Tui hăng Ding jum bruă mă, Tơhan rơka hăng Mơnuih mơnam, lu tơhnal pơkă pơprong mơ̆ng anom bruă khua pơ ala mơnuih ƀôn sang dêh čar jao akŏ bruă pơđĭ kyar bơwih ƀong huă mơnuih mơnam thun 2024, dưi ngă djop soh mơ̆n kah hăng: Mrô mơnuih ƀu hơmâo bruă mă amăng kual plơi prong gah yŭ 4%, mrô mơnuih hơmâo bruă mă laih dưi hrăm bruă, hơmâo băng hrăm bruă lĕ mơ̆ng 28-28 ha mơkrah amăng sa rơtuh. Mrô sang anŏ ƀun rin tui tơhnal pơkă lu mơta phrâo anai, rơnuč thun 2024 hrŏ 1% pơkă hăng rơnuč thun 2023. Khă tui anun, Kơ-iăng Khua Jơnum min Mơnuih mơnam ơi Lâm Văn Đoan rơkâo brơi jŭ yap glăi tong ten, pơhrua nao dơ̆ng hră lăi pơthâo anŏ bơbeč djơ̆ yua mơ̆ng kơthel mrô 3, mơ̆ng anun kiăng pơtong glăi tơhnal pơkă brơi djơ̆ lăp, gêh găl hloh:

"Kiăng jŭ yap glăi tơlơi pơhing răm ƀăm yua kơthel mrô 3 ngă, hơmâo tơlơi lăi pơthâo rơđah tơhnal pơkă dưi ngă laih hă aka? Hơdôm akŏ bruă anet pơdong sang dŏ, hơmâo laih rơnoh 8000 klai djru kơ 100.000 boh sang anŏ ƀun rin, giămg ƀun rin amăng đơ đam dêh čar, samơ̆ kơnong anŏ răm ƀăm yua kơthel Yagi ngă lĕ 257 boh sang, ƀuh laih anun tơhnal pơkă kiăng sem glăi dơ̆ng”.

Hră lăi pơthâo ƀơi mông jơnum brơi ƀuh, thun 2024, hrŏm hăng bruă rŭ glăi laih anun pơđĭ kyar mơ̆ng anom bruă, khul bruă bơwih ƀong huă, anih hyu mă bruă apah đing nao pơđĭ tui mơ̆n; kơtưn pơtruh nao rai ĕp anih kiăng apah mơnuih mă bruă, djru mơnuih mă bruă hơduah ĕp bruă mă hăng tal blung a pok pơhai lông ngă lăng anih pơsir brơi bruă mă pơdah thâo lăng nao rai amăng tivi hăng djop anih amăng dêh čar; hmao klôn djru mơnuih ƀôn sang, mơnuih mă bruă apah rơngiă hĭ bruă mă, pơhrŏ mông mă bruă; bruă mă hăng prăk pơhrui glăi mơ̆ng mơnuih mă bruă apah đĭ tui mơ̆n pơkă hăng tal anai thun 2023. Tơlơi jĕ giăm amăng bruă mă ƀơi djop sang bruă sĭ mơdrô pơkra ming ăt mă bruă hơđong, bruă ba nao mơnuih mă bruă apah pơ dêh čar tač rơngiao hơmâo rŭ glăi pơsir djơ̆ lăp. Djop tơring čar hơmâo ngă tui djop, hmao kru, đing nao kơ sang anŏ hơmâo djru bruă hơkrŭ, djru mơnuih mơnam tơnap tap, pơhlôm nua bruă mơnuih mơnam, pơhlôm nua rơngiă bruă mă, pơhrŏ ƀun rin, wai lăng djru ba mơnuih tha rơma, ƀing čơđai sang anŏ ƀun rin, ană drit druai….; bruă tla prăk ƀu mă yua prăk mơta brơi kơ ƀing hơmâo anăn kơnuk kơna djru, pơsir bruă mơnuih mơnam mơ-it amăng mrô laih anun suăi prăk hăng plăk hơmâo pơtrut ngă tui lu.

Tui hăng ƀing khua mua nao jơnum, Ding jum Bruă mă Tơhan rơka hăng Mơnuih mơnam, bruă ba yua rơnoh prăk tuh pơ alin kơ bruă čar dŏ rơnang, amăng anun prăk tuh pơ alin kơ hơdră pơhrŏ ƀun rin hơđong kjăp thun 2024. Kơ-iăng Khua Jơnum min Mơnuih mơnam gah anom bruă khua pơ ala mơnuih ƀôn sang, yă Đỗ Thị Lan rơkâo:

“Thun 2024 prăk yua kơ bruă mă, prăk tuh pơ alin kơ bruă čar mơ̆ng ƀing ta dŏ ƀiă đơi, phrâo mă yua truh blan 8 kơnong 47%. Truh abih thun ngă djop mơ̆n thâo aka rơđah ôh. Rơkâo kơ hră lăi pơthâo rơnoh prăk yua mơ̆ng thun 2022-2023, ba yua glăi amăng thun 2024 lĕ, ngă tui hiư̆m pă, hơmâo ba yua abih amăng thun 2024 mơ̆n hă”.

Hră lăi pơthâo kơ tơlơi pơhing ngă tui Akŏ bruă pơđĭ kyar bơwih ƀong huă –mơnuih mơnam hăng Ngăn drăp kơnuk kơna thun 2024, him lăng akŏ bruă hăng jŭ yap rơnoh prăk ngăn drăp kơnuk kơna thun 2025 amăng bruă mă, djru mơnuih ngă hơkrŭ hăng mơnuih mơnam tơnap, khua pơ ala kơ Ding jum Bruă mă Tơhan rơka hăng Mơnuih mơnam brơi thâo, gah yŭ kơ tơlơi git gai mơ̆ng Ping gah, tơlơi pơčrâo ba, git gai khut khăt mơ̆ng Kơnuk kơna, Khua dêh čar; hăng pran gir run mơ̆ng ƀing khua mua, mơnuih apăn bruă, mơnuih mă bruă amăng đơ đam anom bruă laih anun ngă hrŏm pơdjru nao rai djop gưl, djop anom bruă, djop tơring čar, ƀôn prong amăng dêh čar, Ding jum Bruă mă Tơhan rơka hăng Mơnuih mơnam hơmâo pok pơhai ngă tui sa amăng plĕ, djơ̆ lăp, beč bal, tŭ yua djop bruă jao ngă, hơdră pơsir amăng bruă apah mơnuih mă bruă, bruă djru sang anŏ hơkrŭ hăng mơnuih mơnam tơnap tap; hmao kru pơsir, tŭ mă hơdôm hră pơar rơkâo pơsir tui tơlơi djru; ngă rah djop bruă mă re se, laih anun đing nao pơsir hơdôm tơlơi dŏ kơđông, hơdôm tơlơi phrâo hơmâo dơ̆ng.

Ƀơi mông jơnum, Jơnum min Mơnuih mơnam mơ̆ng Sang bruă khua pơ ala mơnuih ƀôn sang dêh čar rơkâo Ding jum Bruă mă, Tơhan rơka hăng Mơnuih mơnam khom lăi rơđah anŏ gun pơdjơ̆ nao kơ bruă glăm ba pơpha rơnoh prăk ăt kah hăng anŏ gun ngă hră pơar pơtô ba tơlơi phiăn ngă tui. Mơ̆ng anun, rơkâo hơmâo hơdră pơsir kiăng jŭ yap lăng hlâo ngăn drăp kơnuk kơna djơ̆ găl, pơhlôm djop kơ bruă djru mơnuih mơnam hăng mơnuih ƀôn sang amăng  dêh čar.