Amăng mông ngă lơphet, Ping gah ling tơhan gơnong glông, Ding jum ling tơhan hơmâo pơpŭ 35 grup hăng 80 čô mơnuih ba gru “Rơgơi amăng bruă pơtô ba mơnuih ƀôn sang” mơng ling tơhan ƀơi kual mơnuih djuai ania ƀiă hăng čư̆ siăng rơwang thun 2019-2025. 5 thun rơgao, Ping gah ling tơhan gơnong glông, Ding jum ling tơhan, anom bruă kơđi čar hơmâo đing nao git gai pok pơhai ngă tui tơlơi pơplông “Rơgơi amăng pơtô ba mơnuih ƀôn sang”, pơjing “anom bruă rơgơi pơtô ba mơnuih ƀôn sang” ha amăng plĕ, djop mơta, sit nik, hơđong kjăp, brơi dơlăm, lăp djơ̆ hăng tơlơi sit nik, pơlir kjăp phik hăng ngă tui hơdôm tơlơi pơplông, hơdôm tơlơi pơtrut pơsur đơ đam dêh čar, ba glăi lu tơlơi dưi hăng tơlơi găn rơgao yôm…; pơgôp hơkrŭ wai pơgang rơnuk rơnua, hơđong, pơjing bruă wai pơgang hơđong amăng mơnuih mơnam, pơhlôm rơnuk rơnua mơnuih ƀôn sang, pran đăo gơnang kjăp phik mơng mơnuih ƀôn sang djop djuai ania hăng Ping gah, kơnuk kơna, ling tơhan; ngă tui klă bruă jao ling tơhan, tơhan bơwih ƀong huă, ngă bơngač rup rap “Ling tơhan rơnuk wa Hô” amăng rơnuk phrâo.

Mơng thun 2019-2024, hơdôm anom bruă amăng djop khul ling tơhan gum hrŏm pơphun pơtô pơblang rơbêh 250 rơbâo wŏt hăng rơbêh 20 klă čô mơnuih mut hrŏm; pơtrut pơsur rơbêh 11 rơbâo boh sang anŏ hăng giăm 56 rơbâo čô mơnuih anăm hyu dŏ hơdơ̆ hor hăng rơbêh 20 rơbâo čô čơđai pot glăi nao sang hră. Hơmâo gum hrŏm pơphun pơtô pơhrăm brơi bruă wai pơgang rơnuk rơnua brơi rơbêh 18.300 čô tha plơi, khua plơi, mơnuih arăng đăo gơnang amăng mơnuih djuai ania ƀiă; mut hrŏm pơjing tơhan wai pơgang mă pô, tơhan prap tui tlôn amăng ƀôn lan kual čư̆ siăng hơđong kjăp; pơsir hĭ tŭ yua hơdôm bruă tơnap tap juăt ƀuh amăng ƀon lan, anăm brơi tơlơi rung răng lar hyu prong, sui hrơi…

Thiếu tá Nguyễn Thị Thúy, kông ti mrô 723, Binh đoàn 15 ( mă bruă amăng tơring glông Đức Cơ, Gia Lai) hơmâo pơtrut pơsur truh kih sa, dua čô mơnuih lui hĭ hơdôm tơlơi đăo ča čot pot glăi pơ sang anŏ, ñu lăi:

“Amăng sa wŏt kâo nao pơtrut pơsur neh met wa, sa čô čơđai rai kuar tơkai kâo, čơđai anai lăi, neh hơi, ih ĕp ba glăi amĭ kâo hŏ, kâo hning rơngô̆t biă kơ amĭ. Hăng pran jua kơ sa čô mơnuih ngă amĭ kâo ăt hluh mơn, lơm sa čô čơđai lăi tui anun, ñu glăk kơƀah pran khăp mơng pô amĭ. Kâo hăng ƀing gŏp jak ba čơđai  anai mut amăng glai kiăng kơ hrŏm hăng ƀing gơmơi pơanur, pơtrut pơsur amĭ gơñu hăng sa, dua čô mơnuih pot glăi pơ plơi pla”.

Đĭ pơhiăp amăng mông ngă lơphet, Thượng tướng Trịnh Văn Quyết, Khua anom bruă kơđi čar, ling tơhan Việt Nam pơsit tong, kual mơnuih djuai ania ƀiă hăng čư̆ siăng lĕ kual akŏ phun amăng pơđĭ kyar bơwih ƀong huă, gru grua, mơnuih mơnam, wai pơgang rơnuk rơnua, hơđong, pơtom hiăp. Tơlơi sit nik ngă hơkrŭ mơng Việt Nam brơi ƀuh, mơnuih djuai ania ƀiă lêng kơ gum pơgôp hăng pơgôp prong amăng bruă ngă hơkrŭ mơng Ping gah, lu kual jing anih phun amăng blah wang, anih rông ba hăng wai pơgang ƀing apăn bruă, ling tơhan, hơdôm rơbăn čô ană amon djuai ania ƀiă hur har pran jua nao ngă tơhan, pơgôp hrŏm hăng mơnuih ƀôn sang đơ đam dêh čar ba glăi tơlơi dưi hing ang amăng wai pơgang lŏn ia. Bruă pơtô pơblang tŏ tui pơsit tong ling tơhan tơbiă rai mơng mơnuih ƀôn sang, yua mơnuih ƀôn sang blah ngă. Lăi rơđah lŏn ia ta glăk yak nao rơnuk pơđĭ kyar pơdrong asah, rơkâo kiăng pơjing tơlơi gêh gal kiăng ngă tui pran khăp lŏn ia, pran gơgrong mă pô, tơlơi dưi, tơlơi gal mơng mơnuih djuai ania ƀiă, djru brơi mơnuih ƀôn sang tŏ tui pơgôp tơlơi thâo thăi, pran jua amăng pơjing lŏn ia, Thượng tướng Trịnh Văn Quyết rơkâo:

“Gưp Ping gah git gai hăng ƀing apăn bruă, ling tơhan, amăng anun hơmâo hơdôm khul grup, ƀing mơnuih ba gru amăng pơtô pơblang ră anai tŏ ngă tui klă tơlơi gơgrong phun, jing anih gơnang nao, hrŏm hăng mơnuih ƀôn sang amăng djop mơta bruă. Gum hrŏm kjăp hăng gưl Ping gah gong gai ƀon lan pơtô pơblang, pơtrut pơsur mơnuih ƀôn sang đăo gơnang nao tơlơi git gai mơng Ping gah, gir run bơwih ƀong huă, pơđĭ kyar bơwih ƀong huă gru grua mơnuih mơnam, hơkrŭ bruă wai pơgang rơnuk rơnua, hrưn đĭ răng kơđiăng ngă hơkrŭ pơgang pơgăn hơdôm tơlơi pơčut pơčao ngă rung răng mơng ƀing ngă soh kiăng ngă pơčlah pran gum pơgôp djop djuai ania”.

Ƀrô tal anai, Ding jum ling tơhan pok jơlan hơdră “Mơnuih mơng plơi pla”, pơdah amăng jơlan hơdră gong pơdah rup ling tơhan hăng ba đĭ amăng hơdôm hră pơhing mơng ling tơhan kiăng pơtô pơblang, ngă lar hyu hơdôm bruă mă sit nik, yôm phăn, hơdôm tơlơi pơhing, rup rap kơ pran gum pơgôp pơlir hơbit kjăp kơplah wah ling tơhan hăng mơnuih ƀôn sang, amăng anun hơmâo mơnuih djuai ania ƀiă hăng čư̆ siăng./.