VOV4.Jarai-Tơdơi kơ 20 thun pok pơhai jơlan hiwdră gơgrong brơi čan djru ba mơnuih ƀun rin hăng hơdôm khul mơnuih kơnuk kơna djru ba tui Hră pơtrun mrô 78 mơ̆ng Kơnuk kơna dêh čar, rơnoh prăk gơgrong brơi čan hơmâo ba truh pơ plơi pla, kual ataih čư̆ siăng kriăng pơtâo, kual asuek, djru pơtrut bruă ngă djơ̆ tơhnal lui rơmŏn kŏn rin, man pơdong plơi pla phrâo hăng hơđong tơlơi hơdip mơda mơnuih mơnam tơring čar Sơn La.

Jing sa boh sang anŏ ƀun rin sui thun laih mơ̆ng kual lŏn kơniă Hua It, tơring kual It Ong, tơring glông Mường La, tơring čar Sơn La, rơnoh pơhrui glăi rĭm thun mơ̆ng sang anŏ ơi Lèo Văn Binh kơnong tơki kơ hmua kơdư đang kơtor, đang hơbơi plum khăng khăi đôč. Thun 2015, dưi hơmâo ƀing ngă bruă pơ sang bruă prăk djru mơnuih mơnam tơring glông hrom hăng ƀing khua mua gong gai amăng kual pơtô, djru ba, ơi Binh khin čan 50 klăk prăk mơ̆ng prăk djru kơmlai ƀiă yua Sang bruă prăk djru mơnuih mơnam brơi čan kiăng tuh pơ alin brơi lŏn ngă hmua, pơblih pơjeh phun pla ƀiă blan, pla phun boh troh sui thun djơ̆ hăng kual lŏn, adai pơđiă kơtang pơ plơi pla.

Thun 2018, ơi Binh čan dơ̆ng 50 klăk, mơ̆ng sang bruă prăk djru mơnuih mơnam, blơi pơjeh phun pla, djuai hlô mơnong rông pioh ngă bruă pơđĭ kyar bơwih ƀong huă. Tơdơi kơ lu thun ngă hmua pla kơtor, pla hơbơi ƀlang jing hơbô̆ bruă bơwih ƀong huă lu mơta, hmua prong 1 hektar hăng 100 phun boh ƀrô yuan pơtlep than, 150 phun boh kruăi dŭng klĭ mơtah, boh pơ-ô̆ Đài Loan, boh mit Thái, hrom hăng anun rông 10 drơi kơbao, rơmô hăng bui mơnŭ rông phai amăng đang.

Mơnuih ngă bruă mơ̆ng sang bruă prăk djru mơnuih mơnam Sơn La nao

pơ rĭm boh plơi, tơring kual mơtam

 Ơi Lèo Văn Binh lăi: Bơyan ngă hmua thun hlâo, hơbô̆ bơwih ƀong huă mơ̆ng sang anŏ gơñu čơdơ̆ng hơmâo kơmlai tui yơh, dưi pơhrui glăi rơbêh 100 klăk prăk laih pơhlưh hĭ prăk tuh pơ alin; hơdôm thun tŏ tui dơ̆ng, phun kyâo boh troh ñu pla đĭ hiam, rơnoh sĭ mơdrô boh troh ăt hơđong, anun dưi pơhrui glăi 250 klăk prăk:

“Sang anŏ gơmơi čan prăk mơ̆ng sang bruă prăk djru mơnuih mơnam blơi rơmô, blơi lŏn ngă hmua pla boh troh; yua hơmâo prăk anun yơh ră anai sang anŏ hơmâo đang boh troh ngă hmua hơđong, rông rơmô kơbao lu tui, boh troh lĕ truh bơyan pĕ lĕ ƀing sĭ mơdrô nao blơi tơl hmua mơtam”.

Hăng 40 čô mơnuih mă bruă hơđong hăng 50 čô mơnuih mă bruă apah hrơi, kông ty sa ding kơna mơnuih ƀôn sang ngă pô Hữu Hảo Tây Bắc dŏ pơ plơi Văn Minh, să Mường Bú, tơring glông Mường La ĕp gơnam amăng gŭ lŏn, sa blan dưi kuai mă mơ̆ng 2.500 -3000 met khô̆i boh pơtâo; laih dơ̆ng kông ty ăt man pơdong ring bruă djru mơnuih ƀôn sang nao rai kah hăng pơkra jơlan ngă gêh găl kơ mơnuih ƀôn sang rô rơbat hăng pơdŭ pơgiăng gơnam boh troh đang hmua. Yua bơbeč djơ̆ klin Covid 19 ngă sui blan, anun kông ty bưp lu tơlơi tơnap tap, boh nik ñu prăk blan kơ mơnuih mă bruă kơƀah biă mă.

