VOV4.Jarai - Bruă pơhrư̆i bruă hrăm lăng nao rai mơng ataih ƀu djơ̆ kơnong kơ bơbeč truh anô̆ kơjăp bruă hrăm hră ôh mơ̆ ñu dô̆ ba truh tơlơi suaih pral, tơlơi pơmin, brô̆ prong mơng čơđai sang hră dong. Lu anih anom brơi thâo, amra ba čơđai sang hră pơwot glăi sang hră tơdơi kơ Tết tui phiăn juăt kah hăng tơlơi črâo ba mơng Khua dêh čar.

Hăng sa amăng hơdôm bôh tơring čar bơbeč prong mơng klin Covid-19 hăng mrô mơnuih ƀă klin đĭ lu na nao, Tây Ninh ƀơƀrư̆ pơwot glăi hăng bruă mă amăng ƀrư̆ pơgăn klin hăng tlâ̆o vaccine kơ čơđai sang hră amăng hnưr thun nao sang hră. Ră anai mrô mơnuih tlâ̆o vaccine ară tal sa hăng ară tal 2 kơ čơđai sang hră mơng anih 7 truh anih 12 leng kơ hmâo 90%. Ơi Võ Đức Trong, Kơ-iăng Khua Jơnum min mơnuih ƀôn sang tơring čar Tây Ninh brơi thâo, pơkă hlâo, tơring čar amra pok bah amăng sang hră kiăng čơkă abih bang čơđai sang hră nao sang hră:

“Tơdơi kơ mă tơlơi gum pơhiăp mơng amĭ ama čơđai sang hră lĕ Tây Ninh hmâo pok pơhai pơphô hlâo kơ 2 anih, lĕ anih 9 hăng anih 12. Amăng hơdôm hrơi giăm anai mrô čơđai nao sang hră lĕ 76% hrăm ƀơi sang lĕ 24%. Tơlơi tơdơi kơ hơdôm hrơi hrăm ƀuh klă biă, anun lĕ akă hmâo hlơi ƀă klin. Pran jua hrom lĕ Tây Ninh amra rơgao Tết tui phiăn juăt lĕ ƀing gơmơi amra pok pơhai hrăm ƀơi sang hră amăng abih bang gưl hrăm. Hơdôm bruă prăp lui truh ră anai lĕ Tây Ninh phun ñu prăp lui djơ̆ tui pran jua pơtô ba mơng Ding jum pơtô pơhrăm ăt kah hăng Ding jum ia jrao mơn”.

Ră anai sa dua anih anom hmâo klin ngă lu mơng tal gluh đĭ Covid-19 tal 4 kah hăng ƀôn prong Hồ Chí Minh glăk pơphun amăng ƀrư̆ pok bah amăng sang hră. Ơi Nguyễn Văn Hiếu, Khua Gơnong bruă pơtô pơhrăm ƀôn prong Hồ Chí Minh brơi thâo, ră anai mrô čơđai sang hră mơng anih 7 truh kơ anih 12 nao sang hră hmâo 98%, mrô čơđai nao hrăm ƀă Covid-19 ƀu lu ôh, anun ƀôn prong glăk pel ĕp kiăng ba čơđai sang hră hnưr anet hloh nao sang hră:

“Rơgao kơ pơphun bruă mă ƀơi anăp lĕ dua gơnong bruă: Ia jrao hăng pơtô pơhrăm amra hmâo kơčăo bruă lăi pơthâo kơ Jơnum min mơnuih ƀôn sang ƀôn prong ba tơbiă dong, yap wot lơ 7/2 anun lĕ tơdơi kơ Tết tui phiăn juăt amra pơphun brơi čơđai sang hră mơng anih 6, čơđai sang hră gưl sa hăng čơđai anet dưi nao sang hră tui tơlơi pơkă rŏng gơgrong mơng amĭ ama čơđai”.

