Grup pel ĕp, krăp lăng bruă ruah khua pơ ala mơnuih ƀôn sang dêh čar tal 16 hăng khua pơ ala mơnuih ƀôn sang djŏp gưl yua Khua ding jum kông an ngă Khua khul phrâo pioh mông ngă bruă hăng Jơnum min ruah khua ƀôn prong Huế. Đại tướng Lương Tam Quang tŭ yap, bơni biă kơ tơlơi prăp rơmet hlâo mơ̆ng ƀôn prong Huế amăng bruă prăp rơmet ruah khua. Laih dong kiăng ƀôn prong Huế pơthâo rơđah tong ten djŏp tơlơi git gai mơ̆ng Gơnong dlông, biă ñu bruă pơhlom rơnuk rơnua kơđi čar, hơđong plơi pla, rơnuk rơnua bruă pôr pơhing hăng rơnuk rơnua kjăp kơ bruă ruah khua, ƀu dưi sư̆ rơbư̆, bral bơngal tơdah hơmâo tơlơi truh sat:“Bruă prăp lui kơ jơnum ruah khua mơ̆ng ƀôn prong Huế pok pơhai abih bang, tơpă sit, lăp djơ̆, djŏp, hơmâo boh tŭ yua lăp hơdor biă. Dua lĕ bruă git gai črâo bruă, pok pơhai bruă ruah khua hơmâo ngă tañ, hăng pran jua ječ ameč, lăp djơ̆, pơhlom djơ̆ hrơi pơkă, djơ̆ tơlơi phiăn, tơlơi pơtrun, kiăng dưi ngă pô, rơđah rơđông abih bang mơnuih thâo. Hơmâo ngă truh kih laih Jơnum pơčrông sai tal sa kơ mrô mơnuih ngă khua, bruă či ngă, mrô mơnuih hơmâo tơbiă anăn či ruah ngă ding kơna pơ ala mơnuih ƀôn sang dêh čar, khua pơ ala mơnuih ƀôn sang djŏp gưl. Bruă pơphun jơnum pơčrông sai tal dua hơmâo prăp lui tong ten laih”.

Ƀơi Dak Lăk, Jơnum min ruah khua tơring čar phrâo pơphun jơnum tal 5 pơƀut pok pơhai hrŏm ha wơ̆t lu bruă akŏ phun, pơhlom tui tơlơi pơkă, hrơi pơkă kơ bruă ruah khua pơ ala mơnuih ƀôn sang dêh čar tal 16 hăng khua pơ ala mơnuih ƀôn sang djŏp gưl rơwang thun 2026-2031 hơmâo pơphun dưm kơnar, dưi ngă pô, djơ̆ tơlơi phiăn hăng rơnuk rơnua.

Tui hăng tơlơi lăi pơthâo mơ̆ng Jơnum min ruah khua tơring čar Dak Lăk, truh ră anai, bruă prăp lui kơ hrơi ruah khua ƀơi tơring dưi ngă tŭ yua lu bruă laih. Khul git gai ruah khua tơring čar pơphun jơnum tal 4, pơtrun lu tơlơi klah čun glăi či git gai na nao mơtăm. Jơnum min mơnuih ƀôn sang tơring čar akŏ pơdong 11 grup krăp lăng, sem lăng ƀơi 102 boh să, phương kăng hmao thâo djŏp tơlơi pơhing hăng pơklaih brơi tơlơi gun, dŏ kơđông ƀơi hơdôm boh să.

Gơnong bruă čar hơmâo pơtŏp brơi rơbêh kơ 15.000 čô pơ ala, ƀơi 103 anih plĕ hră đam tơring čar, pơƀut kơ bruă pơčrông sai mơnuih tơbiă anăn či ruah, čih anăn mơnuih nao plĕ hră, hăng kjăp bruă jŭ yap hră plĕ. Bruă jơnum pơčrông sai hơmâo ngă djơ̆ tơlơi pơkă, amăng anun Jơnum pơčrông tal dua gưl tơring čar pơsit laih anăn 22 čô ding kơna pơ ala mơnuih ƀôn sang dêh čar hăng 144 čô tơbiă anăn ngă khua pơ ala mơnuih ƀôn sang tơring čar. Ƀơi să, đơ đam tơring čar hơmâo mă rơbêh 4.600 pok hră mơnuih tơbiă anăn či ruah, hơmâo mơn hơdôm čô rơkâo mă pô tui hăng tơlơi pơkă mơn.

