Tơdơi kơ jơnum lok 5, Ping gah grup Khua pơ ala mơnuih ƀôn sang hăng Khul apăn bruă Ping gah Kơnuk kơna git gai khut khăt, hmao tlôn hơdôm anom bruă mơng Ƀirô Khua pơ ala mơnuih ƀôn sang dêh čar, kơnuk kơna gum hrŏm kjăp hăng hơdôm anom bruă, khul grup bơdjơ̆ nao prap lui hơdôm boh tơhnal pơhlôm brơi klă hloh kiăng mơ-it nao Ƀirô Khua pơ ala mơnuih ƀôn sang dêh čar sem lăng, pơsit.

Bơ sa, dua boh tơhnal Jơnum min apăn bruă Khua pơ ala mơnuih ƀôn sang dêh čar lăng aka ƀu gal hlâo kơ mơ-it nao Khua pơ ala mơnuih ƀôn sang dêh čar sem lăng, tŭ yap amăng jơnum lok 6, Khua čih pioh, Khua anom bruă Khua pơ ala mơnuih ƀôn sang dêh čar ơi Bùi Văn Cường rơkâo, Ping gah grup Khua pơ ala mơnuih ƀôn sang hăng Khul apăn bruă Ping gah Kơnuk kơna sem lăng, git gai hơdôm anom bruă tŏ tui kơsem min, prap lui kiăng mơ-it nao Ƀirô Khua pơ ala mơnuih ƀôn sang dêh čar sem lăng, pơsit amăng jơnum lok 7.

Đĭ pơhiăp amăng mông jơnum, Khua dêh čar ơi Phạm Minh Chính brơi thâo, tơdơi kơ pơđut hĭ jơnum lok 5 Khua pơ ala mơnuih ƀôn sang dêh čar 1 hrơi, Kơnuk kơna hơmâo pơphun jơnum pơpha bruă prap lui hơdôm boh tơhnal gah tơlơi glăm ba kiăng mơ-it nao Khua pơ ala mơnuih ƀôn sang dêh čar sem lăng, pơsit amăng jơnum lok 6. Khua dêh čar lăi pơtong, amăng thun blan laih rơgao, hơdôm anom bruă mơng Ƀirô Khua pơ ala mơnuih ƀôn sang dêh čar hơmâo gum hrŏm kjăp hăng hơdôm anom bruă mơng Kơnuk kơna:

“Tơlơi gum hrŏm anai ƀu djơ̆ kơnong hơmâo amăng črăn tơlơi phiăn đôč ôh lu bruă mă tui tơlơi glăm ba mơng Ƀirô Khua pơ ala mơnuih ƀôn sang dêh čar, anom bruă pơprong hloh, tơlơi pơtrun hơdôm bruă yôm phăn amăng lŏn ia, krăo lăng prong hloh, čih pơkra tơlơi phiăn mơ̆ hơdôm boh tơhnal prong Khua pơ ala mơnuih ƀôn sang dêh čar ăt lêng kơ gum hrŏm kjăp hăng Kơnuk kơna ba glăi tŭ yua biă mă. Kâo ƀuh tơlơi pơlăng nao rai, gum hrŏm mơng Ƀirô Khua pơ ala mơnuih ƀôn sang dêh čar. Yua anun bruă mă mơng Kơnuk kơna pơphun amuñ hruaih, wŏt bruă bơdjơ̆ nao phiah phiăn, laih dong bruă bơdjơ̆ nao bơwih ƀong huă-mơnuih mơnam, pơgang rơnuk rơnua. Phrâo rơgao, jơnum gơnong glông ăt hơmâo tŭ yap, lăng yôm tơlơi gum hrŏm kjăp kơplah wah Ƀirô Khua pơ ala mơnuih ƀôn sang dêh čar hăng Kơnuk kơna”.

Kơ sa, dua boh tơhnal dŏ kaih, aka ƀu prap lui kiăng mơ-it nao Ƀirô Khua pơ ala mơnuih ƀôn sang dêh čar sem lăng, pơsit amăng jơnum lok 6 tui tơlơi pơkă, Khua dêh čar čang rơmang hơdôm anom bruă mơng Ƀirô Khua pơ ala mơnuih ƀôn sang dêh čar, Jơnum min apăn bruă Khua pơ ala mơnuih ƀôn sang dêh čar gum hrŏm hăng hơdôm anom bruă mơng Kơnuk kơna hăng Kơnuk kơna yua anai lĕ hơdôm boh tơhnal tơnap. Pơ anăp anai, Khua dêh čar rơkâo djop bơnah amra tŏ tui gum hrŏm kjăp kiăng prap lui hơdôm boh tơhnal anai kiăng mơ-it nao Ƀirô Khua pơ ala mơnuih ƀôn sang dêh čar sem lăng, pơsit amăng jơnum giăm hloh.

