Anai lĕ tơring čar kual čư̆ siăng giăm guai, mrô mơnuih djuai ania ƀiă dưm dưm rơbêh 80%, hơdôm thun laih rơgao, Lai Châu lêng kơ pơsit tong bruă ngă tui klă hơdôm hơdră djru mơnuih djuai ania ƀiă, djru brơi neh met wa pơđĭ kyar bơwih ƀong huă, hơđong tơlơi hơdip mơda, pơklaih mơng ƀun rin. Hăng 20 djuai ania dŏ hơdip hrŏm, amăng anun hơmâo 4 djuai ania ƀiă anun lĕ Cống, Mảng, La Hủ hăng Si La, hăng tơlơi pơmĭn, phiăn juăt dŏ phara. Ăt hơmâo tơlơi gal samơ̆ tơlơi lông hăng gong gai djop gưl amăng bruă lăi pơthâo gru grua kơplah wah djop djuai ania amăng plơi pla kiăng pơđĭ kyar. Lai Châu hơmâo ba tơbiă tơlơi pơtrun kơ hơdră pơđĭ kyar ngă hmua pla lu gơnam sĭ mơdrô amăng rơwang thun 2021-2025. Anai lĕ tơlơi gal kiăng djop tơring glông, plơi prong pơsur akŏ pơjing, pơhưč hơdôm anom bơwih ƀong hrŏm tuh pơ alin, pơlir hơbit, gum hrŏm hăng gong gai ƀon lan ngă pơgiong jơlan hơdră rĭm boh să sa gơnam, pơsit tong anai lĕ sa amăng hơdôm hơdră bruă tŭ yua mơng Lai Châu kiăng djru brơi neh met wa djuai ania ƀiă gêh gal sĭ mơdrô gơnam đang hmua djru pơklaih mơng ƀun rin hơđong kjăp. Ơi Lê Xuân Tiến - Kơ-iăng Khua gơnong bruă sĭ mơdrô hăng tuh tia pơkra pơjing Lai Châu brơi thâo:

“Amăng rơwang thun 2021-2025 pơsit tong pơđĭ kyar 7 boh sang čơ kual mơnuih djuai ania ƀiă. Hăng bruă pơlir hơbit djop gơnam đang hmua kual mơnuih djuai ania ƀiă, gơnong bruă sĭ mơdrô hăng tuh tia pơkra pơjing hơmâo pơphô bruă brơi Jơnum min mơnuih ƀôn sang tơring čar pơjing 16 jơlan hơdră kiăng pok pơhai ngă tui, kiăng pơlir hơbit djop gơnam đang hmua mơng neh met wa amăng hơdôm anih anom sĭ mơdrô pơprong amăng tơring čar kah hăng sa, dua boh ƀon lan”.

Mơng sa boh tơring čar aka ƀu hơmâo anăn kơ bruă pla boh troh, ră anai Sơn La jing anih pla prong hloh ƀơi kual Kơdư hăng dong tal 2 đơ đam dêh čar. Gơnam đang hmua hơmâo ba sĭ mơdrô pơ hơdôm boh dêh čar pơdrong asah amăng rŏng lŏn tơnah hăng dưi pơhrui glăi rĭm thun mơng 150 truh pơ 170 klăk đôlar, hơdôm rơbâo čô mơnuih ngă hmua lĕ mơnuih djuai ania ƀiă jing ƀing mơnuih pơdrong asah. Hrŏm hăng bruă pơtrut kơtang pơđĭ kyar tơring čar jing anih pla phun kyâo boh troh prong hloh ƀơi kual Kơdư, anai lĕ bruă pơtrut blơi pơhrui gơnam đang hmua hluai tui hơdôm bruă pơsur sĭ mơdrô. Ră anai, hơmâo 16 boh troh amăng tơring čar Sơn La ba sĭ mơdrô pơ 12 boh dêh čar. Gơnam đang hmua hơmâo pơmut hrŏm amăng sĭ mơdrô ƀơi hơdôm sang sĭ mơdrô pơprong anun lĕ: Lette, Hapro, WinMart. Gơnam đang hmua mơng Sơn La jai hrơi hơmâo tơlơi đăo gơnang, hơmâo anăn apăn sĭ mơdrô amăng lŏn ia hăng tač rơngiao, hơmâo lu mơnuih blơi yua hăng lăng yôm jing gơnam hiam hơdjă. Ơi Quàng Văn Dương-Ding kơna anom bơwih ƀong hrŏm gah ngă hmua Xuân Tiến, Sơn La čang rơmang:

“Tơlơi čang rơmang mơng neh met wa kah hăng anom bơwih ƀong hrŏm lĕ bruă blơi pơhrui gơnam tam, ăt kiăng mơn boh pơ-ô̆ jai hrơi pơđĭ kyar, kiăng pơhrui glăi lu ƀiă dong hăng hơmâo lu mơnuih hmư̆ hing amăng lŏn ia kah hăng pơ tač rơngiao”.

Bình Phước lĕ kual lŏn mơnai gêh gal, hơmâo lu tơlơi dưi mơng ayuh hyiăng kiăng pơđĭ kyar pla phun boh ñông hăng arăng lăng anai lĕ kual pla boh ñông lu hloh hăng giăm 50% đang hmua pla hăng pơhrui glăi 54% mrô boh ñông đơ đam dêh čar. Asar boh ñông Bình Phước hiam hơdjă pơhmu hăng asar boh ñông blơi mut, tơlơi anai pơgôp ba boh ñông jing phun pla sĭ mơdrô pơ tač rơngia lu hloh, hăng jing gơnam đang hmua sĭ mơdrô phun mơng tơring čar amăng hơdôm thun giăm anai. Yă Thân Thị Xiêm-Khua kông ti TNHH sa ding kơna An Thuận Phát ƀuăn gum hrŏm hăng mơnuih ngă hmua Bình Phước amăng blơi pơhrui:

“Ƀing gơmơi hơmâo gum hrŏm hăng neh met wa ƀơi Bình Phước, mơng mơnuih djuai ania ƀiă truh pơ mơnuih djuai ania S’tiêng, ƀing gơmơi hơmâo pơlir hơbit amăng sui thun hăng neh met wa lơm truh bơyan hơjan hlim, hơdôm tơlơi tơnap tap mơng neh met wa ƀing gơmơi hơmâo gum hrŏm hăng lơm pĕ pơhrui ƀing gơmơi hrŏm hăng neh met wa gơgrong tui tơlơi anai, kiăng ba asar boh nông glăi pơ sang măi pioh pơkra pơjing, anai lĕ djơ̆ gơnam mơng Bình Phước kiăng hơmâo dong bruă mă brơi neh met wa tơdơi kơ hơdôm hrơi hơjan hlim hăng tơdơi kơ pĕ pơhrui, yua neh met wa ƀơi kual lŏn Bình Phước kơnong lăng boh ñông lĕ gơnam pơhrui phun”.

Amăng thun blan laih rơgao, gơnong bruă sĭ mơdrô hơmâo đing nao pơtrut hơdôm bruă pơsur sĭ mơdrô kiăng pơlir hơbit mơnuih sĭ hăng blơi pơhrui gơnam mơng mơnuih ƀon sang, amăng anun hơmâo mơnuih djuai ania ƀiă kual čư̆ siăng, kual ataih, asuek. Ding jum sĭ mơdrô hăng tuh tia pơkra pơjing hơmâo hrŏm hăng djop ƀon lan gir run kiăng lăi pơthâo gơnam đang hmua truh djop anih hăng hơmâo lu dong anom bruă ngă hrŏm. Hơdôm bruă gum djru sit nik ania ba glăi tơlơi klă hăng bruă blơi pơhrui gơnam đang hmua mơng neh met wa đĭ tui rĭm thun hăng dưi pơdă sĭ mơdrô ƀơi lu anih kah hăng ba sĭ mơdrô pơ tač rơngiao./.