Lu anih anom pơpkon ăt hmâo laih tơlơi pơkă lăng hlâo ba abih bang čơđai pơwot glăi sang hră tơdơi kơ Tết tui phiăn juăt, samơ̆ tơlơi ba tơbiă khom pơhlôm klă hăng lăi pơhing kiăng ngă hơđong pran jua amĭ ama čơđai sang hră, ngă gal brơi hăng gum hrom ngă tui hơdôm bruă pơgang klin. Hà Nội ăt amăng ƀrư̆ bưp mơn tơlơi anai lom pok bah amăng sang hră, pha ra lĕ hmâo anih đa yua bơngot klin ruă kơnong kơ hmâo sa cô čơđai nao sang hră. Ơi Trần Thế Cương, Khua Gơnong bruă pơtô pơhrăm ƀôn prong Hà Nội brơi thâo, pơkă hlâo lơ 7 hăng lơ 8/2 amra brơi čơđai sang hră mơng anih 7 truh kơ anih 12 pơwot sang hră. Gơnong bruă pơtô pơhrăm hăng gơnong bruă ia jrao hmâo pơdŏng hơdôm hră pơ-ar lăi pơthâo pơhlôm hloh kơ čơđai sang hră lom nao hrăm pơ̆ sang hră. Khă hnun hai, tơlơi tơnap hloh ră anai anun lĕ tơlơi kơƀah mơnuih mă bruă ia jrao amăng sang hră kiăng bơwih brơi tơlơi suaih pral kơ čơđai sang hră:

“Ră anai, bruă ia jrao amăng sang hră lĕ lu biă. Kơnong hăng Hà Nội lĕ giăm truh 450 čô mơnuih mă bruă ƀơi sang hră kơƀah. Yua anun mơ̆ ră anai Hà Nội glăk hmâo jơlan gah lĕ ruah mơnuih mă bruă ia jrao hmâo pơdơi lơtret kiăng gum hrom bruă ia jrao ƀơi hơdôm bôh sang hră. Dua lĕ rơkâo sang ia jrao hơdôm bôh să, phường, tơring kual gum hrom, samơ̆ bôh nik ñu ăt tơnap mơn. Rơkâo Ding jum pơtô pơhrăm, Ding jum ia jrao, Ding jum apăn bruă ping gah lăng ba hiưm hơpă kơ hơdôm anih anom hmâo bruă ia jrao amăng sang hră, pơhlôm klă, bơwih brơi tơlơi suaih pral kơ ƀing čơđai sang hră, biă ñu amăng tơlơi klin Covid ngă”.

Kơ-iăng Khua Ding jum ia jrao Nguyễn Trường Sơn ăt djru mơn bruă pok bah amăng sang hră glăi yua kơ Việt Nam hmâo mrô mơnuih tlâ̆o vaccine ară tal 3 giăm truh kơ abih bang laih. Čơđai muai 12 thun truh 17 thun ăt dưi tlâ̆o pơgang hăng pơ̆ anăp anai tlâ̆o pơgang kơ čơđai mơng 5 thun truh 11 thun dong:

Bruă ba ƀing čơđai pơwot glăi sang hră lĕ kiăng biă amăng hơdôm hrơi anai. Hơdôm hrơi anai ƀing ta ăt hmâo mơn mơnuih ƀă klin. Dua lĕ bruă pok bah amăng sang hră kơ čơđai nao sang hră dô̆ hluai tui hơdôm anô̆ pơhlôm klă, amăng anun sang anô̆ khom pơhlôm, sang hră pơhlôm hăng yap wot plơi pla mơnuih mơnam anih anom anun khom pơhlôm klă hăng kâo pơmin tơdơi kơ Tết tui phiăn juăt lĕ djơ̆ biă”.

Kiăng gal brơi kơ hơdôm anih anom pok bah amăng sang hră, pơ̆ anăp anai, Ding jum ia jrao amra tañ hmâo hră pơ-ar črâo ba pơplih pơkra kơ hơdră pơsit rơnoh klin, Ding jum pơtô pơhrăm kiăo tui anun mă yua hră pơ-ar pơplih pơkra hơdôm hră pơ-ar hơđăp kiăng djơ̆ hăng tơlơi pơtô ba mơng Ding jum ia jrao amăng tơlơi phrâo. Rơngiao kơ anun, Ding jum pơtô pơhrăm amra hmâo dong sa dua tơlơi pơtô ba čơđai anet kiăng gal brơi kơ hơdôm anih anom pok pơhai./.

Minh Hường: Čih – Siu H’ Prăk: Pơblang