Đĭ pơhiăp pơđut mông jơnum, Khua git gai pơ ala mơnuih ƀôn sang dêh čar ơi Vương Đình Huệ brơi thâo, kiăng kơ prap lui jơnum lok 6, Ping gah grup Khua pơ ala mơnuih ƀôn sang hăng Khul apăn bruă Ping gah Kơnuk kơna hơmâo pơlăi nao rai hmao tlôn, kjăp, ngă tui djơ̆ hrơi mông, djơ̆ hăng tơlơi rơkâo ba tơbiă.

Tŭ ư hăng tơlơi pơgôp mơng ƀing khua mua nao jơnum hăng Khua dêh čar, Khua git gai pơ ala mơnuih ƀôn sang dêh čar ơi Vương Đình Huệ hok mơ-ak bruă prap lui tong ten mơng dua anom bruă hơmâo gum hrŏm kjăp, hơdôm tơlơi pơgôp lăp djơ̆ hăng hơdră ba tơbiă; laih dong lăi pơtong, kiăng tŏ tui prap lui tong ten tui hơnong pơkă mơng akŏ blan 1/2024 amra pơsit hơdôm bruă dŏ pơkŏng glăi.

“Jơnum lok 6. Khua pơ ala mơnuih ƀôn sang dêh čar tal XV hơmâo lu bruă biă mă amăng čih pơkra tơlơi phiăn, krăo lăng, pơsit hơdôm bruă yôm phăn amăng lŏn ia, anai lĕ jơnum tong krah bơdjơ̆ nao bruă mă tơlơi dong yua hăng ƀing apăn bruă hơmâo Ƀirô Khua pơ ala mơnuih ƀôn sang dêh čar ruah, tŭ yap. Hơdôm boh tơhnal yôm phăn bơdjơ̆ nao bruă pơđĭ kyar bơwih ƀong huă-mơnuih mơnam hăng tơlơi hơdip kơ mơnuih ƀon sang. Khua mua Ping gah, Kơnuk kơna, ƀing djru hơkrŭ hăng mơnuih ƀon sang đơ đam dêh čar ăt čang rơmang hăng đăo gơnang nao tơlơi truh kih mơng jơnum tal anai kar hăng jơnum hlâo anun”.

Khua git gai pơ ala mơnuih ƀôn sang dêh čar rơkâo Kơnuk kơna hrŏm hơdôm anom bruă mơng Ƀirô Khua pơ ala mơnuih ƀôn sang dêh čar gum hrŏm kiăng tŏ tui ngă klă bruă prap lui mơng anun pơhlôm klă hơdôm črăn tơlơi phiăn him lăng mơ-it nao Khua pơ ala mơnuih ƀôn sang dêh čar amăng jơnum anai, sit biă ñu hơdôm črăn tơlơi phiăn tơnap. Hăng hơdôm bruă yôm phăn mơ̆ dŏ pơmĭn phara, kiăng hơmâo hơdră phara, kiăng prap lui tong ten boh tơhnal, lăi pơthâo rơđah tơlơi gal, anŏ aka ƀu klă amăng rĭm tơhnal kiăng Khua pơ ala mơnuih ƀôn sang dêh čar pơčrông sai, pơgôp hiăp, pơhlôm klă hloh bruă čih pơkra tơlơi phiăn amăng jơnum tal anai.

Khua git gai pơ ala mơnuih ƀôn sang dêh čar ăt pơtă pơtăn kiăng lăi pơthâo na nao kơ boh tơhnal amăng jơnum tal anai, sit biă ñu hăng hơdôm mông jơnum bơkơtuai, pơgôp hiăp hơdôm bruă hơmâo mơnuih ƀon sang đing nao anun lĕ bruă plĕ hră dong yua, tơña hăng lăi glăi tơlơi tơña amăng mông jơnum, anăm brơi kơƀah amăng tơlơi pơhing, lăi pơthâo; anăp nao pơtô pơblang lăp djơ̆ tơhnal, djơ̆ hơnong pơkă, tơlơi črâo trun mơng Ping gah, tơlơi phiăn mơng Kơnuk kơna, pơhlôm brơi tơpă, djop mơta, hmao tlôn, pơgôp ba boh pơhiăp lăp djơ̆, djop mơta amăng jơnum tơl abih bang mơnuih đơ đam dêh čar./.