Gum pơhiăp amăng mông jơnum grŭp, Khua git gai pơ ala mơnuih ƀôn sang dêh čar ta ơi Trần Thanh Mẫn lăi rơđah glăi sa wot dong bruă gum pơhiăp amăng Hră čih pơkra Tơlơi pơtrun pơsit mơ̆ng Khua pơ ala mơnuih ƀôn sang pơplih pơkra, pơhrua nao sa dua mơta tơlơi mơ̆ng Phiah phiăn thun 2013 dưi ngă tui amăng 8/129 mơta tơlơi hăng 2 djuai bôh yôm pơkă bơdjơ̆ nao truh Jơnum min djop djuai ania mơnuih mơnam Việt Nam, hơdôm khul grŭp apăn bruă kơđi čar – mơnuih mơnam hăng hơdôm tơlơi pơkă ƀơi Črăn 9  pioh ngă tui hơdră pơphun bruă gong gai ƀơi 2 gưl, ƀu pok prong hơdôm tơlơi pơkon.

Khua git gai pơ ala mơnuih ƀôn sang dêh čar lăi lĕ, ră anai mơnuih ƀôn sang, mơnuih pơ ala kơ mơnuih ƀôn sang glăk čang rơmang bruă ngă tui rơbô̆t, glông bruă mă, bruă tŭ yua, ngă tui, pơphun ngă, ba glăi bôh tơhnal. Yua kơ bôh nik, hơdôm hrơi rơgao, Ping gah, Kơnuk kơna ăt hmâo mă yua laih lu tơlơi pơtrun pơsit pioh ngă rơbô̆t glông bruă, bruă mă, samơ̆ bôh nik ñu bruă hrŏ trun dô̆ hmâo tơhnal pơplih lu, ba truh glông jơlan mă bruă ƀu rơbô̆t, biên chế lĕ lu đĭ:

“Tal anai ƀing ta ngă tui laih hơdră pơtrun ngă rơbô̆t glông jơlan mă bruă tui pran jua Tơlơi pơtrun pơsit 18. Anai lĕ hơdră pơtrun lăp djơ̆ hăng pran jua mơnuih ƀôn sang. Tơlơi pơmin Ping gah, djơ̆ hăng pran jua mơnuih ƀôn sang. Kiăng ngă tui hơdôm bôh yôm anai rơwang dua tơnap biă. Tơnap lĕ khom pơplih pơkra Phiah phiăn. Ƀing ta hmâo pel ĕp akô̆ pơjing Jơnum min hră čih pơplih pơkra, pơhrua nao sa dua mơta tơlơi amăng Phiah phiăn thun 2013 hmâo lăi pơthâo laih, kơčăo bruă pơplih pơkra Phiah phiăn hơdôm tơlơi lăi pơdah mă tơlơi gum pơhiăp mơnuih ƀôn sang mơ̆ng lơ 6/5 truh lơ 5/6, amăng rơwang sa blan, ruah mă 5 hrơi, abih bang lĕ 35 hrơi”.

Khua git gai pơ ala mơnuih ƀôn sang dêh čar ăt lăi mơn, bruă pơplih pơkra, pơhrua nao sa dua mơta tơlơi amăng Phiah phiăn thun 2013, djuai bruă ngă giong hơdôm hră pơ-ar pơtô ba ngă tui pioh pơplih pơkra Phiah phiăn, ngă giong hơdră čih tơlơi phiăn hăng hơdôm tơlơi pơkă khom nao hlâo sa yak, pioh jing glông jơlan tơlơi phiăn kơjăp kơ bruă ngă tui.

Ƀing khua pơ ala mơnuih ƀôn sang dêh čar ăt tŭ ư mơn hăng 8 Mơta tơlơi pơplih pơkra amăng Hră čih Tơlơi pơtrun pơsit pơplih pơkra, pơhrua nao sa mơta tơlơi amăng Phiah phiăn thun 2013. Amăng anun, Hră čih pơkra Tơlơi pơtrun pơsit ngă rơđah bruă mă hăng bruă ggơgrong mơ̆ng hơdôm khul grŭp kơđi čar – mơnuih mơnam kah hăng: Khul mut phung Việt Nam, Khul mơnuih ngă đang hmua Việt Nam, Grŭp Hlăk ai djă anăn Hồ Chí Minh, Khul pơlir hơbit đah kơmơi Việt Nam, Khul ling tơhan hơđăp Việt Nam lĕ hơdôm khul grŭp apăn bruă kơđi čar – mơnuih mơnam gah Jơnum min djop djuai ania mơnuih mơnam Việt Nam, pơhlôm tui pran jua Klah čun 127 mơ̆ng Ding jum kơđi čar.

