VOV4.Jarai - Tơdơi kơ pơđut mông jơnum ƀu tui tơđar tal sa, Khua git gai pơ ala mơnuih ƀon sang dêh čar ơi Vương Đình Huệ kiăng Kơnuk kơna, Khua dêh čar hăng hơdôm anom bruă bơdjơ̆ nao ječ ameč pơphun ngă bruă tañ, hơdeč hmar hơdôm tơlơi pơtrun, pơsir hĭ bruă “akŏ thun dŏ rơngĕ, rơnuč thun tul hơ-ul”.

Hăng tơlơi gơgrong bruă lŏn ia, mơnuih ƀon sang hăng kư tri, jơnum ƀu tui tơđar lok 1, Ƀirô khua git gai pơ ala mơnuih ƀon sang dêh čar tal 15 tŭ ư pơsit 1 Tơlơi phiăn hăng 4 Tơlơi pơtrun hơmâo lu mơnuih tŭ ư. Tơlơi pơtrun kơ prăk kăk, prăk pioh ngă jơlan hơdră hơkrŭ glăi hăng pơđĭ kyar tơlơi bơwih ƀong - mơnuih mơnam jing sa amăng hơdôm tơlơi yôm phun mơng mông jơnum anai. Khua git gai pơ ala mơnuih ƀon sang dêh čar ơi Vương Đình Huệ lăi, kiăng pơphun ngă tañ, tŭ yua hơdôm bruă prăk kăk, Khua git gai pơ ala mơnuih ƀon sang kiăng Kơnuk kơna, djŏp gưl ping gah, anom bruă kiăo tui tơlơi črâo bruă mơng Ping gah, hơdôm Tơlơi pơtrun mơng Khua pơ ala mơnuih ƀon sang dêh čar, gir djă bong kơjăp tơlơi bơwih ƀong prong, pơđĭ tui gơnam tam, dưi bơkơtưn hăng arăng, gơgrong mă pô, dưi gơgrong amăng thun blan tơnap tap, tơlơi pơplih mơng bruă bơwih ƀong, djơ̆ hăng tơlơi kiăng ƀơi anăo, hăng sui thun, pơlir kơjăp hăng Akŏ bruă 5 thun rơwang thun 2021-2025 hơmâo Khua mua pơ ala mơnuih ƀon sang dêh čar pơsit brơi hăng Jơlan hơdră ngă bruă abih bang kơ pơgang klin Covid-19. Khua git gai pơ ala mơnuih ƀon sang dêh čar ơi Vương Đình Huệ lăi:

“Tơlơi pơtrun mơng Khua mua pơ ala mơnuih ƀon sang dêh čar ăt jao kơ Kơnuk kơna, Ding jum, anom bruă gơnong dlông hăng tơring čar tui hluai kơ tơlơi gơgrong bruă pok pơhai ngă tui Tơlơi pơtrun anai; pô ngă khua khŏm gơgrong bruă git gai, pok pơhai bruă djơ̆ hăng tơlơi pơtrun, tơlơi gơñăm nao, rơđah rơđông, tŭ yua; lăng yôm bruă hyu pel ĕp, sem lăng, pơtô ba mơng hrơi blung a mơtăm đah mơng huăi hơmâo tơlơi soh, ƀong prăk, prai prăk kăk hăng bơtơhmal mơtăm pô ngă soh tơlơi phiăn, biă ñu amăng hrơi mông dưm dăp prăp rơmet prong amăng ƀiă hrơi”.

Tơlơi pơtrun Jơnum ƀu tui tơđar lok 1, Khua pơ ala mơnuih ƀon sang dêh čar tal 15 hơmâo ngă jing tơlơi phiăn Tơlơi klah čun mơng Ding jum kơđi čar kơ Jơlan hơdră pơgang klin Covid-19 rơwang thun 2022-2023 hăng Jơlan hơdră hơkrŭ hăng pơđĭ kyar tơlơi bơwih ƀong huă - mơnuih mơnam. Hăng tơlơi pơtrun anai, Khua git gai pơ ala mơnuih ƀon sang dêh čar ơi Vương Đình Huệ brơi thâo, Khua mua pơ ala mơnuih ƀon sang kiăng Kơnuk kơna, Khua dêh čar git gai hơdôm Ding jum, anom bruă pok pơhai tañ, khut khăt hăng pơđĭ tui mrô vaccine, hơmâo tlâ̆o pơhrua tui kơ ƀing tha, kơsem min rơđah, lăp djơ̆ đah mơng tlâ̆o vaccine kơ ƀing yŭ 18 thun, biă ñu ƀing čơđai. Khua git gai pơ ala mơnuih ƀon sang dêh čar ơi Vương Đình Huệ kiăng:

“Gơñăm nao bruă pơtô brơi, pel ĕp, sem lăng, ngă bruă kiăng kiăo tui tơlơi phiăn, lăng yôm tơlơi pơmin pran jua ngă bruă, rim čô mơnuih khŏm gơgrong bruă, biă ñu lĕ tơlơi gơgrong bruă mơng ƀing ngă khua bơdjơ̆ nao bruă ngă tui tơlơi pơtrun, hơdră hơkrŭ glăi, pơđĭ kyar bơwih ƀong huă - mơnuih mơnam hăng pơhlôm pơgang klin, tañ ƀuh, pơsir hlao hơdôm bruă hưp ham ƀong ngăn, ngă bruă soh; pơtum mơnuih mă bruă, ječ ameč, khut khăt pok prong ngă rơđah tơlơi jao bruă, kơsem min, ba pơƀuh, jao glăi, brơi mă yua, pơkă nua, pôr pơhing, apah bơni, pơkra pơjing, anŏ klă mơng gơnam tam hăng bruă blơi sĭ Kit kơsem min Covid-19 mơng Kông ti Việt Á; gơgrong bruă mơng khul grup, hơjăn pô bơdjơ̆ nao đah mơng ngă rơđah bruă”.

Kiăng hơdôm Tơlơi pơtrun mơng mông Jơnum ƀu tui tơđar lok 1, Khua pơ ala mơnuih ƀon sang dêh čar tal 15 dưi mă yua, Khua git gai pơ ala mơnuih ƀon sang dêh čar Vương Đình Huệ kiăng, Kơnuk kơna, Khua dêh čar, Jơnum min apăn bruă pơ ala mơnuih ƀon sang, Khul wai lăng Djuai ania, hơdôm Jơnum min mơng Ƀirô khua pơ ala mơnuih ƀon sang, djŏp gưl ping gah, anom bruă, hơdôm grup khua pơ ala mơnuih ƀon sang dêh čar, ƀing khua pơ ala mơnuih ƀon sang ječ ameč pơphun ngă tañ, hmao tlôn hơdôm tơlơi phiăn, tơlơi pơtrun phrâo hơmâo pơsit đah mơng tañ hơmâo anŏ tŭ yua, dưi mă yua amăng tơlơi hơdip, pơsir bruă “Akŏ thun dŏ rơngĕ, rơnuč thun ngă bruă tul hơ-ul”.

Khua git gai pơ ala mơnuih ƀon sang dêh čar ơi Vương Đình Huệ lăi, hăng bruă pơphun jơnum truh kih Jơnum ƀu tui tơđar lok 1, ƀing ta hơmâo tơlơi kơđiăng lui yôm biă kiăng hơdôm mông jơnum ƀu tui tơđar jing bruă ngă tui tơđar mơng Ƀirô khua pơ ala mơnuih ƀon sang đah mơng djơ̆ hăng tơlơi kiăng. Pran jua hăng boh than ba glăi mơng mông jơnum ƀu tui tơđar lok 1, Khua pơ ala mơnuih ƀon sang dêh čar tal 15 hơmâo pơjing rai tơlơi pơplih phrâo, hơmâo tơlơi gêh gal phrâo, hrŏm hăng lu jơlan hơdră ngă bruă phrâo, tơlơi git gai khut khăt mơng Kơnuk kơna, tơlơi ngă bruă mơng djŏp anom bruă, khul grup, abih bang anom bruă čar, tơlơi dong yua, gum hrŏm ha pran jua mơng Mơnuih ƀon sang, anom bơwih ƀong, ƀing ta đăo gơnang amra dưi ngă truh kih bruă pơđĭ kyar bơwih ƀong huă - mơnuih mơnam thun 2022, wơ̆t hăng rơwang thun 2021-2025, lŏn ia ta amra pơđĭ kyar hơđong kơjăp, tơlơi hơdip amra đĭ tui mơn, tơlơi đăo gơnang mơng Mơnuih ƀon sang amra kơjăp tui mơn./.

Siu H’Mai: Pơblang