VOV4.Jarai-Ƀơi ƀôn prong Hồ Chí Minh, Jơnum min apăn bruă git gai pơ ala mơnuih ƀôn sang dêh čar phrâo jơnum pơƀut bruă mă gah Khul khua mua pơ ala mơnuih ƀôn sang djop tơring čar, ƀôn prong gah dơnung thun 2021 laih anun pok pơhai bruă mă thun 2022. Him lăng amra hơmâo 160 čô khua pơ ala Jơnum min pơ ala mơnuih ƀôn sang, djop grup khua mua pơ ala mơ̆ng 20 boh tơring čar, ƀôn prong gah kual dơnung. Klah čun ƀơi mông jơnum, Khua git gai pơ ala mơnuih ƀôn sang dêh čar ơi Vương Đình Huệ lăi pơthâo 8 bruă mă khom gleng nao phun.

Kiăng bruă mă mơ̆ng Khul khua pơ ala mơnuih ƀôn sang djop gưl mă bruă tŭ yua hloh pơ anăp anai, ƀơi mông jơnum, ƀing khua mua pơ ala hơmâo tom găn rơgao lu thun amăng bruă mă, ăt kah hăng lu tơlơi rơkâo đĭ hăng khua git gai pơ ala mơnuih ƀôn sang dêh čar. Tui hăng  Kơ-iăng Khua jơnum min pơ ala mơnuih ƀôn sang tơring čar Vĩnh Long, ơi Nguyễn Minh Dũng, Jơnum min apăn bruă git gai pơ ala mơnuih ƀôn sang dêh čar kiăng čih pơkra tañ tơlơi pơkă mă bruă kơ khua mua pơ ala mơnuih ƀôn sang djop tơring čar, dăp bruă hmar hơbôt ƀiă čih pơkra tơlơi phiăn pơtrun kơ bruă mă kơ djop gưl gêh găl hăng tơlơi pơhing hơmâo sit nik.

“Jơnum min apăn bruă git gai pơ ala mơnuih ƀôn sang dêh čar kiăng ngă hră tơlơi phiăn krăo lăng bruă pơsir tơlơi rơkâo mơ̆ng mơnuih ruah khua hăng tum teč rơđah rơđong hloh. Bruă pơsir tơlơi tơgŭ kơđi, rơkâo pơsir glăi hơmâo tơlơi phiăn pơtrun baih, samơ̆ tơlơi pơtrun khut khăt hăng bruă pơsir tơlơi rơkâo anun aka ƀu hơmâo tơlơi pơtrun djơ̆ lăp ôh pioh ƀư̆ pơkra glăi amăng bruă. Ƀuh rơđah ră anai, hơdôm anom bruă pơsir hră kơđi mơnuih ƀôn sang ngă dŏ kaih đơi, aka ƀu djơ̆ sa hnong, lu tơlơi lăi pơthâo tal jơnum anai, samơ̆ tơl jơnum lok tơdơi kah mơ̆ng hơmâo hră lăi glăi, kaih biă mă”.

Khua git gai pơ ala mơnuih ƀôn sang dêh čar ơi Vương Đình Huệ klah čun ƀơi mông jơnum

Pơhiăp klah čun amăng mông jơnum, Khua git gai pơ ala mơnuih ƀôn sang dêh čar ơi Vương Đình Huệ lăng yôm bruă mă mơ̆ng djop sang bruă mơnuih ƀôn sang ruah đĭ, amăng thun 2021, sa amăng hơdôm thun phara biă mă, thun blan a pok pơhai ngă tui Hră pơtrun jơnum ping gah dêh čar tal 13, thun pơphun plĕ hră ruah khua pơ ala mơnuih ƀôn sang, khua pơ ala mơnuih ƀôn sang djop gưl laih anun phara hloh dơ̆ng thun hơmâo lu tơlơi tơnap tap yua klin kheng Covid 19 ngă, răm ƀăm kơtang biă mă:

“Kah hăng hơmâo jua angin phrâo rơ-ơ̆ hloh, beč bal, thâo pơčeh phrâo, jĕ giăm hăng bruă mă amăng tơlơi hơdip mơda, ngă djơ̆ pơsir bruă či kiăng ječ ameč mơ̆ng anom bruă mơnuih ƀôn sang ruah đĭ hăng pơgôp hrom yôm biă mă hrom hăng djop gơnong bruă kơđi čar, hơmâo tơlơi git gai mơ̆ng Ping gah, pok pơhai ngă tui Hră pơtrun ping gah dêh čar ta pơtrun, Hră pơtrun mơ̆ng ping gah tơring čar, kiăng gum hrom amăng dêh čar ngă klă bruă mơduah, pơhlôm pơgang klin Covid 19 tŭ yua, laih anun djă hnong bruă mă bơwih ƀong huă hăng djop bruă mă tơđar pơkŏn klă hloh hăng rŭ glăi tơlơi bơwih ƀong huă mơnuih mơnam”.

Rơngiao kơ pơphun dua wơ̆t jơnum lok kah hăng tơđar, lu tơring čar, ƀôn prong jơnum mông phara ječ ameč kiăng pơsit lu boh yôm phun kơ bruă pơhlôm, pơgang klin Covid 19 tui hăng Hră pơtrun mrô 30 mơ̆ng Khua mua pơ ala mơnuih ƀôn sang dêh čar tal XV laih anun bruă mă bơwih ƀong huă mơnuih mơnam dêh čar. Khua mua pơ ala mơnuih ƀôn sang djop gưl ƀơi tơring čar, ƀôn prong hơmâo ngă lu hră pơtrun mơ̆n ngă anŏ gêh găl čih pơkra tơlơi phiăn kơ bruă ngă tui pơtrut bơwin ƀong huă mơnuih mơnam, pơhlôm pơgang klin Covid 19. Boh nik ñu, hơmâo lu anih ngă giong bruă jao amăng mông jơnum lok pơtrun.

Kơ hơdră ngă bruă pơ anăp adih hăng hơdră pơsir bruă mă thun 2022 mơ̆ng khua mua pơ ala mơnuih ƀôn sang tơring čar, ƀôn prong, Khua git gai pơ ala mơnuih ƀôn sang dêh čar ơi Vương Đình Huệ hơmâo lăi pơthâo 8 mơta bruă phun kiăng đing nao, amăng anun rơkâo, pơsit tong ten, thâo hluh rơđah bruă mă mơ̆ng khua pơ ala mơnuih ƀôn sang dêh čar hơmâo čih pơkă amăng Tơlơi phiăn pơphun bruă kơnuk kơna gong gai kơnuk kơna tơring čar pơyŭ. Ĕp glăi, akŏ pơdong hăng ngă giong laih anun pơphun kơčăo bruă brơi pơblih phrâo, pơđĭ tui boh tŭ yua mơ̆ng khua mua pơ ala mơnuih ƀôn sang djop gưl amăng tơring čar.

Khua git gai pơ ala mơnuih ƀôn sang dêh čar ơi Vương Đình Huệ mă rup hơdor pioh

Pơkra hơdră pơkă kơ 5 thun mă bruă, rĭm črăn rơđah rơđong hloh. Ngă tui klă hloh bruă akŏ pơdong kơnuk kơna pơđĭ khua khom plĕ hră ruah đăo kơnang, pơsit hơdôm tơlơi yôm amăng bruă krăo lăng  ngă djơ̆ Phiah phiăn laih anun tơlơi phiăn pơtrun amăng tơring čar, krăo lăng hơdôm mơta tơlơi pơtrun ngă tui mơ̆ng Jơnu min mơnuih ƀôn sang sa gưl hrom hăng hră pơtrun mơ̆ng khua jơnum min pơ ala mơnuih ƀôn sang gưl tơring glông. Khua git gai pơ ala mơnuih ƀôn sang dêh čar ơi Vương Đình Huệ lăi pơtong.