Tui Khua pơ ala mơnuih ƀôn sang Nguyễn Thị Thu Nguyệt, grŭp Dak Lak, rơngiao hơdôm khul grŭp kơđi čar mơnuih mơnam gah Jơnum min djop djuai ania mơnuih mơnam Việt Nam dô̆ hmâo hơdôm khul mơnuih ƀôn sang, glăk ngă tui hơdôm bruă mă mơ̆ng Ping gah hăng Kơnuk kơna. Yua anun, khua pơ ala rơkâo, Grŭp čih dăp hơdră Hră čih Tơlơi pơtrun pơsit pơplih pơkra, pơhrua nao sa dua mơta tơlơi amăng Phiah phiăn thun 2013 pel ĕp, pơkă anih anom pioh kơ tơlơi phiăn mơ̆ng hơdôm grŭp anai:

“Anih anom pioh kơ tơlơi phiăn mơ̆ng hơdôm khul mơnuih ƀôn sang gah Jơnum min djop djuai ania mơnuih mơnam tui Klah čun 127 pơdah amăng Phiah phiăn hiưm ñu, ƀing ta khom ngă rơđah. Tơdah ƀu tui anun, ƀing ta kơnong kơ dưm ƀơi rơnoh lĕ amăng pơlir hơbit hơdôm ding kơna hăng Jơnum min lĕ akă djop ôh, akă pơjing glông jơlan tơlơi phiăn  kơ hơdôm Khul anai mă bruă tui rơwang pơkă Phiah phiăn ôh, tơlơi phiăn hăng pơplih pơkra tui Tơlơi pơtrun pơkă amăng Gong gai, tơdơi kơ Phiah phiăn pơplih pơkra”.

Sa tơlơi gum pơhiăp khua pơ ala dô̆ pơmin, amăng Mơta tơlơi 110, ƀut 3 pơkă, bruă pơsit hơdôm djuai anom mă bruă čar gah yŭ tơring čar, ƀôn prong hăng akô̆ tlôn, hră pơ-ar akô̆ pơjing, pơdơi bruă, pơmut hrŏm, pơpha anom bruă čar, pơplih pơkra anih anom mă bruă čar yua kơ Khua pơ ala mơnuih ƀôn sang dêh čar pơkă. Lơm anun, tui hăng Phiah phiăn thun 2013, bruă anai khom mă tơlơi gum pơhiăp mơnuih ƀôn sang. Khua pơ ala Nguyễn Minh Hoàng, grŭp ƀôn prong Hồ Chí Minh brơi thâo:

“Bruă akô̆ pơjing, pơdơi bruă, pơpha anom bruă čar, pơplih pơkra anih anom yua kơ Khua pơ ala mơnuih ƀôn sang dêh čar pơkă. Pơkă bruă anai khom mă tơlơi gum pơhiăp mơnuih ƀôn sang, tui akô̆ tlôn, hră pơ-ar pơkă. Ƀơi anai kâo dô̆ pơmin ƀing ta ƀu pơblang ôh yua hơget ƀing ta lui hĭ tơlơi anai, lơm anun tơlơi anai ngă tui tơlơi pơtă ƀơi plơi pla anom bruă, ngă tui tơlơi gum pơhiăp mơ̆ng mơnuih ƀôn sang ƀơi plơi pla hăng bruă yôm phăn hăng ăt pơdah mơn tơlơi pơmin Ping gah pran jua mơnuih ƀôn sang”.

Khua pơ ala mơnuih ƀôn sang Nguyễn Thành Trung, grŭp Yên Bái lăi tơlơi gum pơhiăp:

“Hră čih pơkra tal anai ƀu pơkă mă tơlơi gum pơhiăp mơnuih ƀôn sang ƀơi plơi pla lơm akô̆ pơjing pơdơi bruă, pơmut hrŏm ƀudah pơplih pơkra anăn anih anom mă bruă čar mơ̆ amra yua kơ Khua pơ ala mơnuih ƀôn sang dêh čar pơsit. Kâo pơmin tui hăng tơlơi phiăn, wai lăng kơnuk kơna hăng mơnuih mơnam lĕ bruă mă tơlơi gum pơhiăp mơnuih ƀôn sang lŏm pơjing, pơdơi pơmut hrŏm, pơpha anom mă bruă čar, pơplih pơkra anih anonm mă bruă lĕ kiăng biă”./.