơ-iăng khua Kông an să, laih ding čih pơkra ngă giong tơlơi pơkă pơhlom ngă tui tŭ yua: “Kiăng pơkă rơđah kơ bruă jao, tơlơi dưi, tơlơi gơgrong bruă mơ̆ng rim čô mơnuih, rim anom bruă, hăng pơsir bruă mă lơ̆m mơnuih mă bruă kơƀah, ƀudah pơdơi bruă, pơhrua tui mơnuih mă bruă; laih dong pơsit rơđah tơlơi gơgrong mơ̆ng pô hơmâo jao bruă ăt kah hăng djŏp mơta tơlơi bơdjơ̆ nao bruă jao glăi tơlơi dưi pơsir kơđi. Bruă kơƀah tơlơi pơkă pô git gai, tơlơi gơgrong bruă hăng hơdră pơplih phrâo amra amuñ ngă bơrơkua, ngă tơnap lơ̆m ngă tui tơlơi git gai hăng lơ̆, ngă tui djŏp bruă tơgŭ kơđi”.

Khul khua pơ ala mơnuih ƀôn sang dêh čar tơring čar Dak Lăk čih pioh lu tơlơi pơgôp hiăp, djơ̆ hăng anŏ či kiăng. Hơdôm tơlơi pơgôp hiăp amra hơmâo pơtum glăi, mơit kơ Khua mua pơ ala sem lăng lơ̆m čih pơkra djŏp tơlơi phiăn, tơlơi pơtrun ƀơi mông jơnum.

Hrŏm hăng Dak Lăk, Kông an tơring čar Lâm Đồng ăt ngă hrŏm hăng Khul khua pơ ala mơnuih ƀôn sang dêh čar tơring čar jơnum pôr pơthâo, mă tơlơi pơgôp hiăp hăng hơdôm tơlơi phiăn, tơlơi pơtrun yua Ding jum kông an čih pơkra. Mông jơnum hơmâo pơphun ƀơi anăp wơ̆t hăng lăng mơ̆ng ataih tui tivi hăng hơdôm Kông an să, phường, kual wai lăng hơjăn amăng tơring čar.

Ƀing khua pơƀut pơgôp hiăp hăng Tơlơi phiăn hình sự (čih pơkra glăi), Tơlơi phiăn anom bruă hơduah ĕp kơđi hình sự (čih pơkra glăi) hăng Tơlơi pơtrun hơdră ngă bruă phara pơsir kơđi tơlơi ngă soh bơdjơ̆ nao bơwih ƀong huă kơnuk kơna ngă pô, bơwih ƀong mơnuih ƀôn sang ngă pô, mă yua boh thâo ia rơgơi, pơčeh phrâo hăng ba yua ia rơgơi mrô. Lu tơlơi pơgôp hiăp lăi, bruă čih pơkra, pơhrua tui hơdôm tơlơi pơkă kơ tơlơi phiăn jing bruă kiăng biă amăng rơnuk mă yua boh thâo mrô, dăp glăi anom bruă kơnuk kơna hăng ngă bruă tui gong gai dua gưl, mơ̆ng anun pơjing tơlơi phiăn bơkơnar, djơ̆ hăng bruă pơhlom rơnuk rơnua, hơđong kjăp hăng đĭ kyar bơwih ƀong huă - mơnuih mơnam.

Hơdôm tơlơi pơgôp hiăp abih pran jua, djơ̆ hăng tơlơi glăk hơmâo hơmâo laih Khul khua pơ ala mơnuih ƀôn sang dêh čar hơdôm boh tơring čar pơtum glăi, mơit kơ Khua mua pơ ala mơnuih ƀôn sang dêh čar hăng hơdôm anom bruă čih pơkra đah mơ̆ng sem lăng, čih pơgiong hơdôm tơlơi phiăn hlâo či pơdah pơ Khua mua pơ ala gơnong dlông sem lăng. Mơ̆ng anun, pơsit tơlơi gơgrong mơ̆ng Khul khua pơ ala amăng bruă pơhmư̆, djă pioh hơdôm tơlơi pơgôp hiăp mơ̆ng mơnuih ƀôn sang hăng ba tơlơi hơmâo sit nik ƀơi Dap Kơdư truh pơ sang jơnum./.