Anai lĕ thun tal 2 na nao Khul ngă hmua Việt Nam pơphun ruah 100 čô mơnuih ngă hmua rơgơi hloh; ăt tal blung a mơ̆n Khul ngă hmua Việt Nam ruah pioh apah bơni 63 boh sang bruă ngă ƀong hrŏm ba gru hlâo amăng dêh čar. Nao jơnum hrŏm hăng đĭ pơhiăp apah bơni, ding kơna ding jum kơđi čar, Kơ-iăng khua pơ ala mơnuih ƀôn sang Việt Nam ơi Trần Thanh Mẫn rơkâo, Khul ngă hmua djop gưl pơtrut kơtang bruă pôr tơlơi pơhing, pơtô pơblang, pơtruh brơi djop mơnuih apăn bruă, ding kơna amăng khul, ding kơna sang bruă ngă ƀong hrŏm ngă hmua thâo tong ten jơlan hơdră, hră pơtrun mơ̆ng Ping gah, kơnuk kơna, tơlơi phiăn dêh čar, boh nik ñu amăng bruă ngă hmua, mơnuih ngă hmua, kual plơi pla, pơdjơ̆ nao tong ten anŏ tŭ yua, tơlơi glăm ba mơ̆ng mơnuih ngă hmua.

Pôr pơthâo lu gru mơnuih hiam, mă bruă tơpă, kiăng hơdôm sang anŏ mă bruă rơgơi kơhnâo, sang bruă ngă ƀong hrŏm ba glăi lu boh tơhnal, kah hăng asar pơjeh phun ngă hrŏm pơtrut bơwih ƀong huă mơnuih mơnam ƀơi kual plơi pla đơ đam dêh čar ta.