Lu sang anŏ khin čan prăk tuh pơ alin pơblih hơdră mă bruă sĭ mơdrô pơkra ming

Ơi Đỗ Xuân Hảo, Khua kông ty brơi thâo: Mơ̆ng rơnoh prăk djru čan kơmlai ƀiă, yua sang bruă prăk djru mơnuih mơnam tơring glông pô gơgrong, kông ty plai ƀiă tơnap, hơmâo prăk tla prăk blan kơ mơnuih mă bruă, mơ̆ng anun pơtrut adơi ayong mơnuih mă bruă amăng kông ty hơđong pran jua mă bruă wơ̆t amăng bơyan klin kheng hai:

“Amăng hrơi blan hơmâo klin covid 19 ƀă hyu tơnap tap, ƀing adơi ayong mă bruă khom dŏ pơčlah hĭ, tuai nao rai ƀiă blơi gơnam, boh pơtâo pơkra ming rai ƀu hơmâo pô blơi, anun yơh tơnap tap biă mă; hrơi mông anun dưi hơmâo sang bruă prăk djru mơnuih mơnam ngă gêh găl brơi djru hmao kru anun yơh dưi pơsir brơi amăng mông tơnap tap laih anun hơmâo prăk tla brơi kơ adơi ayong mă bruă apah”.

Ơi Tạ Văn Toàn, Kơ-iăng Khua sang bruă prăk djru mơnuih mơnam tơring čar Sơn La brơi thâo: Hăng hơdră pơmin thâo hluh tong ten pran jua ană plơi bơwih brơi klă hiam, amăng 20 thun rơgao ngă tui Hră pơtrun mrô 78 mơ̆ng Kơnuk kơna, rơnoh prăk brơi čan djru kơmlai dưi brơi djop plơi pla, tơring kual dưi hơmâo čan soh, kual ataih, kual asuek hai lêng hơmâo čan mơ̆n, djru kơ hơdôm rơtuh boh sang anŏ ƀun rin, giăm ƀun rin dưi pơklaih mơ̆ng ƀun rin laih anun lu sang anŏ khim ngă khin pơmin čan prăk tuh pơ alin blơi gơnam yua mă bruă, blơi pơjeh phun pla, djuai hlô mơnong rông lăp djơ̆ dưi pơđĭ kyar bơwih ƀong huă, pơhlôm klă tơlơi hơdip mơda sang anŏ, pơsir bruă mă kơ lu mơnuih amăng kual.

Hơbô̆ bruă bơwih ƀong huă lu mơta mơ̆ng sang anŏ ơi Binh hlăk ba glăi boh tŭ yua kơmlai lu

Kơnong thun 2021 phrâo rơgao, ronoh prăk brơi čan hơmâo 1.459 klai prăk, mrô prăk hnưh truh 1.178 klai prăk; abih tih rơnoh prăk dong hnưh truh kơ 4.964 klai prăk; lu mơnuih ƀôn sang čan yua prăk djơ̆ hơdră soh, tŭ yua ba glăi tơlơi bơwih ƀong huă đĭ đăi gŏ amŏ, djop khul grup čan prăk, ding kơna amăng khul čan prăk ngă klă bruă tla prăk djơ̆ hrơi blan, wơ̆t prăk kơmlai sit truh hrơi pơkă, prăk tla kơ grup pơkrem pioh brơi čan ăt ngă tui djơ̆ mơ̆n:

“Tui hăng atur amăng 20 thun pok pơhai ngă tui, Sang bruă prăk djru mơnuih mơnam tơring čar Sơn La ăt kiăo tui bruă pơđĭ kyar bơwih ƀong huă mơnuih mơnam ƀơi djop kual, djop tơring glông, plơi pla; pơtrut bruă pơtô pơblang pôr pơthâo čan prăk gơgrong ba anăn, biă mă ñu hơdră djru mơ̆ng kơnuk kơna pioh kơ mơnuih ƀôn sang kual tơnap tap, kual ataih kiăng hơmâo prăk mă yua tuh pơ alin kơ bruă ngă hmua pla pơjing, rông hlô mơnong, pơsir tơlơi tơnap tap ƀơi anăp mơta”.

Rơgao 20 thun ngă tui Hră pơtrun mrô 78 mơ̆ng Kơnuk kơna pok pơhai ƀơi tơring čar Sơn La, bruă mă čan prăk gơgrong brơi djru mơnuih mơnam tơnap tap hơmâo ba glăi boh tơhnal tŭ yua biă mă, djru hrom yôm amăng bruă lui rơmŏn kŏn rin laih anun ngă hơđong tơlơi hơdip mơda mơnuih mơnam, bruă ngă anai jĕ giăm tŭ yua biă kơ mơnuih ƀun rin hăng hơdôm mơnuih hơmâo anăn kơnuk kơna djru.

  Nay Jek: Pơblang