VOV4.Jarai - Ƀơi tơring čar Sóc Trăng, Jơnum min djuai ania phrâo gum hrom hăng Khul djuai ania mơng Khua pơ ala mơnuih ƀôn sang dêh čar, Ping gah tơring čar, Jơnum min mơnuih ƀôn sang tơring čar Sóc Trăng pơphun Bơkơtuai: “Pok pơhai ngă tui Jơlan hơdră pơkă mơng lŏn ia pơđĭ kyar bơwih ƀong – mơnuih mơnam kual djuai ania ƀiă hăng kual čư̆ siăng rơwang mơng thun 2021-2025 kual lŏn dăo ia krông Cửu Long”.

Bơkơtuai pok pơhai ngă tui Jơlan hơdră pơkă mơng dêh čar pơđĭ kyar bơwih ƀong – mơnuih mơnam kual djuai ania ƀiă hăng kual čư̆ siăng rơwang mơng thun 2021-2025 kual lŏn dăo ia krông Cửu Long

Pơhiăp crâo ba bruă Bơkơtuai, Kơ-iăng Khua dêh čar ta ơi Phạm Bình Minh, pơsit, bruă Bơkơtuai tal anai tŭ yua biă, sit nik amăng mông thun 2022 lĕ thun prăp lui, pơjing phun akha kiăng ngă tui hơdôm tơhnal pơkă hmâo ba tơbiă amăng Tơlơi pơtrun pơsit Jơnum prong Ping gah tal 13 hăng Kơčăo bruă pơđĭ kyar bơwih ƀong – mơnuih mơnam 5 thun mơng thun 2021-2025 lĕ, thun blung a ngă tui Jơlan hơdră pơkă mơng dêh čar pơđĭ kyar bơwih ƀong – mơnuih mơnam kual neh wa djuai ania ƀiă hăng kual čư̆ siăng rơwang mơng thun 2021-2025. Tui hăng Kơ-iăng Khua dêh čar, jơlan hơdră pơkă mơng dêh čar kơ djuai ania ƀiă hăng kual čư̆ siăng hmâo bôh tŭ yua prong biă, djru pơtrut jơlan nao, pơjing bruă mă, pơđĭ kyar bơwih ƀong huă, sĭ mơdrô, laih anun hmâo bôh tŭ yua kơ tơlơi hơdip mơnuih mơnam, biă ñu lĕ hăng hơdôm mơnuih ƀu hmâo anih gơnang, sang anô̆ hmâo tơlơi hơdip tơnap ƀơi hơdôm kual asuek, ataih./.

Siu H’ Prăk: Pơblang