Khua Anom bruă Khul pơ ala mơnuih ƀôn sang dêh čar ơi Lê Quang Tùng lăi pơthâo glăi Hră čih Tơlơi pơtrun pơsit kơ bruă jao, tơlơi dưi rơđah hăng hơdră pơphun bruă mơ̆ng Khul wai lăng djuai ania, hơdôm Jơnum min mơ̆ng Khua pơ ala mơnuih ƀôn sang. Gum pơhiăp kơ bôh yôm anai, Khua git gai pơ ala mơnuih ƀôn sang dêh čar ơi Trần Thanh Mẫn djă pioh, pơsit yôm Grŭp čih Tơlơi pơtrun pơsit klă biă, tañ amăng bruă čih pơkra, ngă giong hră pơ-ar Tơlơi pơtrun pơsit pioh lăi pơthâo kơ Jơnum min apăn bruă Khua pơ ala mơnuih ƀôn sang dêh čar pel ĕp, gum pơhiăp. Bruă ngă giong, pơđĭ dlông hơdôm tơlơi pơkă amra djru pơđĭ tui tŭ yua, bôh tơhnal amăng pơphun bruă hăng bruă mă mơ̆ng hơdôm ƀirô mơ̆ng Khua pơ ala mơnuih ƀôn sang dêh čar.

 Tui hăng Khua git gai pơ ala mơnuih ƀôn sang dêh čar Tơlơi pơtrun pơsit khom kiăo tui hơdôm bruă mă phun mơ̆ng Khul wai lăng djuai ania, hơdôm Jơnum min mơ̆ng Khua pơ ala mơnuih ƀôn sang dêh čar hmâo pơkă amăng Tơlơi pơplih pơkra, pơhrua nao sa dua mơta tơlơi mơ̆ng Tơlơi phiăn Pơphun bruă Khua pơ ala mơnuih ƀôn sang dêh čar; pơhlôm tơhnal tŭ mă, ha amăng plĕ, pơlir hơbit hăng bơkơnar kơplah wah hơdôm bôh ƀirô.

Khua git gai pơ ala mơnuih ƀôn sang dêh čar phun ñu tŭ ư hăng hơdôm bôh yôm rơđah; ñu lăi lơm pơphun bruă ngă tui amra pel ĕp glăi dong, pơsit, ba tơbiă pơplih pơkra glăi; hrŏm hăng anun čang rơmang tơlơi pơtrun pơsit anai dưi mă yua mơtăm pioh ngă tui. Pơdah tơlơi tŭ ư prong tơlơi pơkă kơ hơdră pơphun, tơlơi pơkă mă bruă mơ̆ng Khul wai lăng djuai ania, hơdôm Jơnum min mơ̆ng Khua pơ ala mơnuih ƀôn sang, Khua git gai pơ ala mơnuih ƀôn sang dêh čar lăi lĕ:

  “Gah bruă jao, tơlơi dưi rơđah mơ̆ng Khul wai lăng duai ania, hơdôm Jơnum min mơ̆ng Khua pơ ala mơnuih ƀôn sang, ƀơi anăp, ăt tŭ mă hăng čơkă mă hơnong bruă jao, tơlơi dưi mơ̆ng hơdôm ƀirô kah hăng hlâo kơ ngă tui dưm dăp pioh pơpha bruă jao, tơlơi dưi. Bruă đing nao pơplih pơkra yak blung a sa dua bruă, bôh yôm bruă mă kơplah wah sa dua bôh ƀirô pioh kiăng pơhlôm anô̆ dưm kơnar, lăp djơ̆; ƀu lui lơi hong, bơrơkua gah bruă mă, bruă jao lĕ djơ̆ hơdră pơtrun, Jơnum min apăn bruă Khua pơ ala mơnuih ƀôn sang dêh čar tŭ ư hơdră pơkă, rim ƀirô mơ̆ng Khua pơ ala mơnuih ƀôn sang đing nao pel ĕp glăi, lăng tui, krăp lăng bruă mă gah pô gơgrong mơ̆ng 02-03 Ding jum, gơnong bruă gah dêh čar pioh pơhlôm anô̆ kơnar, lăp djơ̆, bĕ pơƀut lu bruă ƀơi sa dua bôh ƀirô. Phrâo rơgao lăng tui jai hrơi jai dưi pơđĭ dlông, djơ̆, đam hơdôm tơlơi ječ, dưi hmâo mơnuih ƀôn sang đing nao”.

Amăng bruă wai lăng bruă juăt mă pioh djơ̆ tui tơlơi ba tơbiă, tơlơi pơtrun pơsit khom pơsit rơđah hloh tơlơi rô nao rai kơplah wah Khul wai lăng djuai ania, Jơnum min, Khua Khul wai lăng djuai ania, Khua Jơnum min hăng Anom bruă Khua pơ ala mơnuih ƀôn sang dêh čar amăng wai lăng bruă mă.

Khua git gai pơ ala mơnuih ƀôn sang dêh čar rơkâo, ƀơi yŭ anai mơtăm, kiăng đing nao ngă giong tơlơi pơkă bơdjơ̆ nao hơdră pơphun, hơdră pơkă mă bruă, anih anom djru bruă, pơhlôm tơlơi pơkă bruă mă, ƀu ngă tơ̆i đưn bơdjơ̆ nao bruă ngă tui bruă jao, tơlơi dưi mơ̆ng hơdôm ƀirô. Yua anun, hơdôm bôh ƀirô bơdjơ̆ nao tañ čih tơlơi ba tơbiă, mă yua hră pơ-ar pơkă, wai lăng mơnuih mă bruă čar, prăk kak kơ bruă mă mơ̆ng Khul wai lăng djuai ania hơdôm Jơnum min; pơhlôm tơlơi pơkă kơ bruă mă mơ̆ng Khul wai lăng djuai ania, hơdôm Jơnum min; pơplih pơkra, pơhrua nao Tơlơi pơtrun pơsit 22 mơ̆ng Jơnum min apăn bruă Khua pơ ala mơnuih ƀôn sang kơ bruă apăn, bruă jao, tơlơi dưi, hơdră pơphun bruă mơ̆ng Anom bruă Khua pơ ala mơnuih ƀôn sang dêh čar.

            Khua git gai pơ ala mơnuih ƀôn sang dêh čar rơkâo, Khul wai lăng djuai ania, hơdôm Jơnum min, hơdôm Bruă mă pel ĕp, lăng glăi mơnuih apăn bruă, mơnuih mă bruă mơ̆ng anom pô, ƀu ngă luk puk; ruah mă mơnuih apăn bruă ƀơi hơdôm anom bruă pioh djru Khul wai lăng djuai ania, hơdôm Jơnum min khom ruah mơnuih dưi mă bruă, mơnuih hmâo pran gơgrong, mơnuih thâo mă bruă, hmâo bôh thâo hăng biă ñu khom hmâo pran jua pơplih phrâo./.