Buôn Ea Pri, să Ea Wer, tơring glông Buôn Đôn, tơring čar Dak Lak hơdôm hrơi rơnuč blan 8 čơkă hơdôm rơtuh wot čô mơnuih apăn bruă tơhan, ling tơhan Đai đội 5, Grŭp črâo ba Khul ling tơhan tơring glông Buôn Đôn kơ ngă bruă pơtô ba mơnuih ƀôn sang. Ling tơhan hmâo gum hrŏm laih hăng gưl ping gah gong gai să hăng hơdôm khul apăn bruă kơđi čar – mơnuih mơnam mơng să pơphun agaih rơmet hơdjă ƀơi hơdôm ring bruă plơi pla, kuăi huĕt kueng hnoh; djru hơdôm bôh sang anô̆ gah hơdră bruă, mơnuih tha ƀu hmâo anih gơnang ngă đang hmua; gum hrŏm pla hơdôm rơtuh phun kyâo pơtâo, kyâu mă tơ-ui ƀơi hơdôm ară jơlan amăng plơi pla. Gum hrom hăng ling tơhan ngă bruă pơtô ba mơnuih ƀôn sang, neh wa ƀơi anai hlơi hlơi leng kơ hur har pran jua, dik dak pioh gum hrŏm ngă klă jơlan hơdră pơđĭ kyar bơwih ƀong – mơnuih mơnam, hơdră bruă hơđong tơlơi hơdip mơda mơnuih mơnam, hơdră bruă djuai ania, tơlơi đăo; pơhlôm pơgang lŏn ia – rơnuk rơnua plơi pla. Ơi Nguyễn Anh Dũng, ƀơi buôn Ea Pri, să Ea Wer, tơring glông Buôn Đôn, brơi thâo:

 “Rim thun ling tơhan glăi pơ̆ buôn Ea Pri pioh gum hrŏm hăng neh wa hơdôm bruă kuăi huĕt kueng hnoh pơđoh ia hăng agaih dua bơnah jơlan, djru neh wa hơdôm bruă đang hmua, kâo lĕ mơnuih ƀôn sang lăng ƀuh mơ-ak biă, lom ling tơhan glăi pơ̆ plơi neh wa ăt gum hrŏm mơn ling tơhan agaih anih anom mă yua kah hăng ƀơi sang rông, kih rơmet, agaih jum dar sang dô̆ kiăng pơhlôm agaih mơtah, hơdjă klă hiam hăng agaih”.

Ƀu djơ̆ kơnong kơ djru mơnuih ƀôn sang bruă kơtrâ̆o ôh mơ̆, gru rŭp ling tơhan hrŏm hăng ao mơtah gum djru mơng čơđai gưl dlông Sang hră đại học Tây Nguyên hăng hlăk ai amăng khul să jê̆ giăm na nao, kiăng khăp lom abih pran jua lăng ba truh rim mơnuih rim sang, biă ñu hơdôm bôh sang anô̆ hmâo tơlơi hơdip tơnap. Biă ñu lom lăi pơhing kơ hơdôm hơdră bruă mơng Ping gah kơnuk kơna, hơdră lăi pơhing rơguăt, amuñ djă pioh, amuñ ngă tui, mơng anun đăo gơnang kơ tơlơi git gai mơng Ping gah, gong gai, ăt kah hăng ngă tui jơlan gah pơtrun mơng Ping gah, hơdră bruă tơlơi phiăn mơng Kơnuk kơna, Thiếu tá Trần Văn Toàn, Kơ-iăng Khua Grŭp git gai Khul ling tơhan tơring glông Buôn Đôn, tơring čar Dak Lak brơi thâo:

 “Hăng Grŭp git gai khul ling tơhan tơring glông Buôn Đôn ăt thâo dơlăm mơn bôh yôm anai, ngă tui bruă pơtô ba mơnuih ƀôn sang lĕ sa amăng hơdôm bôh yôm phăn amăng rơnuk anai. Hăng neh wa rơbêh kơ 60% lĕ mơnuih djuai ania ƀiă ƀing gơmơi ăt hmâo mơn jơlan gah lăi pơhing djơ̆ hăng neh wa hloh, amuñ thâo hluh hloh, rơguăt hloh kiăng neh wa thâo hluh hơdră bruă mơng Ping gah hăng Kơnuk kơna pơ̆ anăp anai ngă klă hloh”.