“Jơnum min pơ ala mơnuih ƀôn sang tơring čar, ƀôn prong khom ngă hră pơtrun tañ hmao kru pioh ngă tui hăng krăo lăng ngă tui Hră pơtrun mơ̆ng khua pơ ala mơnuih ƀôn sang, Kơnuk kơna kơ pơđĭ kyar bơwih ƀong huă mơnuih mơnam, prăk kăk, prăk kơnuk kơna tuh pơ alin kơ bruă čar thun 2022, hơdôm hơdră pơtrun mơ̆ng dêh čar, boh nik ñu Hơdră pơhlôm, pơgang klin Covid 19 mơ̆ng thun 2022-2023 tui hăng hơdră bong glăi rơnuk rơnua, rŭ glăi bơwih ƀong huă mơnuih mơnam. Rơđah biă mă ñu, jơlan hơdră pơhrua nao dơ̆ng khom hơmâo bruă krăo lăng 2 hơdră anai laih anun hơdôm tơlơi pơtrun rơđah rơđong mơ̆ng sang bruă pơ ala mơnuih ƀôn sang, Kơnuk kơna laih anun hơdôm tơlơi klah čun mơ̆ng khua mua apăn bruă ping gah dêh čar”.

Khua git gai pơ ala mơnuih ƀôn sang dêh čar ơi Vương Đình Huệ rơkâo jơnum min pơ ala mơnuih ƀôn sang djop tơring čar, ƀôn prong kơtưn bruă hyu pơtô pơblang hăng ngă tui boh thâo ia rơgơi bơwih brơi kơ bruă mă mơ̆ng mơnuih ƀôn sang dêh čar ƀơi jơnum lok kah hăng ƀu hơmâo hră pơar, pơsit tŭ ư hăng điện tưt mơ̆ng ataih yua ngă tui mrô, krăo lăng hăng rup; ăt khom ĕp glăi, ngă giong hăng pơphun ngă tui tơlơi phiăn hơdai gum hrom kơplah wah grup khua pơ ala mơnuih ƀôn sang dêh čar hăng pơ ala mơnuih ƀôn sang tơring čar, khua mua phun pơ ala mơnuih ƀôn sang, djop khul grup mơ̆ng anom bruă pơ ala mơnuih ƀôn sang, hăng jơnum min mơnuih ƀôn sang hăng Sang bruă wai lăng djop djuai ania mơnuih mơnam Việt Nam tơring čar, ƀôn prong pioh pơđĭ tui boh tŭ yua kơ djop sang bruă, anom bruă.

Laih dơ̆ng ngă tui klă tơlơi phiăn pơkôl mă bruă mơ̆ng khua mua phun pơ ala mơnuih ƀôn sang tơring čar; Tơlơi phiăn tŭ jum pơsir kơđi mơnuih ƀôn sang mơ̆ng khua mua pơ ala mơnuih ƀôn sang tơring čar, khua mua pơ ala mơnuih ƀôn sang; Boh yôm phun jơnum lok khua mua pơ ala mơnuih ƀôn sang tơring čar kiăng pơhlôm djơ̆ bruă ngă mơnuih ƀôn sang ngă khua pô laih anun pơđĭ tui tơlơi gơgrong ba, tơlơi pơmin mơ̆ng lu mơnuih.

Ơi Vương Đình Huệ, Khua git gai pơ ala mơnuih ƀôn sang dêh čar ta brơi thâo, Jơnum min apăn bruă git gai pơ ala mơnuih ƀôn sang dêh čar ăt khom ngă rơđah boh yôm phun gah lăm, ngă giong djop mơta hră pơar pơtô brơi ngă tui hăng krăo lăng amăng bruă mă mơ̆ng ƀing pơ ala mơnuih ƀôn sang.

Nay Jek: Pơblang