VOV4.Jarai - Čơtlăm lơ 1/6 Khua pơ ala mơnuih ƀôn sang hmâo bơkơtuai amăng sang rông kơ pơhrua nao bôh tơhnal ngă tui kơčăo bruă pơđĭ kyar bơwih ƀong – mơnuih mơnam hăng ngăn drăp Kơnuk kơna thun 2021 hăng hơdôm blan akô̆ thun 2022. Gum hrom pơhiăp amăng mông bơkơtuai, Khua pơ ala mơnuih ƀôn sang K’ Nhiễu – Grŭp tơring čar Lâm Đồng gum pơhiăp: Kual djuai ania ƀiă hăng čư̆ siăng hmâo bôh than yôm phăn amăng bruă pơđĭ kyar lŏn ia ăt kah hăng bruă ngă hơkrŭ mơng Ping gah. Khua pơ ala mơnuih ƀôn sang dêh čar ta tal 15 hmâo mă yua laih Tơlơi pơtrun pơsit mrô 120 tơlơi pơsit hơdră pơtrun tuh pơplai jơlan hơdră pơkă mơng lŏn ia pơđĭ kyar bơwih ƀong – mơnuih mơnam kual djuai ania ƀiă hăng kual čư̆ siăng mơng thun 2021-2030. Kơnuk kơna hmâo črâo ba khop, kơtang hơdôm ding jum, gơnong bruă ngă tui hăng pok pơhai. Ơi K’Nhiễu rơkâo Kơnuk kơna, Khua dêh čar lăng ba, črâo ba hơdôm ding jum, gơnong bruă bơdjơ̆ nao khom hmâo sa pran pơsit bruă kơđi čar dlông hloh pioh đing nao ngăn rơnoh, pran jua, bôh thâo kiăng pok pơhai pơphun ngă tui jơlan hơdră, hrưn đĭ pơsir 100% ngăn rơnoh kah hăng kơčăo bruă hmâo jao./.

Siu H’ Prăk: Pơblang