Mơ̆ng anun, kiăng pơđĭ kyar bơwih ƀong huă mơnuih mơnam đah mơ̆ng plai ƀiă kơplah wah djuai ania ƀiă dŏ pơ kual ataih hăng kual giăm plơi prong amăng tơring čar.

Rơnuč thun 2020 giăm 50 boh sang anŏ ƀut Cao Biền, să Phú Thượng, tơring glông Võ Nhai mơ̆ng hơmâo apui lơtrik dêh čar. Cao Biền ăt jing ƀut tal rơnuč amăng tơring čar lom lui tơlơi ƀu hơmâo apui lơtrik. Tơlơi anai hơmâo pơƀuh rơđah, tŭ yua kơčăo bruă pơkĕ apui lơtrik kual plơi pla tơring čar Thái Nguyên, mơ̆ng thun 2016-2020. Amai Triêụ Thị Sinh, ƀut plơi Cao Biền, să Phú Thượng, tơring glông Võ Nhai lăi:

“Hlâo adih pơkĕ yua apui lơtrik dar hăng jua ia anet pioh pơčrang bơngač amăng sang anŏ samơ̆ ƀu thâo pơkĕ yua măi pơrơ-ŏt gơnam ƀong huă ôh. Mơ̆ng hrơi hơmâo apui lơtrik ƀuh djop mơta bruă dưi ngă soh, hok mơak biă mă blơi mơtam yơh tủ lạnh kiăng pioh lui gơnam ƀong huă”.

Ơi Triêụ Phúc Tiến, Khua ƀut plơi Cao Biền, să Phú Thượng, tơring glông Võ Nhai, lăi:

Dưi hơmâo ping gah, Kơnuk kơna dăng hrĕ apui lơtrik truh pơ plơi Cao Biền gơmơi mơak biă mă. Anai lĕ sa tơlơi kiăng mơ̆ng hơdôm hơpluh thun hăng anai mơ̆ng mơnuih ƀôn sang pơ anai”.

Ƀu kơnong hơmâo apui lơtrik đôč ôh, hơdôm jơlan hơdră djuai ania phara anun ăt dưi hơmâo tơring čar Thái Nguyên čih pơkra hăng ngă tui kah hăng; Hơdră djru hră Iôt pơhlôm, pơgang tơlơi ruă bơbrah blong ko, čơđai ƀu găng añrăng tơlơi pơmin; Hơdră pơtrut pơđĭ kyar bơwih ƀong huă, mơnuih mơnam kual ATK anih hơkrŭ đưm hăng kual mơnuih djuai ƀiă dŏ tơnap tap ƀun rn; Kơčăo bruă djă pioh, pơđĭ kyar gru grua djop djuai ania mơnuih mơnam tơring čar Thái Nguyên ngă tui truh thun 2020….Ơi Lý Văn Mùa, Khua git gai ping gah ƀut plơi Lũng Luông, să Thượng Nung, tơring glông Võ Nhai lăi:

“Kơnang kơ lu hơdră djru kơ mơnuih ƀôn sang duiw pơklaih mơ̆ng ư̆ rơpa, ngă gêh găl kơ mơnuih ƀôn sang pơđĭ kyar bơwih ƀong huă, ăt kah hăng man pơdong bruă ngă djă pioh gru grua đưm mơ̆ng mơnuih ƀôn sang, plơi pla”.

Phrâo anai, Hră pơtrun mrô 39 mơ̆ng Jơnum min mơnuih ƀôn sang tơring čar Thái Nguyên pơkă kual pơhrăm mơnuih mă bruă kơnuk kơna kơ djuai ania ƀiă kah hăng jak iâu mut hrăm sang hră đôm lăm kơnuk kơna čem rông ba pioh kơ  djuai ania ƀiă"” ăt jing sa jơlan hơdră phara hơjăn kiăng plai ƀiă anŏ phara tơnap tap. Ơi Nguyễn Thái Nam, Kơ-iăng Khua anom pơtô lăi mơnuih ƀôn sang ping gah tơring čar, Khua hơđăp anom bruă djuai ania tơring čar Thái Nguyên lăi:

"Jơnum ruah khua ping gah tơring čar Thái Nguyên hơmâo tơhnal pơkă yôm biă mă, kơtưn ngă tui 8% mrô ană amôn mơnuih djuai ƀiă dưi hrăm pơ sang hră đôm lăm. Kơnang kơ hră pơtrun mrô 39 gah anom bruă pơtô pơjuăt tơring čar Thái Nguyên hơmâo jak iâu djop mrô čơđai sang hră mut hrăm”.

Tơdah kah hăng thun 2016, tơring čar Thái Nguyên dŏ hơmâo 48 boh să tơnap tap lĕ truh abih thun 2021, dŏ glăi 14 boh să hrŏ 70% mrô sang anŏ amăng kual djuai ƀiă ƀun rin hăng kual čư̆ siăng hrŏ pơkă dưm dưm rĭm thun 3%. Abih thun 2021, đơ đam tơring čar Thái Nguyên hơmâo 73/100 boh să kual mơnuih djuai ƀiă hăng kual čư̆ siăng dưi ngă djơ̆ tơhnal pơtrun plơi pla phrâo, lu hloh 3 wơ̆t pơkă hăng amăng dêh čar. Hơdôm mrô rơnoh anun brơi ƀuh, mơ̆ng jơlan hơdră kơnuk kơna pioh kơ djuai ƀiă phara, tŭ yua ƀuh mơ̆ng bruă mă hơmâo sit nik, pơsir hmao kru ƀơi tơring čar Thái Nguyên.