Ling tơhan nao pơ̆ plơi, ƀô̆ mơta ƀơi kual guai dêh čar ăt ƀơƀrư̆ dưi pơplih mơn. Mơng hơdôm bruă mă rơđah, ling tơhan hmâo djru hơkrŭ laih, pơplih pơkra 11km jơlan amăng plơi pla, rơbêh kơ 1km kueng hnoh pơđoh ia; djru mơnuih ƀôn sang pơplih pơkra, yuă hơpuă; hơkrŭ pơsir, pơkra glăi 5 anih anom jơnum plơi pla, sang mơnuih ƀôn sang dô̆, 2 bôh sang hră; pơphun hơdôm bruă bơkơtuai bôh thâo, adôh suang; čuă, brơi gơnam tam kơ hơdôm bôh sang anô̆ gah hơdră bruă; pơhrua hrŏm hăng anun lĕ bruă lăi pơhing, pơsur mơnuih ƀôn sang ngă klă tơlơi hơdip mơda bôh thâo ƀơi plơi pla, djă pioh agaih hơdjă anih anom dô̆; pơđĭ tui tơlơi pơmin amăng bruă ngă tui hơdôm hơdră pơtrun hơdră bruă mơng Ping gah, tơlơi phiăn mơng Kơnuk kơna. Đại tá Võ Văn Minh, Kơ-iăng Khua Ƀirô git gai Khul ling tơhan tơring čar Dak Lak brơi thâo:

 “Kiăng ngă klă hơdôm jơlan hơdră pơtô ba mơnuih ƀôn sang hăng hơdră ring bruă gum hrŏm hơbit mơnuih ƀôn sang hăng ling tơhan ƀơi tơring čar pơ̆ anăp anai, hăng khul ling tơhan tơring čar blung hlâo ƀing ta ăt pơsit mơn, bruă pơđĭ tui tơlơi pơmin kơ mơnuih apăn bruă tơhan, ling tơhan kơ bruă pơtô ba mơnuih ƀôn sang amăng rơnuk phrâo lĕ tơlơi yôm phăn. Kiăng ngă klă khom nao rim anih anom, lăng rim plơi pla ră anai pơphun hơdôm bruă mă pơtô ba mơnuih ƀôn sang ƀơi plơi pla mơng pô hmâo mut laih amăng tơlơi kiăng hloh mơng neh wa mơn hăng rim anih anom phun; mơng anun mơng ngă klă bruă klah čun, pơsit, bruă mă tơlơi găn rơgao hăng pok pơhai, pơhư prong hơdră gum hrŏm hơbit khul ling tơhan hăng mơnuih ƀôn sang ƀơi tơring čar lăi hrŏm, hăng wot khul ling tơhan tơring čar lăi ha jăn”.

Hăng jơlan gah “4 gum hrŏm” amăng pơtô ba mơnuih ƀôn sang thun 2023, hơdôm bôh puih kơđông gah Ƀirô git gai Khul ling tơhan tơring čar Dak Lak hmâo gum hrŏm hăng hơdôm bôh să pel ĕp, ruah mă hơdôm bruă kiăng ngă hloh pioh gum djru. Rơgao rim ring bruă, črăn bruă ngă giong hmâo djru dong tơlơi mơ-ak, ngă pơđao pran jua hăng ngă bơngač tơlơi đăo gơnang mơng neh wa djuai ania ƀiă ƀơi kual guai dêh čar tơring čar Dak Lak hăng “Ling tơhan Wa Hồ”./.