Pơhiăp ƀơi mông jơnum, yă Cao Thị Hòa An, Ding kơna Khul apăn bruă Ping gah, Kơ-iăng khua ping gah tơring čar, Khua Jơnum min pơ ala mơnuih ƀôn sang tơring čar, Khua khul ruah khua tơring čar Dak Lăk lăi pơtŏng, pơ anăp hơdôm anom bruă kiăng pơƀut hơduah tơña, mă tơlơi pơgôp hiăp mơnuih ƀôn sang pơ anih dŏ hăng pô tơbiă anăn ruah ngă khua, prăp lui klă kơ Jơnum pơčrông tal klâo, laih dong pơhlom rơnuk rơnua hơđong, pôr pơthâo hăng prăp rơmet giong anih anom kiăng hrơi ruah khua rơnuk rơnua, djơ̆ tơlơi phiăn, sit nik hrơi mơak prong mơ̆ng abih bang mơnuih ƀôn sang:“Jơnum min djŏp djuai ania mơnuih mơnam, khul grup kơđi čar mơnuih mơnam khŏm pơƀut lăng ba mơnuih ƀôn sang ƀong Tê̆t trơi pơđao, hyôk hyak mơak pran jua, ngui ngor rơnuk rơnua. Hăng pran jua ngui thâo pơkrem, lăp djơ̆ hăng Tê̆t tui tơlơi phiăn đưm. Hrŏm hăng anun pôr pơthâo kơ hrơi ruah khua, kiăng mơnuih ƀôn sang thâo hluh, thâo bruă hơget či ngă, amra nao plĕ hră. Kâo kiăng ƀing goh khŏm ngă klă bruă pôr pơthâo hok mơak Bơyan bơnga - hok mơak Ping gah - hok mơak lŏn ia ta samơ̆ khŏm anăp nao hrơi ruah khua”.

Ƀơi mông Jơnum lok 54 mơ̆ng Jơnum min apăn bruă phun pơ ala mơnuih ƀôn sang dêh čar phrâo rơgao hơmâo sem lăng, pơsit mă yua Tơlơi pơtrun pơplih glăi tal dua kơ mrô mơnuih, bruă mă mơ̆ng hơdôm anom bruă kơnuk kơna ƀơi gơnong dlông hăng ƀơi tơring hơmâo tơbiă anăn či ruah ngă khua pơ ala mơnuih ƀôn sang dêh čar tal 16. Pơhiăp ƀơi mông jơnum, Khua git gai pơ ala mơnuih ƀôn sang dêh čar ơi Trần Thanh Mẫn lăi rơđah: Lơ 15/3, amra Jơnum ruah khua pơ ala mơnuih ƀôn sang dêh čar tal 16 hăng khua pơ ala djŏp gưl rơwang thun 2026-2031. Mơ̆ng bruă nao pel ĕp prăp lui mông ruah khua ƀơi Kual lŏn dăo Ia krông Cửu Long phrâo rơgao, tui hăng Khua git gai pơ ala mơnuih ƀôn sang dêh čar, hơdôm boh tơring jao bruă tong ten, rơđah rơđông; laih dong bơni biă kơ Jơnum min djŏp djuai ania mơnuih mơnam Việt Nam jơnum pơčrông sai ĕp mơnuih tơbiă anăn tŭ yua biă mă tal sa hăng tal dua. Pơ anăp dong, Khua git gai pơ ala mơnuih ƀôn sang dêh čar kiăng, hơdôm anom apăn bruă anai pơtrut tui bruă pel ĕp, sem lăng, kiăng hmao kru pơsir hĭ tơlơi aka ƀu găl, tơlơi phrâo hơmâo; Khul ruah khua Dêh čar pơƀut git gai črâo bruă klă, tong ten. Biă ñu amăng bruă jơnum pơčrông sai tơbiă anăn khua či ba ruah tal klâo pơgi kơdih anai./.