Ƀơi tơrung adoh suang apui pơčrang bơngač čir čar, ƀlip ƀlăp, lăng nao kwo ƀô̆ mơta pĕ tlao mơak tơpă biă mă, ƀing čơđai buh eng ao pơdah tơlơi adoh suang. Mah ƀing čơđai, hơmâo pô bum mơta, kơmlô tơngil, rơwen rơwo jo găng đăng đat hai, lu čơđai ƀu klă drơi jăn ôh, ăt đĭ ƀơi tơrưng adoh suang ƀô̆ mơta mơak soh, tlao pơrơkhek. Gah klôn hơdôm mơnit đĭ ƀơi tơrưng adoh suang anun, hơmâo tơlơi khăp, tơlơi pap prong hăng pran jua mă bruă sơ̆n biă mă mơ̆ng ƀing nai neh pơtô ba. Nai neh Phan Thị Lệ, pơtô anih ngă h’ĭn pran jua tañ kơ čơđai ƀu klă drơi jăn lăi:

“Yua ƀing gơyut anun ƀu thâo hmư̆ ôh, tơngil, kơmlô ƀu thâo pơhiăp, ƀu thâo hmư̆ ôh jua gông brô̆ er tơlơi adoh, anun ƀing nai khom pơmhu brơi ƀuh, bơtơpư̆ hăng tơngan, drơi jăn, giong anun brơi gơñu suang djơ̆ hăng gông brô̆ er tơlơi adoh, gơñu hơdor pioh hơdră suang, ta pok tơlơi adoh brơi djơ̆ hrŏm jua đĭ trun”.

Hăng ƀing čơđai suang, đĭ pơdah ƀơi tơrưng mơak Blan Bơrơmi ria mơ̆ng Sang hră Pơtô pơhrăm čơđai ƀa klă drơi jăn tơring čar Dak Lak, mlam anun bă blai tơlơi mơak kơ čơđai muai či kiăng. Ƀing čơđai buh eng ao hiam, sum ao phrâo, pơhrôp ƀô̆ mơta hiam rô̆ soh, lăng khăp ƀu-eng ôh, mut hrŏm mơak Blan Bơrơmi ria. Nao ngui mơak hrŏm ƀing nai neh hăng ană amôn čơđai ƀu klă drơi jăn hơmâo ƀing amĭ ama ƀing čơđai. Hăng gơñu, ƀuh ană bă ta tlao hơ̆k mơak hrŏm mông ngui ngor anai yom phara biă mă. Amai Lê Thị Hồng, amĭ nô anet Hoàng Lê Minh Khang ol kơdol pran jua lăi:

“Jing sa čô amĭ kâo ƀuh mơak biă mă amăng pran jua hăng dlưh hơtai boh biă mă yua ƀuh ană bă ta ăt kah hăng abih bang ƀing čơđai ƀu klă drơi jăn anun hơ̆k mơak, ta hơ̆k mơak hrŏm mơ̆n. Kâo bơni biă mă, bơni lu biă mă”.

Yă Lưu Thị Bình Minh, Kơ-iăng Khua sang bruă pơtô hrăm djruba ƀing čơđai ƀu klă drơi jăn tơring čar Dak Lak brơi thâo, ră anai sang hră anai jing sang anŏ dŏ hrŏm mơ̆ng abih bang 144 čô čơđai, amăng anun 42 čô kơmlô, tơngil ƀu thâo pơhiăp, hrŏm ƀing čơđai kaih thâo pơhiăp, tơmlư hŭi kơ arăng ƀu gưt jĕ giăm hlơi ôh. Hơdôm bruă ngă djơh hăng anai, tuh bă blai tơlơi khăp, pok brơi jơlan, pơtĕm brơi ačăng tơlơi thâo puăi tlao nao rai, kiăng gơñu h’in pran jua mut phung gah rơngiao.

“Rim blan sang hră pơphun mông hrăm tơbiă hyu pơ rơngiao brơi čơđai hyu ngui rah samơ̆ Blan Bơrơmi ria thun anai phara hloh, hơmâo khua mua tơring čar, djop gơnong bruă ƀơk brơi gơnam, ƀing nai neh hăng čơđai muai hơ̆k mơak biă mă. Anai lĕ sang hră pơtô hrăm tum teč mơ̆n yua tlam mơmŏt hrơi pă, djơ̆ tlam Blam Bơrơmi arăng jak nao pơ Sang gru grua tơring čar pơdah tơlơi ngui ngor hrŏm”.

Hơmâo sa bơyan Blan Bơrơmi dơ̆ng glăi pơ sang hră pơtô hrăm ba čơđai ƀu klă drơi jăn anai. Pơ anai, hơmâo atông hơgor, suang rup ania čơgrai, rơmung dul mơak mơai, bă blai tơlơi khăp pap plah wah ƀing nai hăng čơđai muai, tŭ mă gơnam djru hăng lu mơnuih nao pơƀuh ƀô̆ mơta juh alum ƀing čơđai muai hăng tơlơi tlao hơ̆k pơrơkhĕ. Mlam Blan Bơrơmi ria ăt amra pơđut mơ̆n, samơ̆ tơlơi tlao, ƀô̆ mơta mơak anun tơbiă rai mơ̆ng jua pơđao pran đôm glăi na nao, yong tơkai ƀing amă amôn čơđai muai ƀu klă drơi jăn, đăo kơnang, h’ĭn pran jua yak nao pơ jơlan pơ anăp adih